BOHULO SEMUEL 3 - KITABI HABARI MOPIOHE

Eeya lopoi̒laalo batanga odelei Semuel

¹ Tou̒ boito, tei Semuel tadonggo kikiia̒ boito hemomaya to Eeya to imato lei Eli. To maasa boito, molawata daa̒ woluo tahuli wau bibilohu monto Eeya.

² Tou̒ huilo tuwau, tei Eli tamaa panggola daa̒ wau wimbideo̒ pitoa̒a boito, donggo tuutuluhu to huwaliilio,

³ wau tei Semuel lotuluhe totili lo Bulua Daantia lo Eeya, todelomo Kema Mantali. Tou̒ dulahee diipo lobutu mai wau tohe donggo lei̒lei̒ita,

⁴ Eeya lotianga olei Semuel, lapatao̒ tei Semuel lolametao̒, “Yaa, Paaa̒!”

⁵ Lapatao̒ tio tilumeteo̒ mota lodunggaya wolei Eli wau loloi̒ya mao̒, “O wolo Paaa̒? Yilongola watia tilingai li Paaa̒?” Bo tei Eli lolametao̒, “Wau̒ diila lotianga olemu, muli potuluhulo.” Lapatao̒ tei Semuel mota luli lotuluhu.

^6-7 Lapatao̒ Eeya luli lotianga olei Semuel, bo diila otaawa lei Semuel deu̒ tahemo tianga olio boito Eeya, sababu diipo pee̒enta mao̒ helo bisala wolio. Sababu uito tio malobongu, tulusi mota lodunggaya wolei Eli wau lohintu mao̒, “O wolo Paaa̒? Yilongola ti Paaa̒ hemotianga olaatia?” Tei Eli lolametao̒, “Wau̒ diila lotianga olemu walau̒uu̒; muli potuluhulo.”

⁸ U otolulio Eeya lotianga olei Semuel; tulusi lobongulo mola tei Semuel wau mota lodunggaya wolei Eli wau loloi̒ya, “O wolo Paaa̒? Yilongola ti Paaa̒ lotianga olaatia?” Tou̒ boitolo mola tei Eli malo ngalati deu̒ Eeyaalo tahemo tianga towalao̒ boito.

⁹ Sababu uito tio loloi̒ya mao̒ odelei Semuel, “Muli mota potuluhuulo, wau wonu yio̒ muli tiango-Lio polelea mao̒, ‘Ambunguolo potahudalo mai, Eeya, wato-Mu mamo dungoheo̒.’ ” Lapatao̒ tei Semuel maluli lonao̒ mota ode tambati potuluhelio.

¹⁰ Lapatao̒ malonao̒ mai Eeya, wau tilimihulao̒ to tambati boito wau luli lotianga, “Semuel, Semuel!” Wau tei Semuel lolametao̒, “Ambunguolo potahudalo mai, Eeya, wato-Mu mamo dungoheo̒.”

¹¹ Lapatao̒ Eeya malo tahuda olio, “Wau̒ mamohutu mao̒ hitua-tuawua umoo̒ohe totaulo Isirai̒lu, tilinggula timii̒du taa u modungoheo̒ mamolingu.

¹² Todulahee boito Wau̒ mamohutu mai totoonulalo u mapilo ngaanjamu-U̒ mao̒ to ngaalaa̒ lei Eli lonto bohulio demola pulitio.

¹³ Mapilo o̒taa-U̒ mao̒ olio deu̒ ngaalaa̒lio mahukumanio-U̒ u ohiheo-hiheolo mao̒ sababu mongo walai̒o malohina ola-U̒. Otaawa lei Eli duduu-sawaalo limongolio boito, bo timongolio diila ilingoalio.

¹⁴ Sababu uito Wau̒ malotadia tomimbihu ngaalaa̒ lei Eli, deu̒ dusa limongolio ulaba-labaalo udaa̒ boito diila taa o luluta meaalo penu boli dewo wolo wambai̒o u ohiheo-hiheolo mao̒.”

¹⁵ Lapatao̒ uito tei Semuel luli leitululuhu, wau tou̒ dumodupio mola tio malobongu wau lomuo̒ mao̒ huhuu-hebuwalo Bele lo Eeya. Tio moohe mopoo̒taa mao̒ bibilohe boito odelei Eli,

¹⁶ bo tei Eli lotiangao̒ olio, ualio mao̒, “walau̒u̒.” Tametao̒ lei Semuel, “Yaa, Paaa̒.”

¹⁷ Tei Eli lohintu mao̒, “Wolo u piloo̒taa mai lo Eeya olemu? Wunggulia mai ngoa̒amilalo olau̒. Wonu woluo hitua-tuawua u huliomu, tantulo mao̒ yio̒ hukuumanio lo Allahu Taa̒ala.”

¹⁸ Lapatao̒ tei Semuel lopoo̒taa mao̒ ngoa̒amilalo boito odelei Eli. Diaaluo penu boli tuwau mao̒ u hiluliilio. Lapatao̒ malo loi̒ya tei Eli, “Tio Eeya, huliaalo mao̒ Eeya mopohutu mai wolo u anggapuo-Lio mopiohe.”

¹⁹ Tei Semuel heo̒duhenga mola udaa̒alio. Eeya pee̒-pee̒enta wolio wau lohutu mao̒ ngoa̒amila uiloi̒ya lei Semuel otutu lotoduo mai.

^20-21 Uito sababuulio ngoa̒amila umati lo Isirai̒lu lonto ngoilanggubu lipu boito helo ngaku mao̒ deu̒ tei Semuel yito nabi lo Eeya. Timii̒du tei Semuel mobisala, ngoa̒amila bangusa lo Isirai̒lu modungohu. Eeya debo tulusi hemopo ilaalo batanga to Silo, tou̒toonu Tio ubohu-bohulio lopoi̒laalo batanga odelei Semuel wau helo bisala wolio.