BOHULO MONGO OLONGIA 2 - KITABI HABARI MOPIOHE

Tataa-huliyaalo upulitio lei Dauda odelei Salomo

¹ Tou̒ mamembideo̒ mate, tei Dauda malo tiangai olei Salomo, walai̒o talolai̒, wau helongohi mao̒ tahuli u pulitio. Tei Dauda loloi̒ya mao̒,

² “Mawakutuulio wau̒ maa mate. Patutilio yio̒ yakini wau buheli.

³ Pohutua mao̒ wolo u piloa̒hu lo Eeya Allahu Taa̒alaamu olemu. Dungohi mao̒ ngoa̒amila butoo̒ wau palenta lo Eeya utula-tuladee todelomo buku lei Musa, alihu penu boli deu̒toonu ponao̒owamu yio̒ maa otilapulo todelomo ngoa̒amila tolopanimu.

⁴ Wonu yio̒ modungohe to Eeya, yi Eeya mamoe̒elai danti-Lio deu̒ waliiu̒ mola mamo malenta Isirai̒lu, asali timongolio wolo lealeaatu lohilao wau yiwa lealeaatu laito tatapu wau molotolo hilao modungohe totoonulalo palenta lo Eeya.

⁵ Donggo woluo poli sua̒li tuwau! Yio̒ tantu moo̒ eela mola wolo u mapilohutu lei Yoab olau̒ tou̒ lomate yila-yilateelo mao̒ polowila duulota lo Isirai̒lu, deu̒yito-yito tei Abner walae̒e Ner wolei Amasa walae̒e Yeter. Tio helomate yila-yilateelo mao̒ olimongolio tomaasa dame u lotuli pilomatea yila-yilateelo mao̒ u hepilohutu limongolio tomaasa lo popaatea. Tio helomate yila-yilateelo mao̒ taa u diila ototala bo botia wau̒lo tamusi momanta huhutuulio wau wau̒lo tamo dutolaa.

⁶ Naa, walau̒uu̒, yio̒ musi mohutu mao̒ olio modudua̒ wolo u anggapuomu mopiohe; bo diila mao̒ polulia tio mate wolo mopiohe.

⁷ Bo tomongo walao̒ talolai̒ lei Barjilai lonto Gilead yio̒ patutilio mopohutu mao̒ u mopiohe. Musi pongakuamu mao̒ u palaluo limongolio timii̒du dulahu, sababu timongolio malohutu u mopiohe to olau̒ tou̒ wau̒ malolahi lonto olei Absalom, wutatumu tamohuhula.

⁸ Tomimbihu olei Simei walae̒e Gera lonto kota Bahurim tomadala Benyamin, woluo olo tahuli olemu. To delomo nonao̒ou̒ ode Mahanaim, tei Simei boito muloololio mai helo laa̒anati olau̒ lou̒ diila omanusia. Bo lapatao̒, tou̒ tio mai lolutulao̒ olau̒ to Dutulaa Yordan, wau̒ lotadia mao̒ olio domi Eeya deu̒ wau̒ diila tamomate olio mate-mateelo mao̒.

⁹ Bo uti-utieelo tahuliu̒ olemu: diila mao̒ polulia tio beebasi monto hukuumani. Otaawau̒ yio̒ molinepo; oditolio, eleponu tio mapanggola, tolopania mao̒ tio alihu hukuu-maniyola mate.”

Tei Dauda yilate

¹⁰ Tou̒ tei Dauda yilate mao̒ tio yilobungio to Kota lei Dauda.

¹¹ Tio lowali olongia lo Isirai̒lu ngotilonggadu wopato pulu lotaunu mola: pitu lotaunu mola tio hulohuloa̒ to Hebron, wau tolo pulaa tolo taunu mola to Yerusalemu.

¹² Lapatao̒ tei Salomo lowali olongia lobuulota wolei Dauda tiyamolio. Okokawasa lei Salomo odelo olongia motoheeta daa̒.

Tei Adonia yilate

¹³ Tou̒ dulahee tuwau, tei Adonia lonao̒ odeli Batsyeba. Lapatao̒ ti Batsyeba malohintu olei Adonia, “Wolo nonao̒omu mai botie omakusudu u mopiohe?” “Saaya,” tametao̒ lei Adonia.

¹⁴ Lapatao̒ tio loduhengao̒, “Woluo hitua-tuawua u ohilaa pohile lowatia monto oli ibu.” “Wolo uito?” yilintu mao̒ li Batsyeba.

¹⁵ Tei Adonia lolametao̒, “Otaawa li Ibu deu̒ wawatiaalo patutilio mowali olongia; uito u hehaarapuo lo ngoilanggubu Isirai̒lu. Bo ulotoduo mai yito u bolii̒o mao̒; deu̒ tawali-yali lowatia talowali olongia, sababu makilahandaki lo Eeya odito.

¹⁶ Botia woluo tuwau hihiile lo watia, potala ti Ibu mololimo mao̒.”

¹⁷ “Wolo hihiilemu boito?” yilintu mao̒ li Batsyeba. Tei Adonia lolametao̒, “Watia momolohone deu̒ ti Ibu mohile mao̒ oli Olongia Salomo u mopoluasi olaatia modiilea woli Abisag, tadulahu lonto Sunem boito. Watia yakini deu̒ tei Salomo mamololimo hihiile li Ibu.”

