BOHULO MONGO OLONGIA 7 - KITABI HABARI MOPIOHE

Bele biluloa̒ saaha li Olongia Salomo

¹ Tei Salomo lomongu olo bele biluloa̒ li olongia ode batangalio. Pilomongula bele biluloa̒ saaha li olongia boito hiheolio mopulaa tolo taunu mola.

^2-3 Tobele biluloa̒ li olongia boito tei Salomo helohutu huwali leidaa̒ u ilunte “Balai Oa̒ayua Libanon”. Tuu̒udio: hayai̒o wopato pulaa pato meeteri, tanggalio dulo pulaa dulo meeteri, wau langgatio mopulaa totolu wau ngoputu meeteri. Balai boito otolo jeejeri wolihi lonto ayu woohu Libanon; timii̒du jeejeri tilitangoa lou̒ wolihi mopulaa limo wau toitaatio pilopohulia ayu meaalo wawohu bula-bulawahu debo odelo tulalo datala towatopo bele lonto ayu woohu Libanon. Papaahulio pilohutu lonto ayu u tutuuwauwa wau helolau̒be ayu meaalo wawohu bula-bulawahu debo odelo tulalo datala towatopo bele boito.

^4-5 To dingingo ambahu oloihi wau olowala lobalai boito o tutuu-lowaalo: tolo deereti to dingingo u ngobako tataalua wolo tolo deereti to dingingo u wewolio. Lesi lo huhuu-hebuwaalo wau tutuu-lowaalio boito modeliilio tutulio wopato hayahaya.

⁶ Tei Salomo lomongu olo “Balai Wolihi Potoheto”. Hayai̒o lobalai boito dulo pulaa dulo meeteri wau tanggalio mopulaa totolu wau ngoputu lomeeteri. Totalu lobalai boito osulambe u owolihi potoheto wau otua̒du.

⁷ Balai uwewo yito “Balai Tambati Huhuloa̒ li Olongia” u ilunte olo Balai Bubutoo̒. Balai botie monto wumbato demola ayu meaalo wawohu bula-bulawahu debo odelo datala towatopo bele yilolude wolo ayu woohu Libanon. Tobalai botieelo tei Salomo helo mutuusani totoonulalo palakala lo bubutoo̒.

⁸ Tambati biluloa̒ lei Salomo pilohutu debo odelo huhuu-dunguwalo wewolio wau odungga to palepelo wewo towulea lo Balai Bubutoo̒. Duo̒lo dilelio, deu̒yito-yito ti puusili li olongia lo Masiri, pilomongula lei Salomo olo hudungu u tutuuwauwa.

⁹ Ngoa̒amila u bilongu boito, leituwoto palepelo udaa̒lio, monto pundasilio demola watopio, hepilohutu lonto botu u hipiohe. Boboo-tuwaalo boito pilopo dapatio to hepo ngau̒dela botu, wau hiluwongo lodudua̒ tuu̒dio; to wimbihu delomio wau wimbihu bulemengio pilopo payadio wolo halahadi.

¹⁰ Pundasi lo huhuu-dunguwalo boito pilohutu lonto boboo-tuwaalo u ohalaga. Boboo-tuwaalo boito woluo u totolu wau ngoputu lomeeteri hayai̒o, woluo olo u wopato meeteri.

¹¹ Toitaatio pilopohulia boboo-tuwaalo wewo u ohalaga wau hiluwongo lodudua̒ tuu̒dio, lapatao̒ tilau̒belio wolo ayu woohu Libanon.

¹² Dingingo meeseli palepelo lobele biluloa̒ saaha li olongia wau dingingo meeseli delomio to Bele lo Eeya wau dingingo meeseli lobalai to wimbihu talu Bele lo Eeya, tinggai tilitangoalio lou̒ ngooludu ayu woohu Libanon toitaato timii̒du tolo woludu botu.

Tuugasi lei Huram u mopo wimumuto Bele lo Eeya

^13-14 To kota lo Tirus woluo talolai̒ ngota tai̒lunte Huram. Tio tutuulio tutu ahali wau madadaata ilorasaalio todelomo hemohutu totoonulalo balangi lo porunggu u hidala-dalaala. Tiyamolio tamailate yito taulo Tirus wau olo ahali todelomo babaa-langiyalo porunggu. Tiilolio lonto suku Naputali. Ti Olongia Salomo malo poa̒hu tau mota lolutulai olei Huram u motitau̒wa to ngoa̒amila kalaja mohutu balangi lo poronggu. Oditolio tei Huram malonao̒ mai wau helo kalaja mao̒ wolo u pilohile lei Salomo.

