BOHULO MONGO OLONGIA 20 - KITABI HABARI MOPIOHE

Popaatea wolo Siria

¹ Tou̒ dulahee tuwau tei Benhadad, olongia lo Siria, helo ngaambu ngoa̒amila suludadulio, wau wolo tolo pulaa duulota olongia wewo wolo kaleta lo popaatea, wau wadala limongolio, tio helomala wau loluhu kota Samaria.

² Lapatao̒ tio lolao tau odelei Ahab, olongia lo Isirai̒lu, tokota boito wolo tahuli odie,

³ “Ti Olongia Benhadad mohile wolo moo̒ohuu̒ alihu yio̒ mohudu mai olio hulawa, talaa̒, mongo dilemu, wau mongo walau̒mu tahi lootola.”

⁴ Tei Ahab lolametao̒, “Polelea mao̒ odeli Olongia Benhadad deu̒ wau̒ akolo. Tio mowali motolahaku olau̒ wau totoonulalo milikiiu̒.”

⁵ Lapatao̒ mongo utolia boito luli lohualinga mola odelei Ahab lopo tunggulao̒ hihiile uwewo lonto olei Benhadad. Odie mola tingohio lo hihiile boito, “Omoo̒omolu ti olongia lamiaatia helohile wolo moo̒ohuu̒ alihu yio̒ mohudu mao̒ olio hulawa wau talaa̒ boli mongo dilemu wau mongo walau̒mu.

⁶ Bo botia tio mamolao mai mongo polowila u mogaledao̒ bele biluloa̒ li olongiyamu wau bele lomongo pogaweemu, boli mohama penu boli wolo wambai̒o u ilaanggapu limongolio ohalaga. Timongolio mamonao̒ mai odia loombu otanu to saa̒ati odie.”

⁷ Yi ti Olongia Ahab malo tiangai ngoa̒amila tau̒wa lo Isirai̒lu wau loloi̒ya mao̒, “Sakusia mao̒ limongoli lohihilao deu̒ tau botie ohilaa mopo topotala olanto. Tio lohile wolo moo̒ohuu̒ alihu wau̒ mohudu mao̒ mongo dileu̒ wau mongo walau̒u̒ boli hulawa talaa̒au̒ wau wau̒ diila mowali mopotouli hihiilelio wolo moo̒ohuu̒ boito.”

⁸ Mongo tau̒wa wau ulipu maloloi̒ya, “Diila mao̒ pandungia tio, Baginda! Diila mao̒ dudui̒ hilaalio.”

⁹ Sababu uito tei Ahab lolametao̒ tomongo utolia lei Benhadad boito odie, “Polelea mao̒ odeli Baginda, ti olongiyamu boito, deu̒ wau̒ akolo to hihiilelio wolo moo̒ohuu̒ u bohulio, bo hihiilelio u oluolio botie diila mowali akolowau̒.” Yi malonao̒ mongo utolio boito, lapatao̒ luli lohualingai odelei Ahab wau loloi̒ya mao̒,

¹⁰ “Ti Olongia lamiaatia mamolao mai dadaata daa̒ suludadu u mopoa̒ntulu mao̒ kotamu, tilinggula peaahuo̒ monto tutuhio lo kotamu boito mapoo̒ pulito limongolio bintao̒lio bo wolo uluu̒ limongolio. Tio lotadia alihu dedeewaalo mohukuumani mai, tumbao̒ momate olio mate-mateelo mao̒, wonu tio diila mopohutu mao̒ sua̒li boito!”

¹¹ Ti Olongia Ahab malo lametao̒, “Polelea mao̒ odeli Olongia Benhadad: Pajule u tutuulio tutu mamolaasa sanangi lapatio mao̒ mopaatea, diila tou̒ dipo-dipolulio mai.”

