BOHULO MONGO OLONGIA 6 - KITABI HABARI MOPIOHE

Tei Salomo lomongu Bele lo Eeya

¹ Tei Salomo lolumulo lomangu Bele lo Eeya tohulalo Jiw, deu̒yito-yito tohulalo oluolio, todelomo taunu opatio lo pamalentalio, wopato hetuto walu lopulu lotaunu mola lapatao̒ bangusa lo Isirai̒lu lololaa mao̒ Masiri.

² Tuuu̒du Bele lo Eeya, to wimbihu delomio yito odelo odie mola: hayai̒o dulo pulaa pitu lomeeteri, tanggalio tio lomeeteri, wau langgatio, mopulaa totolu wau ngoputu lomeeteri.

³ To wimbihu talu Bele lo Eeya boito obalai u hayai̒o wopato wau ngoputu lomeeteri wau tanggalio tio lomeeteri, ngotanggalo bele boito olo.

⁴ To dingingo meeseli lobele boito o huhuu-wangowalo tutuloa u motanggalo ode delomio.

⁵ To palito wimbihu wulea lobele boito, to dingingo meeseli ambahu bulemengio bilongulio huhuu-waliyaalo obelebelea. Woluo totolu bele-belealio, tinggai ngilanggato dulo koma dulo meeteri.

⁶ To belebelea bohulio, tanggalo timii̒du huwaliilio dulo koma dulo meeteri, to belebelea oluolio dulo koma pitu lomeeteri wau to belebelea otolulio tolo koma tuwau lomeeteri. Dingingo meeseli to belebelea towalungo lebe mohulodeo̒ wolo belebelea u toitaatio, tilinggula babaa-lakiyaalo lohuwali poduhenga boito mowali wumbutalo wolo dingingo meeseli Bele lo Eeya boito lou̒ diila momuwango dingingo meeseli boito.

^7-10 U babaa-lakiyaalo boito hepilakea ayu woohu lo Libanon. Huhebu lo huhuu-waliyalo poduhengo to belebelea towalungo maito to ambahu huliaalio, wau wonu ode belebelea oluolio wau otolulio otutua̒du bilibidu. Lapatao̒ tei Salomo lopohuli mao̒ papaa-huwaalo bele boito. Woleeto tio helomake ayu meaalo wawohu u pilopohuli bula-bulawahu debo odelo tulalo datala towatopo wau dupi lonto ayu woohu Libanon. Ngotilonggadu Bele lo Eeya boito hebongulola, sama-samaata diila odungohe tingohu duuduo̒, bulingo meaalo pakaakasi wate, sababu boboo-tuwaalo u pilomake pilomongula hudungu boito mapilohetu leimulo tou̒ donggo hepaya-payangolio. Odi-odieelo mola tei Salomo helomongu Bele lo Eeya boito tunggula yilapato.

¹¹ Yi malo tahuda mai Eeya odelei Salomo,

¹² “Wonu yio̒ modungoheo̒ ngoa̒amila butoo̒ wau palentaa-U̒, yi Wau̒ mamopohutu mai olemu wolo umapilo danti-U̒ ode liyamamu Dauda.

¹³ Wau̒ mamo tibiluloa̒ todelomo bele u bongulomu botie tohuungo umati-U̒ Isirai̒lu. Wau̒ diila tamololaa olimongolio.”

Papaa-kakaasiyalo Bele lo Eeya

¹⁴ Odieelo mola tei Salomo helo poo̒lapato pomongulalo Bele lo Eeya boito:

¹⁵ Ngoilanggubu dingingo meeseli wimbihu delomio yiloludelio wolo ayu woohu Libanon, tumulalo mao̒ monto wumbato demola papaa-huwaalo. Wumbatio pilohutu lonto ayu woohu biasa.

¹⁶ To delomo bele boito, towimbihu wulea pilohutua huwali wolo lopohuli mao̒ dingingo pomua̒ monto ayu woohu, tumulalo mao̒ monto wumbato demola papaa-huwaalo. Huwali boito iluntelio Huwali Leidaa̒ Laba-labaalo mantali; hayai̒o tio lomeeteri.

¹⁷ Huwali Leidaa̒ totalu lo Duledehu Laba-labaalo mantali boito iluntelio Huwali Leidaa̒, wau hayai̒o mopulaa walu lomeeteri.