Duluo wolihi leidaa̒ lo porunggu

¹⁵ Tei Huram helohutu mao̒ duluo wolihi lo porunggu u tinggai langgatio walu lomeeteri, linggarilio limo koma tolo meeteri, hulodu lo porunggulio pitu koma wopato sentimeeteri. Wowoo-lihiyaalo boito diila otua todelomio.

¹⁶ To wowoo-lihiyaalo boito tio helohutu mao̒ duluo tau̒wa lo wolihi lonto polunggu, langgatio tinggai dulo koma dulo meeteri

^17-20 modeliilio bunga baakungi ngoilanggata tuwau koma walu lomeeteri. Timii̒du tau̒wa lo wolihi boito hediladai wolo dulo jeejeri hungo lo dalima lonto porunggu. Ngoa̒amilalo woluo dulo hetuto hungo lo dalima totimii̒du tau̒wa lo wolihi. Lapatao̒ tei Huram lohutu mao̒ halamo rante lo porunggu wau pilopodutu toitaato wowoo-lihiyaalo boito. Woluo pitu halamo rante toitaato lotimii̒du wolihi, wau toitaato lohalamo rante boito olo woluo wumbato tuwau u hulu-hululo. Toitaato wumbato u hulu-hululo botieelo

^21-22 tataa-uwaalo lowolihi u modeliilio bunga baakungi boito pilopohuli to wowoo-lihiyaalo boito. Wowoo-lihiyaalo boito pilopo tambati totalu lohuhebu potuwotalo ode Bele lo Eeya – ngoputu to ambahu huliaalio, wau u wewolio to ambahu tilayo. U to ambahu huliaalio ilunte Yakhin, wau u to ambahu tilayo ilunte Boas. Odi-odieelo mola tei Huram lopoo̒ lapato helohutu wowoo-lihiyaalo boito.

Ginti lo porunggu

²³ Lapatao̒ tei Huram malohutu ginti tuwau lo porunggu u hulu-hululo, wolo tuu̒dio odelo odie mola: delomio dulo koma dulo meeteri, pilito huungio wopato koma wopato meeteri wau linggarilio mopulaa totolu koma dulo meeteri.

²⁴ To biihio palipalito ambahu bulemengio diladai wolo dulo jeejeri hungo lolabu, u corocoro pee̒-pee̒enta wolo ginti boito.

²⁵ Ginti boito dilutulio toitaato wulea lo sapi porunggu mopulaa duluo – totolu talutalu ode tilayo, totolu ode huliaalio, totolu ode otolopa, totolu ode tiimuru.

²⁶ Hulodu ginti boito pitu lopulaa limo lo milimeeteri. Biihio ngorupa lo biihu manggo u loulou ode bulemengio hamahama bunga baakungi u oa̒oa̒abu. Ginti boito moo̒ detohe tanu wopato pulu lolihu liiteri.

Kakaa-letawaalo porunggu

²⁷ Tei Huram helohutu olo mopulu kaleta lo porunggu, tinggai hayai̒o tuwau koma walu lomeeteri, tanggalio tuwau koma walu lomeeteri, langgatio tuwau koma tolo meeteri.

²⁸ Kakaa-letawaalo boito tilitangoa lou̒ duduu-piyaalo hitutu-tuutua u pilopohuli todelomo lesi.

²⁹ To duduu-piyaalo boito diladai wolo paisaka singa, sapi wau malaikati opolipio̒. To leleesilio – toitaato wau towalungo gagaa-mbariyalo singa wau sapi boito – hintayanga paisaka buo̒hu bunga.

³⁰ Timii̒du kaleta boito oroda wopato lo porunggu wolo asi loroda lonto porunggu olo. To opato tutulo kaleta boito owolihi polumude basi lo porunggu wolo dadai buo̒hu bunga to ambahu bulemengio.

³¹ To wimbihu yitaato lo opaato wolihi polumude boito pilowumbuto lolesi tuwau hulu-hululo u polumude basilio. Wowoo-lihiyaalo polumude boito wuduwudu ngoilanggato wopato pulaa pato sentimeeteri toitaato dupi hitutu-tuutua boito, wau dulo pulaa dulo sentimeeteri to walungio. To tunggilo lesi boito opaisaka.

³² Langgato roroodalio wolomo pulaa wolomo sentimeeteri; dudutuulio towalungo duduu-piyaalo. Asi lo rodaalio wolo kaletaalio debo odelo ngotayadu.

