BOHULO MONGO OLONGIA 9 - KITABI HABARI MOPIOHE

Eeya luli lopobilohe batanga odelei Salomo

¹ Lapatao̒ tei Salomo yilapata lopotihula mola Bele lo Eeya wau bele biluloa̒ li olongia wau ngoa̒amila u yilanjanaalio,

² Eeya luli lopobilohei batanga olio debo odelo uilowali to Gibeon.

³ Eeya lotahuda mai olio, “Dua̒amu madilungohe-U̒, wau woleeto bele u bilongumu botie poi̒laalo-U̒ mai mowali tambati tolomodu u poi̒baadatialo ode Olau̒ ohiheo-hiheolo mao̒. Wau̒ malaito mopoo̒tuoto wau modaha tambati botie.

⁴ Wonu yio̒ motiwato to Olau̒ wolo hilaa motulidu wau juujulu debo odelo tiyamamu Dauda, wau yio̒ modungohe totoonulalo butoo̒ wau palentaa-U̒,

⁵ yi Wau̒ mamoe̒elai danti-U̒ ode liyamamu Dauda deu̒ walao̒ wombulio wawaalia mola malaito momalenta Isirai̒lu.

⁶ Bo wonu yio̒ meaalo walimu mola momulemenga ola-U̒ wau diila modungohe totoonulalo butoo̒ wau palentaa-U̒ wau yio̒ molubo ila-ila wewo,

⁷ yi Wau̒ mamopo hinggi umati-U̒ Isirai̒lu monto lipu u mailohiu̒ mai ode limongolio. Wau̒ olo mamololaa bele botie u matilantu mao̒ lowali tambati poi̒baadatialo ode ola-U̒. To utoonulalo mao̒ taulo Isirai̒lu mahinaalio wau poi̒ii̒yalio.

⁸ Bele poi̒baadatiala botie mamowali tuwaulio huntua lotuode tilinggula timii̒du taa u lumaodeo̒ teto maa ooheaalo wau timihela hapato. Timongolio mamoloi̒ya, ‘Yilongola Eeya helohutu mai odito ode lipu wau bele botie?’

⁹ Lapatao̒ tau mamo lametao̒ odie, ‘Sababu timongolio helo lolaa mao̒ to Eeya, Allahu Taa̒ala limongolio, tamalo depita loluuhuru limongolio yilumualao̒ lonto Masiri. Timongolio helo lubo ila-ila wewo. Utolo sababuulio Eeya malo podungga mai baala botie ode limongolio.’ ”

Poloa̒koloa towolota lei Salomo woli Olongia Hiram

¹⁰ Tei Salomo helomongu Bele lo Eeya wau bele biluloa̒ li olongia loo̒oma dulo pulu lotaunu mola.

¹¹ Ngoa̒amila ayu woohu Libanon wau ayu woohu biasa wau ngoa̒amila hulawa u pilalalu lei Salomo u pomongulalo boito mailohi li Olongia Hiram olio. Lapatao̒ kalaja boito yilapato, ti Olongia Salomo longohi mao̒ odelei Hiram dulo pulu kota tomadala lo Galilea.

¹² Yi malonao̒ tei Hiram mola lomilohe olio, bo tio diila sanangi wolo uilohi boito.

¹³ Tio loloi̒ya mao̒ odelei Salomo, “Wutatuu̒, wolo mao̒di-odieelo lakulio lo kokoo-tawaalo u wohimu olau̒?” Uitoolo sababuulio madala boito donggo unte-unte Kabul.

¹⁴ Lebe lou̒ wopato lihu lokilo hulawa mailao lei Hiram odelei Salomo.

Susuu-aliyaalo wewo u hepilohutu lei Salomo

¹⁵ Ti Olongia Salomo helomake dudelo kalaja pakusa u lomongu Bele lo Eeya, bele biluloa̒ li olongia, dingingo meeseli lo Yerusalemu wau lolambula huta to ambahu huliaalio Bele lo Eeya. Tio helomake dudelo u tutuuwauwa u luli lomongu kota Hajor, Megido wau Gejer. (

¹⁶ Kota Gejer yito u muloololio mai hetiluhu wau ilolaahe li olongia lo Masiri, lapatao̒ ulipulio hepilatelio yila-yilateelo mao̒ wau kotalio pilobulio. Kota boito lapatao̒ yilohi li olongia lo Masiri odeli puusiliilio odelo paraseni todulahu lo nikaalio wolei Salomo.

¹⁷ Wau tei Salomoolo taluli lomongu kota boito.) Wolo kalaja pakusa olo, tei Salomo luli lomongu Bet-Horon-Hilir,

¹⁸ Baalat, Tamar tohuta datahu wau luasi udelita lo Yehuda,

¹⁹ kokoo-tawaalo potomeu̒walo, wau kokoo-tawaalo u heporabua kaleta lo popaatea wau wadalalio. Ngoa̒amila lanjana pomongulalo to Yerusalemu, Libanon, wau to ngoilanggubu madala to kawasaalio mapilo ponao̒lio.

^20-21 Duo̒lo kalaja pakusa boito tei Salomo helo tiangai lotia̒mbu tau-tauwalo wali mai taulo Amori, Het, Peris, Hewi wau Yebus. Timongolio yito tau-tauwalo wali mai lobangusa Kanaa̒n tadiila ilopatea yila-yilateelo mao̒ lotau Isirai̒lu tou̒ timongolio helo ngaawasa lipu boito. Dilumutu botia wali mola limongolio debo donggo wato.

²² Taulo Israi̒ilu diila hepilohutu lei Salomo wato, timongolio tilugasialio odelo pajule, polowila, tau̒wa lo popaatea, komudangi kaleta lo popaatea wau suludadu pasuukani lowadala.

²³ Limo lohetuto limo lopulu lota pogawee hepilei̒ tihulalio mao̒ totau-tauwalo tahi pokalajawa pakusa todelomo poloyeki hidala-dalaala pilomongula lei Salomo.

²⁴ Huta to ambahu huliaalio Bele lo Eeya hetilambula lei Salomo lapatao̒ dilelio, deu̒yito-yito tipuusili li olongia lo Masiri, malo limbato lonto kota lei Dauda ode bele biluloa̒ li olongia ubilongu lei Salomo olio.

²⁵ Poo̒otolu ngotaunu tei Salomo hemo podewo bake yilalango wau bake lo polodame toitaato mesba u mabilongulio ode Eeya. Tio olo helomobu dupa ode Eeya. Odi-odieelo mola tei Salomo helo poo̒lapato pilomongula Bele lo Eeya.

²⁶ Duo̒lo ngopasukani kaapali lo popaatealio, ti Olongia Salomo helohutu kakaa-paliyaalo to Ejion-Geber, membideo̒ lo Elot topentadu Wulungo Akaba, tomadala lo Edom.

²⁷ Ti Olongia Hiram helolao tahi pokalajawa to kaapalilio tahi woolata u mobite pee̒-pee̒enta wolo tahi pokalajawa to kaapali lei Salomo.

²⁸ Pee̒enta timongolio lobite ode lipu lo Opir mola lohama mai hulawa mopulaa pato lihu lokilo wau dilelolio odelei Salomo.