BOHULO MONGO OLONGIA 21 - KITABI HABARI MOPIOHE

Ilengi lo angguru lei Nabot

¹ Totili lobele biluloa̒ li Olongia Ahab to Yijreel woluo ilengi lo angguru ngopita haku lotaa u ilunte Nabot.

² Todulahee tuwau tei Ahab loloi̒ya mao̒ odelei Nabot, “Wohiyalo mai olau̒ ilengi lo anggurumu boito, sababu ilengi boito totili lobele bilu loa̒ saaha li olongiyau̒. Wau̒ ohilaa mopomulo mao̒ lo sasaa-yoriyaalo teto. Yio̒ mamoo̒tapu ilengi ulebe mopioheo̒ odelo tuloi̒o, meaalo wonu yio̒ mohuto, wau̒ mamotali wolo halaga u paatuti.”

³ Tei Nabot lolametao̒, “Ilengi lo angguru botie pusaka li nenemoya lowatia. Domi Allahu Taa̒ala, watia diila mowali mongohi mao̒ odeli Tuani!”

⁴ Wolo hilaa ulee̒lee̒e wau yingoyingo sababu loo̒dungohe wolo uiloi̒ya lei Nabot olio, tei Ahab malo hualingo tulusi lotibalata to tambati lo potuluhelio wolo yili-yili ode u ngopita wau diila lohuto lolamelo.

⁵ Ti Isebel dilelio lonao̒ mota ode olio wau lohintu mao̒ “Yilongola yio̒ lee̒lee̒e? Yilongola yio̒ diila mohuto molamelo?”

⁶ Tei Ahab lolametao̒, “Wau̒ diila sanangi wolei Nabot. Pilohileu̒ olio alihu tio mopotali mai ilengi lo anggurulio to olau̒, meaala wau̒ moluloa̒a wolo ilengi lo angguru uwewo, wonu uitolo u kahandakiolio, bo tio diila mohuto!”

⁷ “Yio̒ olongia to Isirai̒lu!” loi̒ya mao̒ li Isebel. “Pobongulo botia wau polamelolo. Posanangia mola hilaamu, sababu wau̒ mamongohi mai ilengi lo angguru lei Nabot boito olemu!”

⁸ Yi tei Isebel malo luladeo̒ to tanggulo lei Ahab wau lopodutu mao̒ seeheli li olongia totuladee boito. Tuladee boito yilaolio ode mongo tau̒wa wau tahimuloa lo ulipu to Yijreel.

⁹ Uti-utieelo tuango tuladee boito, “Pomalalumu lomola alihu ulipu mopuasa, wau ahuli mao̒ timongolio motia̒mbu! To delomo dudunggaya boito wohia mao̒ odelei Nabot tambati potihuloa̒lo u huru-hurumati.

¹⁰ Ahuli mao̒ tamoleeto duulota motihuloa̒ tataalua wolio wau mopo tuludeo̒ olio deu̒ tio malo laa̒anati to Allahu Taa̒ala wau olongia. Lapatao̒ delowalo tio ode bulemengo kota, pai̒ya mao̒ tio wolo botu tunggula mate!”

¹¹ Palenta li Isebel boito hepilohutu lomongo tau̒wa wau tahimuloa lo ulipu to Yijreel.

¹² Timongolio helo pomalalumu mola alihu ulipu mopuasa. Lapatao̒ timongolio lopoa̒hu tau lotia̒mbu wau tei Nabot yilohia tambati u huru-hurumati.

¹³ Tamoleeto duulota lotihuloa̒ tataalua wolei Nabot, wau totalu lotaa dadaata timongolio helo potuludeo̒ olio deu̒ tio malo laa̒anati to Allahu Taa̒ala wau olongia. Sababu uito tio dilelolio ode bulemengo kota lapatao̒ hepilai̒ limongolio wolo botu tunggula yilate.

¹⁴ Habari pasali lo pilomatea olei Nabot yila-yilateelo mao̒ pilopo tunggulio odeli Isebel.

