BOHULO MONGO OLONGIA 8 - KITABI HABARI MOPIOHE

Bulua Daantia lo Eeya dilelo ode Bele lo

¹ Lapatao̒ ti Olongia Salomo helo poa̒hu ngoa̒amila suku wau kaumu lonto bangusa lo Isirai̒lu lonao̒ mai ode olio to Yerusalemu u lopo limbato Bulua Daantia lo Eeya lonto Sion. Kota lei Dauda, ode Bele lo Eeya.

² Yi malonao̒ mai timongolio ngoa̒amila to Dulahu Buka lo Wombohe Duungo todelomo hulalo Etanim.

³ Tou̒ ngoa̒amila tau̒wa boito lotia̒mbu mai, yi mongo iimamu malo mintaa̒a Bulua Daantia boito,

⁴ wau dilelo limongolio ode Bele lo Eeya. Kema lo Eeya wau ngoa̒amila powimumutio olo heilimbato lomongo iimamu wau taulo Lewi ode Bele lo Eeya.

⁵ Ti Olongia Salomo wau ngoilanggubu ulipu lo Isirai̒lu lotia̒mbu mao̒ totalu lo Bulua Daantia boito tulusi helo podewo ode Eeya himba wau sapi udiila oyia̒apa daatalio.

⁶ Lapatao̒ uito mongo iimamu malodelo Bulua Daantia boito ode delomo Bele lo Eeya wau lopodutu mao̒ towalungo bubuu-iyaalo malaikati opolipio̒ todelomo Huwali Leidaa̒ Laba-labaalo mantali.

⁷ Polipio̒ lo bubuu iyaalo boito hio̒oa̒be lolau̒beo̒ bulua boito wau aa̒a-yuwaalo u pohuluhelio.

⁸ Ayu pohulihe boito hayahayao̒ daa̒, tilinggula huhuudio oontonga monto talu lo Huwali Leidaa̒ Laba-labaalo mantali. (Dilumutu to dulahee botie aa̒a-yuwaalo boito donggo woluo teto.)

⁹ To delomo Bulua Daantia boito diaaluo penu boli u hitua-tuawua ngopohia botu mohelu duluo. Boboo-tuwaalo boito mapilopo tuwotio mao̒ teto lei Musa to Hui̒dee Sinai, tou̒ Eeya lohutu daantia wolo bangusa lo Isirai̒lu towakutu timongolio todelomo nonao̒ limongolio lonto Masiri ode lipu lo Kanaa̒n.

¹⁰ Tou̒ mongo iimamu yilumualai lonto Bele lo Eeya boito debolo bele boito malopolu mai wolo heengo.

¹¹ Heengo boito hei̒nta-intaawa lo odudaa̒ owoluo lo Eeya tilinggula mongo iimamu boito diilalo loo̒ tuwotao̒ u loponao̒ lotuugasi limongolio.

¹² Oditolio malodua̒ mola tei Salomo, ualio mao̒, “Eeyaalo talo potambati mato lodulahu tohulungo, yaa Eeya. Bo Eeya lebe ohilaa motibiluloa̒ todelomo odio̒lomo heengo.

¹³ Botia bilongu mao̒ lowatotia ode Eeya hudungu u oontonga moo̒linggolabu, duo̒lo tambati potibiluloa̒ lo Eeya ohiheo-hiheolo mao̒.”

Pidato li Olongia Salomo to ulipu

¹⁴ Lapatao̒ lodua̒ mola, ti Olongia Salomo lopalingga mota ode ngoilanggubu ulipu tadonggo hitihula teto, tulusi helo molohone balakati lo Allahu Taa̒ala ode limongolio.

^15-16 Tio loloi̒ya, “Muloololio mai Eeya malodanti ode liyamo watotia Dauda odie, ‘Anggadu Wau̒ lodelo umati-U̒ yilumualao̒ lonto Masiri diaaluo penu boli tuwau mao̒ kota u tilulaotu-U̒ lowali tambati tou̒toonu u musi pomongulalo bele duo̒lo tambati poi̒baadatiala ola-U̒. Bo yio̒, Dauda, tilulaotu-U̒ u mopoa̒hu mao̒ umati-U̒.’ Ilopujialo mola Eeya Allahu Taa̒ala lo Isirai̒lu tamalo eelai danti-Lio boito!”

¹⁷ Wumbutio mola tei Salomo loloi̒ya mao̒, “Tiyamo watotia Dauda malo laanjana u momongu bele tambati poi̒baadatiyala ode Eeya Allahu Taa̒ala lo Isirai̒lu.

¹⁸ Bo Eeya lotahuda mai olio, ‘Makusudumu boito mopiohu.

¹⁹ Bo, diila yio̒, bo walau̒mulo tamaa momongu bele-U̒ boito.’

