BOHULO SEMUEL 1 - KITABI HABARI MOPIOHE

Tei Elkana wau ngaalaa̒lio to Silo

¹ Woluo talolai̒ ngota tanggulio Elkana, lonto suku Epraim. Tio bilubiluloa̒ to Rama, tomadala hihui̒-hui̒dea lo Epraim. Tei Elkana yito walae̒e Jeroham wau wombu lei Elihu. Tio leituwoto to ngaalaa̒ lei Tohu, tango lomaraga lei Jup.

² Tei Elkana odile duulota, ti Hana woli Penina. Ti Penina owalao̒, bo ti Hana diila.

³ Timii̒du taunu tei Elkana hemonao̒ monto Rama mola hemotabia to Silo wau hemopodewo bake ode Eeya Taa Laba-labaalo kawasa. Talowali iimamu to Silo yito tei Hopni Pinehas, mongo walae̒e Eli.

⁴ Timii̒du wonu tei Elkana mopodewo bake, ti Penina wau ngoa̒amila walai̒o tinggai hewohiyalio mao̒ tayadu monto tapu lobake boito.

⁵ Bo ti Hana yilohiyalio ngotayade wambao̒ sababu Eeya diila longohi walao̒ to olio. Eleponu odito tei Elkana motolia̒nga daa̒ oli Hana.

⁶ Ti Hana laito hepo palatolio tohilao wau hehinaa li Penina, dilelio oluolio boito, sababu Eeya diila longohi mai walao̒ to olio.

⁷ Sua̒li boito hemotoduo monto taunu odungga lo taunu; wonu timongolio tonggonao̒ mola ode Bele lo Eeya, laito ti Hana hepo palatolio tohilao li Penina. Tingga maito ti Hana humoyongo wau diila mohuto molamelo sababu hehinaalio.

⁸ Lapatao̒ timii̒du uito olo tei Elkana, dilelio, hemohintu mao̒, “Yilongola yio̒ hilumoyonga Hana? Yilongola yio̒ diila mohuto molamelo wau susuukali tulusi wambai̒o? Wolo wau̒ diila lebe ohalaga wolo walao̒ mongo lolai̒ mopulu lota?”

Ti Hana wolei Eli

^9-10 Tou̒ dulahee tuwau lapatio mao̒ timongolio lolamelo to Bele lo Eeya to Silo, ti Hana tilimihulao̒ lonto meja hepolamelalo. To saaa̒ti boito ti Iimamu Eli tawoluo olo to Bele lo Eeya, donggo hulohuloa̒ to kaderalio totili lohuhebu. Wolo susuukali daa̒ ti Hana malodua̒ ode Eeya sambela hiyohiyongo.

¹¹ Lapatao̒ ti Hana helo lapalao̒ danti, ualio mao̒, “Eeya Taa Laba-labaalo kawasa, ambunguolo poo̒tuotilo mai wato lo Eeya botie! Ambunguolo bilohilo mai dudutolo watotia. Ambunguolo eelai mai watotia wau diila mao̒ lipata watotia! Wonu Eeya mongohi mai olo watotia walao̒ talolai̒ ngota, watotia modanti mai mamohudu mao̒ olio ode Eeya ngotupa lo tutumulio. Watotia modanti mai olo deu̒ huwoi̒o diila pee̒enta mao̒ huntingalo.”

¹² Lohiheo daa̒ ti Hana helodua̒, wau tei Eli hemopoo̒ tuotao̒ biihio lotaabua boito.

¹³ Ti Hana helodua̒ todelomo hilao, oditolio bo biihio u imumao̒-imumao̒, bo sualaalio diila odungohe. Sababu uito tio yilantobio lei Eli huwohuwoo̒.

¹⁴ Yi tei Eli luli loloi̒ya mao̒ olio, “Diila pongalo aakali yio̒ huwohuwoa̒ tewe! Diilalo pongilu angguru!”