¹⁸ Dingingo meeseli wimbihu delomio ngangaawaa̒lo mao̒ lobele boito yiloludelio wolo ayu woohu Libanon, tilinggula boboo-tuwalo dinggingo meeselilio diila oontonga sama-samaata. Woludio boito hediladai wolo paisaka hungo lolabu wau bubuu-ngawalo hio̒a̒abe.

¹⁹ Huwali Leidaa̒ Laba-labaalo mantali upilohutu todelomo Bele lo Eeya boito pilohetu mao̒ ode Bulua Daantia lo Eeya.

^20-22 Huwali Leidaa̒ boito hayai̒o, tanggalio, wau langgatio tutuuwauwa, deu̒yito-yito tio lomeeteri. Mesba totalu lo Huwali Leidaa̒ Laba-labaalo mantali boito pilohutu lonto ayu woohu Libanon. To huhebu potuwotalo ode huwali leidaa̒ boito bua̒bua̒adu rante hulawa. Ngoa̒amila wimbihu delomio Bele lo Eeya boito leituwoto Huwali Leidaa̒ Laba-labaalo mantali wau mesbalio heilolude wolo hulawa tutu.

²³ To delomo Huwali Leidaa̒ Laba-labaalo mantali boito dilutua olo duluo bui̒ malaikati opolipio̒ upilohutu lonto ayu jaitun. Duluo bui̒ boito langgatio tinggai wopato koma wopato meeteri;

^24-26 tuuu̒du wau moodeliilio tutuuwauwa. Tinggai opolipio̒ duluo, timii̒du polipio̒ boito hayai̒o dulo koma dulo meeteri. Antade towolota loduluo huudu polipio̒ monto timii̒du bui̒, wopato koma wopato meeteri.

²⁷ Duluo bui̒ boito pilopodutu pipiipide todelomo Huwali Leidaa̒ Laba-labaalo mantali tilinggula polipio̒ ngopata monto timii̒du bui̒ boito tenggu-tenggula to dingingo, wau polipio̒ u wewolio tinggai tenggu-tenggula tohuungo huwali leidaa̒ boito.

²⁸ Duluo bui̒ malaikati opolipio̒ boito yiloludelio wolo hulawa.

²⁹ Ngoilanggubu dingingo wimbihu delomio Bele lo Eeya he pilakealio wolo paisaka lo mamaa-laikatiyalo opolipio̒, bubuu-ngowaalo ombulo, wau bubuu-ngawaalo.

³⁰ Wumbato todelomo Bele lo Eeya boito ngoa̒amilalo yilolude wolo hulawa.

³¹ To huhebu potuwotalo ode delomo Huwali Leidaa̒ Laba-labaalo mantali boito pilopohulia duluo duungo huhebu lonto ayu lo jaitun. Koosengi lohuhebu boito towimbihu yitaato moodeliilio loulou daa̒ tohuungio.

³² Duungo huhebu duuduluo boito hepilakea paisaka malaikati opolipio̒, bungo lo ayu ombulo wau bubuu-ngawaalo u hio̒oa̒be. Duungo huhebu, bui̒ malaikati opolipio̒ wau paisaka bubuu-ngowaalo ayu ombulo, ngoa̒amilalo heilolude wolo hulawa.

³³ To huhebu potuwotalo ode delomo huwali leidaa̒ totalu, deu̒yito-yito huwali leidaa̒ daa̒, upilopohuli lesi lohuhebu lonto ayu jaitun, u moodeliilio tutulio wopato hayahaya.

³⁴ Wau pilohutua olo duluo duungo huhebu lonto ayu woohu biasa, u tinggai mowali helupiolo.

³⁵ Duduu-ngowaalo huhebu boito hediladai wolo paisaka hio̒oa̒be, bungo lo ayu ombulo wau bunga hio̒oa̒be. Ngoa̒amila paisaka boito hiwolude hulawa.

³⁶ Totalu Bele lo Eeya boito pilohutua palepelo delomio. Palepelo boito pilalita lo dingingo meeseli u hiwolu-wolude: toitaato lo timii̒du tolo wolude botu, woluo ngoolude ayu woohu Libanon.

³⁷ Pundasi Bele lo Eeya boito pilopohuli tohulalo Jiw, deu̒yito-yito hulalo oluolio, todelomo taunu opatio pamalenta lei Salomo.

³⁸ Wau tohulalo Bul, deu̒yito-yito hulalo opulaa walu, todelomo taunu mopulaa tuwau pamalentaalio, mailapato Bele lo Eeya boito bilongu lei Salomo, lotuuhatawa debo odelo u mailanjana mao̒. Pilomongula bele boito pitu lotaunu mola hiheolio.