¹⁵ Lolamemeta tou̒ ti Isebel lololimo habari boito malo loi̒ya tio odelei Ahab, “Tei Nabot mailate. Botia ponao̒lo mota hamaalo mao̒ ilengi lo angguru boito udiila yinao potaliilio olemu.”

¹⁶ Tei Ahab hua̒a lonao̒ lohama ilengi lo anggurulio boito lowali hakuulio.

¹⁷ Lapatao̒ tahuda mai lo Eeya odelei Elia, nabi lonto Tisbe boito,

¹⁸ “Tei Ahab, olongia lo Samaria boito masaatia woluo to ilengi lo angguru lei Nabot wau ohilaa mohama ilengi boito mowali hakuulio. Oditolio, ponao̒lo odito mola,

¹⁹ wau potunggula mao̒ olio, deu̒ Wau̒ Eeya, lotahuda mai odie, ‘Malomate yila-yilateelo mao̒, boli lolambato! Sababu uito duhumu madilata lo apula totambati lo aa̒a-pulawaalo helo dilata duhu lei Nabot.’ ”

²⁰ Tou̒ tei Ahab loo̒onto olei Elia, tio malo loi̒ya, “Wuu musu, pulitio mao̒ yio̒ loo̒dungga olau̒!” “Otutu,” ualei Elia. “Sababu ti Tuani wolo neekati helohutu u moleeto to bibilohu Eeya,

²¹ yi uti-utieelo u pilotahuda mai lo Eeya odeli Tuani, ‘Wau̒ mamopo dungga mai baala ode olemu. Yio̒ mainggilo-U̒ mao̒, wau timii̒du mongo lolai̒ todelomo ngaalaa̒mu, panggola wau humula, malopuwa-U̒.

²² Ngaalaa̒mu mamowali debo odelo ngaalaa̒ li Olongia Yerobeam walae̒e Nebat wau debo odelo ngaalaa̒ li Olongia Baesa walae̒e Ahia, sababu yio̒ maloo̒ sababu taulo Isirai̒lu helohutu dusa tilinggula loo̒toodei omulukaa-U̒.’

²³ Wau tomimbihu oli Isebel, Eeya lotahuda mai deu̒ batangalio maa̒alo lo apula todelomo kota lo Yijreel.

²⁴ Tatoonu wambai̒o tamonto pongawaa̒ lou̒ ngaalaa̒mu tamaate tokota maa̒alo lo apula, wau tamaate to bulemengo kota maa̒alo lobulungi.”

²⁵ Diila pee̒enta mao̒ woluo taa uwolo neekati helohutu u moleeto to bibilohu Eeya debo odelo u hepilohutu lei Ahab. Ngoa̒amila ololeeto boito pilohutulio to wuntulo li Isebel dilelio.

²⁶ Tei Ahab helohutu duduu-sawaalo u hina daa̒: tio lolubo balaahala debo odelo u hepohutuo taulo Amori, deu̒yito-yito tau-tauwala tamaa pilopolahi lo Eeya yilumualao̒ lonto lipu lo Kanaa̒n tou̒ taulo Isirai̒lu tilumuotao̒ ode lipu boito.

²⁷ Lapatao̒ tei Elia yilapato lobisala, tei Ahab malo ngaidinga pakeyangilio wau lomake mao̒ kaingi kado odelo tuoto ololee̒lio, lapatao̒ lopuasa. Penu boli motuluhe olo tio helomake kaingi kado, wau wonu monao̒, bayalio wunu-wunula tulusi.

²⁸ Eeya lotahuda mai odeli Nabi Elia,

²⁹ “Wolo maa iloontongamu woloolo mola tei Ahab helo tidudapa lobatanga totalu-U̒? Sababu uito, Wau̒ diila tamopo dungga mai baala ngotilonggadu tio donggo tumu-tumulo. De tomaasa lowalai̒o mola bolo Wau̒ mopodungga mai baala boito ode ngaalaa̒lio.”