¹² Totameto lei Ahab boito pilopo tunggulio odelei Benhadad tou̒ tio pee̒-pee̒enta wolo mongo olongia wewo tamalowali waitio tou̒ donggo hipongiluma to kema limongolio. Loo̒dungohe uito tei Benhadad malo malentao̒ mongo polowilalio u motidapa-dapato molohu kota Samaria. Yi timongolio olo malo tidapa-dapato.

¹³ Tou̒ boito, ngotaalio lonabi lonao̒ mota odeli Olongia Ahab wau loloi̒ya mao̒, “Eeya lotahuda mai: ‘Iloontongamu suludadu dadaata boito? Wau̒ mamongohi olemu u moo̒haama toli mongolio todulahee botie. Yio̒ mamotota mao̒ deu̒ Wau̒lo Eeya.’ ”

¹⁴ “Tatoonu tamusi tuhuwolo meimulo?” yilintu mao̒ lei Ahab. Nabi boito lolametao̒, “Mongo pajule humula, tahi tunuhe tomongo uhuuhu. Oditolo tahuda mai lo Eeya.” “Wau tatoonu tamusi motitau̒wa tou̒ polotuuhua boito?” yilintu mao̒ li olongia poli. “Ti Baginda lohihilao,” tametao̒ li nabi boito.

¹⁵ Yi ti olongia lotiangai lotia̒mbu mongo pajule humula tahi tunuhe tomongo uhuuhu. Ngoa̒amilalo woluo dulo hetuto tolo pulaa duulota pajule. Lapatao̒ tio lohutu mao̒ u tutuuwauwa wolo suludadu lo Isirai̒lu. Ngoa̒amilalo woluo pitu lolihu lota.

¹⁶ Polotuuhua boito tilumulalio dulahu tou̒ tei Benhadad wau otolo pulaa duulota olongia talowali waitio boito donggo hipongiluma tunggula hiluwoa̒ todelomo kema limongolio.

¹⁷ Talomaju mota leimulo yito mongo pajule humula boito. Tau-tauwala tahe ilahulalio lei Benhadad mota lohehula musu, helo poduloheo̒ olei Benhadad deu̒ ngopolemboa̒ lo suludadu donggo hinao̒wa mai ode limongolio lonto mantahu lo Samaria.

¹⁸ Tei Benhadad lomalentao̒ alihu suludadu lomusu boito wau̒polo hitumula, diila paduli wolo timongolio monao̒ mai mopaatea meaalo mai modaamea.

¹⁹ Mongo pajule humula tatilingai lotia̒mbu li Olongia Ahab boito mai̒lu moloyoo̒ lonto kota lo Samaria, diludua̒ lo suludadu Isirai̒lu.

²⁰ Timongolio ngota-ngota helomate yila-yilateelo mao̒ musu tahe tilalualio. Tau-tauwalo Siria tilumetea̒, wau yililapita lotau Isirai̒lu. Bo tei Benhadad loo̒lahi. Tio tilumetea̒ wolo wadala tilunuhe lodengolo lota suludadu owadalalio.

²¹ Ti Olongia Ahab olo pee̒-pee̒enta ode tambati lo popaatea lapatao̒ helo poa̒antulu mao̒ kakaa-letaala lo popaatea wau helomate yila-yilateelo mao̒ wawaa-dalaalio. Todulahee boito taulo Siria he ilolaahelio laba-labaalo.

²² Lapatao̒ ti nabi boito lonao̒ mai odelei Ahab wau loloi̒ya mao̒, “Botia, opiohelio tituani mohualingo wau mopoo̒ toheetao̒ batanga wau mohutu lanjana u montapo, sababu ti olongia lo Siria mamonao̒ mai muli moluhu to sembo lapatio mao̒ sembo lo polohuhulo u talutalu mai.”

Polotuuhua oluolio lonto suludadu lo Siria

²³ Mongo polowila li Olongia Benhadad loloi̒ya mao̒ odelei Benhadad, “Ila-ila u hetuboo lobangusa Isirai̒lu okawasa to hihui̒-hui̒dea, uito sababuulio ito ilolaahe lobangusa boito. Bo ito tantu mowali mopoo̒laaheo̒ olimongolio wonu ito mopaatea todatahu moopa.

