BOHULO MONGO OLONGIA 5 - KITABI HABARI MOPIOHE

Tei Salomo dapa-dapato u momangu Bele lo Eeya

¹ Tei Hiram, olongia lo Tirus, laito hemo tamania wolei Dauda. Tou̒ tei Hiram loo̒dungohe deu̒ tei Salomo malowali olongia lobuulota wolei Dauda, tiyamolio, yi tio lolao utolio odelei Salomo.

² Lapatao̒ tei Salomo olo malolao tahuli botie odelei Hiram,

³ “Olongia Hiram Taa Molamahu! Tantu otaawa li Tuani deu̒ tiyamo lowatia Dauda laito bolo pakusa hemopaatea sababu hetuhuo lomusu lonto lilii-puwaalo topalito lamiaatia. Wau sababu Eeya diipo helongohi u moo̒haama olio to ngoa̒amila musulio, yi tio diipo ilohiango lomongu hudungu tambati poi̒baadatiala ode Eeya Allahu Taa̒alaalio.

⁴ Bo botia Eeya Allahu Taa̒ala lowatia malongohi u aamani to ngoilanggubu madala tokawasa lowatia. Watia diila omusu, wau diaaluo olo baala u leidungga mai ode lipu lowatia.

⁵ Eeya malodanti mai odie ode liyamo lowatia Dauda, ‘Walau̒mu talolai̒ tamaa puduo̒o-U̒ mowali olongia mubuulota wolemu tamaa momangu tambati poi̒baadatiala ola-U̒.’ Sababu uito, Tuani Hiram Taa Molamahu, watia, Salomo, malolantu u momangu hudungu boito.

⁶ Ti Tuani malo maa̒lumu deu̒ towolota ulipu lowatia diaaluo tamotota moluode bungo lo ayu debo odelo ulipu li Tuani. Sababu uito, watia momolohone potala ti Tuani mopoa̒hu mai tau-tauwalo li Tuani moluode bubuu-ngowaalo ayu woohu Libanon ode laatia. Ulipu lowatia maa̒hula lowatia u momantu olimongolio, wau boli ngoolo mao̒ wuupa u tantuo mai li Tuani ode tau-tauwalo li Tuani boito, de watia tamo maayali mao̒.”

⁷ Tei Hiram sanangi daa̒ tou̒ lololimo mao̒ habari boito. Oditolio tio malo loi̒ya, “Ilopujialo mola Eeya todulahee botie, sababu Eeya longohi mai odelei Dauda ngotaalio lowalao̒ talolai̒ tamolinepo daa̒ u lowali olongia to bangusa u hulinta boito.”

⁸ Lapatao̒ tei Hiram malolao totametio botie odelei Salomo, “Watia malo lolimo habari pasali lo hihiile li Tuani, wau watia dapa-dapato mopoo̒polu mao̒ hihiile li Tuani. Watia mamo pohetu mao̒ ayu woohu lo Libanon biasa tutuuu̒de wolo hihiile li Tuani.

⁹ Tau-tauwala lowatia mamodelo ayu boito motuhuta mola monto Libanon ode deheto. Mota teto babaa-tangowalo ayu boito maa awadu mao̒ limongolio mowali hei̒ta wau mapeelihu limongolio motiduluhe pentadu ode tambati u tantuo mao̒ li Tuani. Mola teto hehee itawaalo boito demaa onggalolo wau wuduwola ode tau-tauwalo li Tuani u wumbutio mola. Monto ambahu oli Tuani, pohile lowatia alihu ti Tuani mopohetu mao̒ ua̒alo ode tau-tauwalo ngotuango bele biluloa̒ saaha li olongia laatia.”

¹⁰ Yi tei Hiram malongohi odelei Salomo ngoa̒amila ayu woohu lo Libanon wau ayu woohu biasa u pilaralulio.

¹¹ Wau u mongohi mao̒ ua̒alo totau-tauwalo ngotuango bele biluloa̒ saaha li olongia Hiram boito, timii̒du taunu tei Salomo hemohudu mao̒ odelei Hiram tolo hetuto dulo pulaa dulo lihu limo lohetuto kilo pale wau wopato lihu wopato hetuto liiteri winulo jaitun tutu.

¹² Eeya loe̒elai danti-Lio wau helongohi tinepo odelei Salomo. To wolota lei Hiram wolei Salomo owumbuta u mopiohu, wau timongolio duulota malohutu daantia.

¹³ Ti Olongia Salomo helo tiangai lotia̒mbu tolo pulu lolihu lota mongo lolai̒ lonto ngoilanggubu Isirai̒lu helo kalaja pakusa,

¹⁴ wau lomudua̒a olei Adoniram lowali tamoo-ngimatoa olimongolio. Tei Salomo helo layadeo̒ olimongolio tolo polemboa̒, tinggai tilitangoalio lou̒ mopulu lihu lota. Otolu polemboa̒ boito tinggai tutuuloa̒ ngohula mola motibiluloa̒ to Libanon wau dulo hula mola tobele.

¹⁵ Tei Salomo olo helo tiangai lotia̒mbu walu lopulu lihu lota taa u momaahati botu monto hui̒dee wau pitu lopulu lihu lota taa u helomota boboo-tuwaalo boito.

¹⁶ Tio helo mudua̒a tolo lihu wau tolo hetuto lota manduru u mongimato mao̒ kalaja boito.

¹⁷ To palentaalio olo timongolio helo maahati mao̒ boboo-tuwaalo leidaa̒ u hipiiohe duo̒lo pundasi Bele lo Eeya.

¹⁸ Odi-odieelo mola tau-tauwalo lei Salomo wolei Hiram helo kalaja wau tau-tauwalo lonto kota Gebal helo pohetu mao̒ botu wau ayu u pomangulalo Bele lo Eeya boito.