²⁰ Botia Eeya malo eelai danti-Lio. Wau̒ malowali olongia lo Isirai̒lu lobuulota woliyamau̒, wau wau̒ malo mongu bele ode tambati poi̒baadatiyala ode Eeya, Allahu Taa̒ala lo Isirai̒lu.

²¹ To delomo Bele lo Eeya boito mapilo dapatou̒ tambati ode Bulua Daantia u tuatuanga botu daantia towolota lo Eeya wolo loluuhurunto tou̒ Eeya lodelo olimongolio yilumualao̒ lonto Masiri.”

Dua̒ lei Salomo

²² Lapatao̒ uito, totalu ulipu tawoluo, tei Salomo tilimihula lotitalu ode mesba tulusi lomintaa̒a mola uluu̒lio duuduluo

²³ wau lodua̒, “Yaa Eeya, Allahu Taa̒ala lo Isirai̒lu! To hulungo meaambo todunia diaaluo tadebo odelo Eeya! Eeya loe̒elai danti lo Eeya wau helo poi̒laalo ponu lo Eeya ode umati lo Eeya tadebo molotolo hilao wau modungohe wolo lealeaatu lohilao to Eeya.

²⁴ Eeya malo eelai danti lo Eeya odeliyamo lowatotia Dauda. Wolo u pilodanti mai lo Eeya boito mapilo ponao̒ lowatotia todulahee botie.

^25-26 Eeya olo malodanti mai oliyamo lo watotia deu̒ wonu waliilio mola tio̒otutua modungohe to Eeya debo odelo tio, yi mawoluo mai laito ngotaalio monto waliilio tamowali olongia to Isirai̒lu. Botia, yaa Eeya Allahu Taa̒ala lo Isirai̒lu, ambunguolo eelailo mai olo ngoa̒amila u mapilo danti lo Eeya odeliyamo lo watotia Dauda, wato lo Eeya boito.

²⁷ Bo, Yaa Allahu Taa̒ala, ambunguolo tingga otutu Eeya ohilaa motibiluloa̒ todunia botie? Penu boli hulungo ngoilanggubulo mao̒ diila tuheeto tanggalio ode Eeya, tidiyolo mao̒ bele poi̒baadatiala u bilongu lowatotia botie!

²⁸ Yaa Eeya, Allahu Taa̒ala lowatotia, watotia wato lo Eeya! Bo ambungolo dungohilo mai dua̒ lowatotia, wau ambunguolo pomataalo mai polohone lowatotia todulahee botie.

^29-30 Pohileaala dua̒ hui wau dulahu Eeya moduo̒lai bele botie u matilulaoto Eeya odelo tambati poi̒baadatiala ode Eeya. Pohileaala dua̒ monto tambati potibiluloa̒ lo Eeya tosologa Eeya modungohei wau mongambungu watotia wau umati lo Eeya wonu bolo mongowatotia motitalu mai ode bele botie wau modua̒ mola ode Eeya.

³¹ Wonu bolo tahingota-ngotawa mopo tuludeo̒ totala totaa wewo wau deloolio mai ode mesba lo Eeya todelomo bele poi̒baadatiala botie mai motadia deu̒ tio diila ototala,

³² yaa Eeya, ambunguolo patutilio Eeya modungoheo̒ to sologa wau momutoo̒ palakala lomongo wato lo Eeya botie. Ambunguolo hukuu-maniyalo mai tao̒totala motuuu̒de wolo huhutuulio wau lopatalo mai tadiila ototala.

³³ Wonu bolo umati lo Eeya Isirai̒lu olaahe lo mumuu-suulio sababu timongolio ilodusa, tulusi timongolio muli mohualinga ode Eeya wau mohurumati to Eeya odelo Eeya, lapatao̒ monao̒ mai ode bele poi̒baadatialo botie wau modua̒ mola momolohone ambungu ode Eeya,

³⁴ pohileaala dua̒ Eeya modungohe olimongolio tosologa. Pohileaala dua̒ Eeya mongambungu mai dusa umati lo Eeya botie, wau modelo olimongolio muli mohualinga ode lipu u mailudu mai lo Eeya ode loluuhuru limongolio.

³⁵ Wonu bolo umati lo Eeya ilodusa to Eeya wau Eeya mohukuumani mai olimongolio wolo diila mopo tuhutai didi, lapatao̒ timongolio molilihu monto dusa limongolio wau mohurumati to Eeya odelo Eeya, tulusi motitalu mai ode bele poi̒baadatialo botie wau modua̒ mola ode Eeya,

³⁶ potala monto sologa Eeya modungohe olimongolio. Wau ambungualo mai dusa umati lo Eeya Isirai̒lu wau olongia limongolio. Ambunguolo poo̒olata mai timongolio mohutu wolo u otutu. Lapatao̒ uito, yaa Eeya, potuhutalo mai didi ode lipu lo Eeya botie, lipu uiludu mai lo Eeya ode umati lo Eeya u lowali hakuulio ohiheo-hiheolo mao̒.