¹⁵ Bo ti Hana lolametao̒, “Watia diila huwohuwoa̒, Paaa̒, watia sama-samaata diila longilu angguru! Watia yilooli halapani, wau donggo hemodua̒ hemo hungguli ode Eeya totoonulalo dudutolo laatia.

¹⁶ Diila mao̒ anggapua watia botie taabua suuntali. Watia helodua̒ mola debo odelo utie sababu watia suukali daa̒.”

¹⁷ Lapatao̒ ualei Eli mao̒, “Wonu odito pohualingolo wolo moa̒ahu. Pohileaala dua̒ Allahu Taa̒ala lo Isirai̒lu mopowoluo mai hihiilemu.”

¹⁸ Tametao̒ li Hana, “Pohileaala dua̒ watia moo̒tapu mai balakati li Paaa̒.” Lapatao̒ lonao̒lo tio, tulusi malo lamelo; wau tio diilalo suukali.

Tei Semuel pilotutu mai wau yiludulio ode Eeya

¹⁹ Loloombulio mola tei Elkana wau ngaalaa̒lio lobongu didimodupo, wau lapatao̒ loi̒baadati ode Eeya, timongolio tilonggo walingo ode Rama. Yi tei Elkana lo uulauwa woli Hana, dilelio boito, wau Eeya lodungohei dua̒ li Hana.

²⁰ Taabua boito maa ilombodaa̒ wau lopotutu mai walao̒ talolai̒. Tio lolanggulao̒ Semuel, ualio mao̒, “Wau̒ malohile mai olio lonto Eeya.”

²¹ Leidunggalo mai wakutuulio tei Elkana wau ngaalaa̒lio luli lonao̒ ode Silo mola helo podewo bake timii̒du taunu ode Eeya. Wewolio mao̒ leeto tei Elkana malodanti mopodewo bake u tolo-tolomodu.

²² Bo pee̒enta botie ti Hana diila loduduo̒. Ualio mao̒ ode dilelio, “De lapatao̒ lopatolo monto tutu, tei Semuel madepitou̒ mola ode Bele lo Eeya, wau tio mamoti biluloa̒ mola teto ngotupa lo tutumulio.”

²³ Tametao̒ lei Elkana, “Ooo̒, pohutualo mao̒ wolo u to bibilohumu mopiohu; potibiluloo̒lo tobele tunggula meidungga mai wakutuulio yio̒ molopatao̒ totutu walao̒onto boito. Wau pohileaala dua̒ Eeya mohutu mai dantimu mowali moi̒laalo mai.” Oditolio, ti Hana malo tibiluloa̒ tobele tunggula leidungga mai wakutuulio walai̒o yilopata totutu.

²⁴ Lapatao̒ tei Semuel yilopatio mao̒ totutu, tio dilepitio mola liilolio ode Bele lo Eeya to Silo. Tou̒ boito tio donggo kikiia̒ daa̒. Ti Hana lodelo mola olo sapi ulai̒ tuwau u o umulu tolo taunu, pale mopulu lokilo, wau bututu walito tuwau u polupolu tuatuanga angguru.

²⁵ Sapi boito ilolotio mao̒, lapatao̒ tei Semuel dilepitio odelei Eli.

²⁶ Ti Hana malo loi̒ya mao̒ odelei Eli, “Bolo maa̒apu, Paaa̒. Donggo oe̒ela li Paaa̒ watia? Watia botie taabua tamaa pee̒enta iloontonga li Paaa̒ tihutihula tewe, donggo hemodua̒ mola ode Eeya.

²⁷ Walao̒ botie tamaa pilohile lowatia lonto Eeya. Dua̒ lowatia madilungohei lo Eeya,

²⁸ wau sababu uito walao̒ botie wuduo mai lowatia mowali haku lo Eeya ngotupa lo tutumulio.” Lapatao̒ uito timongolio helo ibaadati ode Eeya.