²⁴ Opiohelio botia ti Baginda motowoli mao̒ lohihilao tatolo pulaa duulota olongia boito wolo mongo polowila li Baginda lohihilao.

²⁵ Lapatao̒ patutilio ti Baginda motiangai motia̒mbu pasuukani ngou̒daa̒ pasuukani li Baginda tamaa ilolaahe mai boito, tilunuhe wolo wadala wau kaleta lo popaatea ngodaata debo odelo u muloololio mai olo. Ito mamoluhu bangusa lo Isirai̒lu boito todatahu moopa, wau pee̒enta botie ito tantulo mao̒ moo̒haama.” Ti Olongia Benhadad akolo, lapatao̒ malo dudua̒ naseehati lomongo polowilalio boito.

²⁶ To sembo lapatio mao̒ sembo lo polohuhulo u wumbutio mola tio lotianggai lotiambu suludadulio wau ulimoliyoo̒ ode kota Apek mota loluhu taulo Isirai̒lu.

²⁷ Taulo Isirai̒lu olo lopo wimumuto suludadulio wau lotiangai lotia̒mbu olimongolio. Lapatao̒ suludadu lo Isirai̒lu boito ilumoliyoo̒ lomaju todelomo dulo pasuukani wau lotikema tataalua wolo tau-tauwalo Siria boito. Wonu pobandingio mola wolo suludadu lo Siria taloo̒-loo̒opolo mola helo poo̒opolu lipu boito, pasuukani lo Isirai̒lu oontonga debo odelo himbala lobatade wambai̒o.

²⁸ Lapatao̒ malonao̒ ngotaalio lonabi odeli Olongia Ahab wau loloi̒ya mao̒, “Uti-utieelo u pilotahuda mai lo Eeya: ‘Sababu tau-tauwalo Siria boito helo lantobu deu̒ Wau̒ bo okawasa to hihui̒-hui̒dea wau diila todatahu moopa, yi Wau̒ mamongohi olemu u moo̒hama olemu to suludadu limongolio talaba-labaalo daatalio boito. Yio̒ wau ulipumu mamotota mao̒ deu̒ Wau̒lo Eeya.’ ”

²⁹ Ngotilonggadu pituhui mola taulo Siria wau taulo Isirai̒lu debo todelomo kema limongolio, tinggai tataalua. To dulahee opitulio bolo tilumula limongolio helo tutuuhua. To delomo popaatea boito taulo Isirai̒lu heloo̒pate yila-yilateelo mao̒ ngohetuto lihu lota taulo Siria.

³⁰ Tau-tauwalo tahe loa̒ahu, tilumetaa̒ ode kota Apek, bo dingingo meeseli lokota boito lolohubu lolambula to tadulo pulaa pitu lolihu lota towolota limongolio. Tei Benhadad olo lopolahi batanga ode kota boito wau lotituuo̒ tobele ngowale tohuwali wimbihu delomio.

³¹ Mongo polowilalio lonao̒ mai ode olio wau loloi̒ya mao̒, “Ualo tau, mongo olongia lo Isirai̒lu yito mongo olongia tao̒laasa tolia̒ngo. Sababu uito poluasiyalo mai amiaatia mola motaalua woli olongia lo Isirai̒lu wolo momake mao̒ kaingi kado odelo tuoto lou̒ pololee̒ wau tali tobuloo̒ odelo tuoto lou̒ taa̒aluku. Pohileaala dua̒ tio diila momate oli Baginda mate-mateelo mao̒.”

³² Yi timongolio olo malomake mao̒ kaingi kado wau tali tobuloi̒ mongolio, tulusi malonao̒ mola lotaalua wolei Ahab wau loloi̒ya mao̒, “Tei Benhadad yito wato li Baginda. Tio lomolohone mai alihu ti Baginda diila momate olio mate-mateelo mao̒.” Tei Ahab lolametao̒, “Donggo tumu-tumulo Tio, wutatuu̒ boito?”