³⁷ Wonu bolo lipu botie odungga mai lo polobiti meaalo wembelo, wau pipii-lomulowalo antuluo lodupotaa mopatu, ngongoto pilomulo meaalo tuhuo lo bulita, meaalo wonu bolo umati lo Eeya tuhuo lomusu, meaalo tuhuo lo ngongoto,

³⁸ pohileaala dua̒ Eeya modungohe dua̒ limongolio. Wonu towolota umati lo Eeya Isirailu woluo uwolo suukali lohilao wau modua̒ mola ode Eeya sambela mopotalu mai lo uluu̒lio ode bele poi̒baadatialo botie,

³⁹ potala Eeya todelomo biluloa̒ lo Eeya tosologa modungohe boli mongambu wau motulungi mai olimongolio. Bo Eeyaalo tamotota tuango hilaa lo manusia. Sababu uito pohutuwalo mai timii̒du tau motuuu̒de wolo huhutuulio,

⁴⁰ alihu umati lo Eeya modungohe to Eeya laito ngotilonggadu timongolio hibiluloa̒wa tolipu uiludu mai lo Eeya ode loluuhuru lo mongwatotia.

^41-42 Wonu bolo ngotaalio lotau deli tolipu molamingo moo̒ dungoheo̒ tomimbihu odudaa̒ lo Eeya wau tomimbihu totoonulalo u moo̒linggolabu u mapilohutu mai lo Eeya to umati lo Eeya, lapatao̒ tio monao̒ mai ode bele poi̒baadatialo botie u mohurumati to Eeya wau modua̒ mola ode Eeya,

⁴³ pohileaala dua̒ monto biluloa̒ lo Eeya tosologa Eeya modungohe dua̒lio wau mopowoluo mai hihiilelio. Lou̒ odito totoonulalo bangusa to ngoilanggubu dunia moo̒onuhe to Eeya debo odelo umati lo Eeya Isirai̒lu. Timongolio mamotota mao̒ deu̒ bele u bilongu lowatotia botie yito tambati u poi̒baadatialo ode Eeya.

⁴⁴ Wonu bolo Eeya momalentao̒ umati lo Eeya u mopaatea moluwali musu, lapatao̒ penu boli tou̒toonu timongolio woluo, timongolio motitalu mai ode kota tilulaoto Eeya botie wau modua̒ mola ode mantahu bele botie u mabilongu lowatotia ode Eeya,

⁴⁵ pohileaala dua̒ tosologa Eeya modungohe dua̒ limongolio boito, wau mongohi mai olimongolio u moo̒haama toli mongolio.

⁴⁶ Wonu bolo umati lo Eeya ilodusa to Eeya – tutuulio tutu diaaluo penu boli ngotaa mao̒ tadiila ilodusa – lapatao̒ sababu omuluka lo Eeya piloluli mao̒ lo Eeya timongolio ilolaahe lomusu, wau dilelo lomusu odelo tawalo ode lipu tuwau u molamingo meaambo membidu,

⁴⁷ pohileaala dua̒ Eeya modungohe dua̒ limongolio. Wonu bolo tolipu boito timongolio mololaa mao̒ duduu-sawaalo limongolio, wau modua̒ mola ode Eeya sambela motolongaku mao̒ deu̒ timongolio mailodusa wau helohutu u moleeto, ambunguolo dungohilo mai dua̒ limongolio, yaa Eeya.

⁴⁸ Wonu bolo tolipu boito timongolio wolo ihilasi wau tio̒otutua mololaa mao̒ duduu-sawaalo limongolio, wau modua̒ mola ode Eeya sambela motitalu ode lipu botie uiludu mai lo Eeya ode loluuhuru lo mongowatotia, ode mantahu kota tilulaoto Eeya wau bele poi̒baadatialo u mabilongu lowatotia ode Eeya botie,

⁴⁹ yi monto biluloa̒ lo Eeya tosologa patutilio Eeya modungohe dua̒ limongolio wau momonu mai olimongolio.

⁵⁰ Ambungualo mai ngoa̒amila dusa wau ojuluhaka limongolio to Eeya, wau pohutuwalo mai mumuu-suuwaalo limongolio mopohutu lou̒ mpiohe olimongolio.

⁵¹ Timongolio yito umati lo Eeya lohihilao tamaa dilelo lo Eeya yilumualai lonto Masiri lipu tou̒toonu timongolio hesilii-kisaalio.

