BOHULO MONGO OLONGIA 4 - KITABI HABARI MOPIOHE

Mongo pogawee lei Salomo

¹ Tei Salomo malowali olongia to ngoilanggubu lipu lo Isirai̒lu.

^2-6 Uti-utieelo tahi laia̒awa lo ulipu tahe piludui̒o lei Salomo: Mongo iimamu: Jadok, Ajarya walae̒e Jadok, Abyatar Dulutuli lolipu: Elihorep wolei Ahia, deu̒yito-yito mongo walae̒e Sisia Tamoo-ngurusia doi lolipu: Yosapat walae̒e Ahilud Eyaanggu diti lo popaatea: Benaya, walae̒e Yoyada Tamoo-ngimatoa tomongo uhuuhu: Ajarya walae̒e Natan Tamoo-nasehatia li olongia: Iimamu Jabud, walae̒e Natan Tau̒wa lou̒ ngaalaa̒ lobele biluloa̒ saaha li olongia: Ahisar Tau̒wa lo tamoo-kalajaawa pakusa: Adoniram, walae̒e Abda.

⁷ Tei Salomo helo mudua̒a uhuuhu mopulaa duulota to ngoilanggubu lipu lo Isirai̒lu. Tuugasi limongolio yito mohimoa̒ balangi lou̒ aalo monto madala limongolio odeli olongia wau ngotuango bele biluloa̒ saaha li olongialio. Timii̒du uhuuhu tutuuloa̒ timihulao̒ tosua̒li boito ngotilonggadu ngohula mola timii̒du taunu.

^8-19 Tamopulaa duulota uhuuhu boito hetilau̒wa longotaalio gubolonulu. Uti-utieelo tanggulo mongo uhuuhu wau madala to kawasa limongolio: Ben-Hur: madala hihui̒-hui̒dea lo Epraim Ben-Deker: kota Makas, Saalbim, Bet-Semes, Elon, Bet-Hanan Ben-Hesed: kota lo Arubot, Sokho, wau ngoilanggubu madala Heper Ben-Abinadab, dile li Tapat puusili lei Salomo: ngoilanggubu madala Dor Baana walae̒e Ahilud: kota Taa̒nakh, Megido, wau ngoilanggubu madala totili lo Bet-Sean, totili lokota Sartan to ambahu huliaalio lokota Yijreel demola ngoilamingo lokota Abel-Mehola wau kota Yokmeam. Ben-Geber: kota Ramot to Gilead, kakaa-mbunguwalo to Gilead haku lokaumu Yair wali lei Manasye, madala Argob to Basan; ngoa̒amilalo wolomo pulu kota duduulaa̒ upiloo̒ toheetio wolo biintengi wau papaa-langiyalo polunggu to huhuu-rubangilio madala lei Abinadab walae̒e Ido: madala Mahanaim lei Ahimaas, dile li Basmat puusili lei Salomo: madala Naputali lei Baana walae̒e Husa: madala Asyer, kota Alot lei Yosapat walae̒e Paruah: madala Isakhari lei Simei walae̒e Ela: madala Benyamin lei Geber walae̒e Uri: madala Gilead, u muloololio mai tokawasa lei Sihon olongia lo Amori, wau lei Og olongia lo Basan.

Odudaa̒ lo pamalenta lei Salomo

²⁰ Ulipu lo Yehuda wau Isirai̒lu daatalio debo odelo hungayo tobiihu pentadu. Timongolio o ua̒alo wau u yilumolo motuuheta wau tumu-tumula sanangi.

^21-25 Timii̒du ngaalaa̒ o ilengi lo angguru wau o ilengi lo ara. Ngotupa lo tutumulo lei Salomo ulipu to ngilanggubu lo Yehuda wau Isirai̒lu monto Dan demola Barsyeba hitumula lou̒ aamani wau maa̒amulu. Sababu ngoa̒amila olongia to ambahu otolopa lo Eperat taa̒aluku to olio, wau ngoa̒amila bangusa lonto lilii-puwaalo totili lo yilaidialio helo panggala wolio. Huta to ambahu otolopa lo Dutulaa Eperat lonto Tipsah tobiihu Dutulaa Eperat tulusi ode otolopa ode kota Gasa to Pilistin demola sipatana lo Masiri, ngoa̒amilalo tokawasa lei Salomo. Babaa-ngusawalo tolipu boito taa̒aluku to olio wau hemo mayali doi hulawa wau uwewolio mao̒ uwajibu pomayali odeli olongia. Babaa-langiyolo ua̒alo u hepalaluo lei Salomo yito limo lolihu labu moa̒aluti, mopulu lolihu liiteri labu bangganga, mopulu sapi lo lantunga, duluo sapi lohuta udatahu wau luasi, wau ngohetuto himba. Uwewo mao̒ leeto, olo buu̒lu, kiijangi, menjaangani wau binatangi opolipio̒ o oa̒ato duluo.

²⁶ Tei Salomo osuludadu mopulaa dulo lihu lota owadala wau wopato pulu lolihu lantunga duo̒lo wadala u modedea̒ kakaa-letaalio.

²⁷ Bubuulota ngotilonggadu ngohula mola, timii̒du uhuuhu mohudu mao̒ barangi lo u̒aalo odeli Olongia Salomo wau ode ngoa̒amila taa u moo̒tapu ua̒alo monto bele biluloa̒ saaha li olongia, tilinggula diila eepitalio totoonulalo u hitua-tuawua.

²⁸ Timii̒du uhuuhu boito olo hipongohia pale wau laato ode ngoa̒amila wadala lei Salomo, mopio wadala hetae̒yalo meaambo wadala lokaleta. Ua̒alo binatangi boito hedilelolio ode lalaa-ntungaalo wadala ngodaata u palaluwolo.

²⁹ Allahu Taa̒ala longohi mai hikimati olei Salomo, pongotota ulaba-labaalo, wau huhama u modelomo daa̒.

³⁰ To lilii-puwaalo ambahu tiimuru wau to Masiri diaaluo talebe motota wolio.

³¹ Tio otu-otutuulo mao̒ lebe motota daa̒ wolo ngoa̒amila tau. Tio mongilabota olei Etan taulo Ejrahi, Heman, Kalkol wolei Darda mongo walae̒e Mahol. Tanggulei Salomo lomasaahuru penu boli tou̒toonu to lilii-puwaalo topalito lo yilaidialio.

³² Woluo tolo lihu pohumaya wau lebe lou̒ ngolihu lahu u kilalaangilio.

³³ Tio mambo mobisala tomimbihu bubuu-ngowaalo ayu pipii-lomulowalo – monto bungo lo ayu woohu lo Libanon tunggula huo̒yoto hisop u hibutua to didii-ngingaalo botu. Tio helobisala olo tomimbihu bibii-natangiyalo, debo odelo humayaalio binatangi opolipio̒ o oa̒ato duluo, binatangi hia̒lapa wau tola.

³⁴ Mongo olongia to ngoilanggubu dunia loo̒dungohe pasali lo pongotota lei Salomo tilinggula timongolio helolao tau ode olio u modungoheo̒ olio.