³³ Memang mongo polowila lei Benhadad boito donggo hipohimawa tuoto u mopiohe monto olei Ahab. Oditolio, tou̒ tei Ahab loloi̒ya mao̒ “wutato”, yi timongolio lato lolametao̒, “Otutu, tei Benhadad yito wutati Baginda.” Lapatao̒ ualei Ahab, “Depita mai tio odia mai!” Tou̒ tei Benhadad leidungga mai, tei Ahab loheingao̒ olio lotitae̒ tokaleta.

³⁴ Lapatao̒ ualei Benhadad olio, “Watia mamopo walingai odeli Tuani kokoo-tawaalo u mahilama liyamo lowatia lonto oliyamo li Tuani. Ti Tuani olo mowali momongu mao̒ wibui̒o lo daahangi tokota Damusiki debo odelo u pilohutu liyamo lowatia to Samaria.” Ualei Ahab, “Dutadutaa̒ todanti li Tuani boito, watia mamo lopata oli Tuani.” Lapatao̒ uito tei Ahab malohutu daantia wolei Benhadad tulusi lolopata olio.

Nabi lo Eeya lopotala olei Ahab

³⁵ To palenta mai lo Eeya, ngotaalio lo nabi towolota lo ngopolemboa̒ nabi helo poa̒hu tamaniilio momate mao̒ olio. Bo tamaniilio boito diila lohuto.

³⁶ Lapatao̒ ti nabi boito loloi̒ya mao̒, “Sababu yio̒ diila modungohe palenta lo Eeya, yi yio̒ madangapo lo singa molamemeto tou̒ yio̒ mohualingao̒ monteea.” Otutu. Lolamemetao̒ tou̒ tio lonao̒ lonteeto, tio dilangapo singa tuwau.

³⁷ Lapatao̒ ti nabi boito lonao̒ mota ode taa wewo wau loloi̒ya mao̒, “Pateaalo mai watia!” Yi tau boito helomate olio loo̒ohuu̒ daa̒ tunggula pilalia.

³⁸ Lapatao̒ uito ti nabi boito lomolobani bayalio wolo kaingi ngopita, alihu diila oonuhe lotau, lapatao̒ tio mota tilimihulao̒ tobiihu dalalo u lohima oli olongia lo Isirai̒lu lumaodeo̒.

³⁹ Tou̒ ti olongia yilumaodeo̒, ti nabi boito longiibode olio, “Paduka Taa Molamahu, tou̒ watia donggo hemopaatea totambati lo popaatea, pajule ngota lodelo mai ode laatia musu ngota tailowau̒po. Pajule boito loloi̒ya mao̒, ‘Dahai mao̒ tau botie tio̒otutua. Wonu tio tumeteo̒, yio̒ musi pateelo mate-mateelo mao̒ mobuulota wolio meaalo momaayali tolo lihu doi talaa̒.’

⁴⁰ Bo lapatao̒ tou̒ watia donggo okalaja dadaata, tau boito tilumeteo̒.” Ti Olongia lolametao̒, “Yio̒ malo podehu mao̒ hukuumani lohihilao. Yio̒ musi momanta olio.”

⁴¹ Ti Nabi boito lomua̒deo̒ kaingi lo polobani lonto bayalio, lapatao̒ iloonuhe li olongia tio ngotaalio lo nabi.

⁴² Yi malo loi̒ya ti nabi boito odeli olongia, “Uti-utieelo upilo tahuda mai lo Eeya: ‘Taa u pilarentaa-U̒ mai alihu pateelo mate-mateelo mao̒ mailuliamu mao̒ loo̒lahi. Sababu uito yio̒ musi mate odelo tuloi̒o. Suludadumu mamoa̒ntulu sababu malo poluli suludadu lomusu loo̒lahi.’ ”

⁴³ Ti Olongia malo hualinga ode Samaria wolo hilaa lee̒lee̒e wau yingoyingo.