⁵² Pohileaala dua̒ Eeya, yaa Eeya Allahu Taa̒ala, laito mopoo̒ tuotai umati lo Eeya Isirai̒lu woli olongialio. Wau potala Eeya modungohe dua̒ limongolio timii̒du timongolio mongiibode mola mei̒ tuulungi to Eeya.

⁵³ Eeya, yaa Eeya Allahu Taa̒ala, Eeya malo lulaotao̒ olimongolio towolota lo totoonulalo bangusa u lowali umati lo Eeya lohihilao, debo odelo u mapilo tahuda mai lo Eeya odeli mongolio lotimbulude to wato lo Eeya Musa, tou̒ Eeya lodelo loluuhuru lo mongowatotia yilumualao̒ lonto Masiri.”

Dua̒ poheu̒to

⁵⁴ Odi-odieelo mola tei Salomo lodua̒ sambela helo tibongguhuu̒ totalu lomesba wolo uluu̒ bua̒bua̒adu pilotalulio mola ode yitaato. Lapatao̒ uito tio tilimihulao̒

⁵⁵ wau wolo suala daa̒ lomolohone balakati to Allahu Taa̒ala ode ngoa̒amila taa u hia̒mbua teto, ualio mao̒,

⁵⁶ “Ilopujialo mola Eeya tamalo podungga mai u aamani ode umati lo Eeya debo odelo u pilodanti mai lo Eeya lotimbulude olei Musa wato lo Eeya. Ngoa̒amila umopiohe u pilodanti lo Eeya mapilo mata-Lio mai.

⁵⁷ Pohileaala dua̒ Eeya Allahu Taa̒alanto pee̒-pee̒enta wolanto debo odelo Eeya pee̒-pee̒enta wolo loluuhurunto. Pohileaala dua̒ Eeya diila mololaa olanto.

⁵⁸ Pohileaala dua̒ Eeya mopowali mai olanto tau-tauwalo tadebo molotolo hilao to Eeya alihu ito ngoa̒amila tumumulo modudua̒ kahandaki lo Eeya wau modungoheo̒ ngoa̒amila butoo̒ wau palenta u mailohi mai lo Eeya ode loluuhurunto.

⁵⁹ Pohileaala dua̒ Eeya, Allahu Taa̒alanto, laito mamoe̒elai dua̒ wau polohone u mapilopo tunggulo lowatotia botie to Eeya. Pohileaala dua̒ Eeya laito mopobilohei omuura lo Eeya ode umati lo Isirai̒lu wau olongialio wolo mongohi mai olimongolio wolo u palaluo limongolio timii̒du dulahu.

⁶⁰ Lou̒ odito ngoa̒amila bangusa to dunia mamotota deu̒ bo Eeya lohihilaolo Allahu Taa̒ala, diaaluo tawewo.

⁶¹ Patutilio timongoli, umati lo Eeya laito tatapu wau molotolo hilao to Eeya, Allahu Taa̒alanto wau modungoheo̒ totoonulalo butoo̒ wau palenta lo Eeya debo odelo u pilohutu limongoli todulahee botie.”

Pongo saahalo Bele lo Eeya

⁶² Lapatao̒ uito ti Olongia Salomo wau ngoa̒amila taa u hia̒mbua teto helo podewo bake ode Eeya.

⁶³ Duo̒lo bake lo polodame tei Salomo helo podewo sapi dulo pulaa dulo lihu wau himba ngohetuto dulopulu lolihu. Odi-odieelo mola ti olongia wau ngoilanggubu ulipu lohutu mao̒ upacara pongo saahalo Bele lo Eeya.

⁶⁴ To dulahulo boito tei Salomo longosaaha mao̒ wimbihu huungo palepelo u totalu Bele lo Eeya boito. Lapatao̒ to palepelo boito tio helo podewo bake yilalango, bake lopale, wau tabo lo binatangi ode bake lo polodame. Ngoa̒amila boito pilodewolio teto sababu mesba lo porunggu mailaba kikiio̒ ode ngoa̒amila dewo boito.

⁶⁵ To Bele lo Eeya boito tei Salomo wau ngoilanggubu umati lo Isirai̒lu helohutu rameyangi Wombohe Duungo ngotilonggadu pitu hui mola. Mailaba daatalio jumulaa lotaa u helo tia̒mbu teto. Timongolio lonao̒ mai lonto madala ngoilamingo Dalalo Hamat totilayo demola sipatana lo Masiri to huliaalio.

⁶⁶ Todulahee owalulio tei Salomo helei̒ walinga totau-tauwala boito. Timongolio ngoa̒amilalo helomuji olio tulusi luli lohualingo ode bele limongolio wolo hilaa uwenga-wengahu, sababu ngoa̒amila balakati u mailohi mai lo Eeya ode wato lo Eeya Dauda wau ode bangusa lo Isirai̒lu umati lo Eeya.