³³ Roroo daalio boito ngorupa wolo roda kaleta lo popaatea; linggari lo roda, tataa-laliyaalo, asi wau wibuo̒ tarali lo rodaalio ngoa̒amilalo hepilohutu lonto porunggu.

³⁴ Woluo wopato wolihi polumudu totimii̒du tutulo wimbihu walungo kaleta boito. Wowoo-lihiyaalo boito debo odelo ngotayadu wolo kaletaalio.

³⁵ To palito wimbihu yitaato lokaleta boito obiihio ngotanggalo dulo pulaa dulo sentimeeteri. Wolihi polumudio wau duduupilio ngoa̒amilalo debo odelo ngotayade wolo kaletaalio.

³⁶ Wowoo-lihiyaalo polumudu wau duduu-piyaalo boito hediladai wolo gaambari malaikati opolipio̒, singa, wau bungo lo ombulo penu boli tou̒toonu wambai̒o otambati u koosongi woleeto, diludua̒ lobuo̒hu bunga to palitio.

³⁷ Odi-odieelo mola dudelolio lo kakaa-letawaalo boito hepilohutu. Ngoa̒amilalo ngorupa – modeli wau tuu̒dio.

³⁸ Tei Huram helohutu olo mopulu basi leidaa̒, ngobasi ode timii̒du kaleta. Timii̒du basi boito opilito to huungio tuwau koma walu lo meeteri wau moo̒ detohe walu lohetuto liiteri taluhu.

³⁹ Tei Huram helo podutu mao̒ limo kaleta to ambahu huliaalio Bele lo Eeya, wau limo to ambahu tilayo. Ginti lo poronggu pilodutulio mao̒ to tutulio ambahu tonggara.

Limbui̒o lo daputali powimumuto Bele lo Eeya

^40-45 Tei Huram helohutu olo bubuu-longgowalo, sisii-kopuwalo wau mamaa-nggowaalo. Lapatao̒ uito maa yilapatoolo mola ngoa̒amila kalajaalio odeli Olongia Salomo duo̒lo Bele lo Eeya. Utieelo powimumuto u hepilo hutulio mao̒: Duluo wolihi leidaa̒ Duluo tau̒wa lo wolihi modeliilio manggo u dilutulio toitaato lo wolihi duluo boito Walamo rante totimii̒du tau̒wa lo wolihi Wopato hetuto dalima lo porunggu u siluu-sungilio todelomo dulo jeejeri topalito walamo rante totimii̒du tau̒wa lo wolihi Mopulu kaleta Mopulu basi leidaa̒ Ginti lo porunggu Mopulaa duluo sapi lo porunggu u helo lumude ginti boito Bubuu-longgowalo, sisii-kopuwalo wau mamaa-nggowalo. Ngoa̒amila powimumuto ode Bele lo Eeya boito, upilohutu lei Huram odeli Olongia Salomo, hepilohutu lonto porunggu, wau ilii̒talio tunggula lolilingga.

⁴⁶ Ti Olongia lei̒hutu mao̒ babaa-langiyalo boito to tambati hepo ngocorowalo logamu towolota lo Sukot wau Sartan to Lumbaya Yordan.

⁴⁷ Tei Salomo diila helei̒ timenga babaa-langiyalo porunggu boito, sababu malo odito daatalio. Oditolio, buheeto babaa-langiyalo boito diila otaawa.

^48-50 Ti Olongia Salomo helei̒hutu olo totoonulalo powimumuto wewolio lonto hulawa ode Bele lo Eeya. Utieelo totoonulalo powimumuto u pilohutulio boito: Mesba Meja ode roti upodewolo ode Allahu Taa̒ala Mopulu oa̒ato tohe upilopo tambati totalu lo Huwali Leidaa̒ Laba-labaalo mantali, deu̒yito-yito limo to ambahu huliaalio wau limo to ambahu tilayo Bubuu-ngawaalo Totoo-heyaalo Tutuu-pitowaalo Mamaa-nggowaalo Pakaakasi pomateaalo tohe Momoo-kuwaalo Pipii-nggeyalo ode dupa Pipii-nggeyalo ode bohu Ee̒eng-seliyaalo ode huhebu lo Huwali Leidaa̒ Laba-labaalo mantali wau huhuu-hebuwaalo bulemengo Bele lo Eeya.

⁵¹ Lapatao̒ ti Olongia Salomo yilapato lomongu mola Bele lo Eeya, tio lolahu mao̒ todelomo yiyii-bungowalo bele boito ngoa̒amila talaa̒, hulawa, wau babaa-langiyalo wewo u mapilodewo lei Dauda tiyamolio ode Eeya.