¹⁸ “Ooo̒, mopiohulo,” tametao̒ li Batsyeba. “Wau̒ de mamobisala mao̒ woli olongia tomimbihu hihiilemu boito.”

¹⁹ Yi malonao̒ ti Batsyeba odeli olongia mota lobisala mao̒ tomimbihu hihiile lei Adonia boito. Ti Olongia tilimihula mola lolutulao̒ oliilolio wau losujudu totalulio, lapatao̒ luli lotiholoa̒a toitaato kadera li olongialio. Tulusi tio lei̒ dapato mao̒ kadera oliilolio to ambahu olowalalio.

²⁰ Tou̒ lotihuloa̒a mola, malo loi̒ya ti Batsyeba, “Ti Maama ohilaa mohile hitua-tuawua ukikiio̒ wambao̒ monto olemu. Harapuo li Maama tolimomu mao̒.” “Wolo uito, Maama?” yilintu mao̒ lei Salomo. “Watia akolo hihiile li Maama.”

²¹ Tametao̒ li Batsyeba, “Poluasia mao̒ tei Adonia mohuhulamu boito modiilea woli Abisag.”

²² “Yilongola ti Maama mohile sua̒li boito to olaatia?” yilintu mao̒ lei Salomo. “Uito tutuuwauwa wambao̒ wolo hihiile alihu watia musi mohudu mao̒ huhuloa̒a li olongia botie olio. Diila maatio tamohuhula lo watia? Donggo poli ti Iimamu Abyatar wolei Yoab helo tiwambao̒ to olio!”

²³ Lapatao̒ loloi̒ya odito malo tadia tei Salomo domi Eeya, “Huliaalo mai watia odungga laa̒anati lo Eeya, wonu diila mohukuumani mate olei Adonia sababu hihiilelio boito!

²⁴ Eeya malo poo̒otohetai huhuloa̒a li olongia liyamo lowatia, Dauda. Eeya malo eelai Danti-Lio wau malohudu mai bele biluloa̒ saaha li olongia botie olaatia wau wali mola lowatia. Watia motadia mai domi Eeya tatumu-tumulo deu̒ tei Adonia maamate to dulahulo botie!”

²⁵ Yi ti Olongia Salomo longohi mao̒ palenta olei Benaya, lapatao̒ tei Benaya malomate yila-yilateelo mao̒ olei Adonia.

Tei Abyatar yilinggilio wau tei Yoab yilate

²⁶ Lapatao̒ malo loi̒ya ti Olongia Salomo odeli Iimamu Abyatar, “Ponao̒lo ode kambungu pilohuluta loduhumu to Anatot. Yio̒ patuti hukuu-maniyola mate, bo todulahee botie wau̒ diila tamomate olemu mate-mateelo mao̒, sababu tou̒ yio̒ donggo pee̒-pee̒enta woliyamau̒, yio̒ lodudua̒ heloo̒ laasa mao̒ ngoa̒amila polodutolio. Wau yio̒ olo tahe longurusi Bulua Daantia lo Eeya.”

²⁷ Lapatao̒ tei Salomo lohinggi diila hurumati olei Abyatar lonto huhuloa̒lio odelo iimamu. Wolo huhutu lei Salomo boito yi wolo u matilahuda mai lo Eeya to Silo tomimbihu wali mola li Iimamu Eli malowali loi̒laalo.

²⁸ Tei Yoab loo̒dungohe pasali lou̒ ngoa̒amila u malo toduo mai boito. Tio mailoohe sababu tio helo tiwambao̒ to olei Adonia. Bo, muloololio mai tio olo diila helo tiwambao̒ to olei Absalom. Yi tio tilumetea̒ mota ode Kema lo Eeya wau helodihu huhuu-duwaalo mesba.

²⁹ Habari boito pilopo tunggulio mota odeli Olongia Salomo. Yi ti olongia malo poa̒hu olei Benaya lomate olei Yoab yila-yilateelo mao̒.

³⁰ Tei Benaya lonao̒ mota ode Kema lo Eeya wau loloi̒ya mao̒ olei Yoab, “Ti Olongia mei̒ lualao̒ olemu monteea!” “Diila,” tametao̒ lei Yoab. “Wau̒ ohilaa mate teea.” Tei Benaya luli lopo duloheo̒ sua̒li boito odeli olongia.

³¹ Loo̒dungohe uito ti olongia luli loloi̒ya mao̒, “Ponao̒lo wau pohutua mao̒ wolo umai loi̒yaalio boito. Pateaalo tio mate-mateelo mao̒ wau lobunga mao̒ tio, alihu wau̒ wau ngoilanggbu wali mola liyamau̒ diilalo timihulao̒ to polomatea yila-yilateelo mao̒ u hepilohutu lei Yoab totaa udiila ototala.

³² Eeya mamo hukuumani mai olio sababu pilomatea yila-yilateelo mao̒ u mapilo hutulio lou̒ diila ilotaawa liyamau̒. Tei Abner polowila lo Isirai̒lu, wau tei Amasa polowila lo Yehuda, duduulotalo diila ototala. Timongolio lebe mopioheo̒ wolei Yoab lohihilao, bo tio helomate olimongolio yila-yilateelo mao̒.

³³ Hukuumani sababu opopate lo polowila duulota boito mabantaa lei Yoab wau waliilio mola u ohiheo-hiheolo mao̒. Bo ngoilanggubu wali mola liyamau̒ tamowali olongia mabalakatia mai lo Eeya – timongolio mao̒paae̒da.”

³⁴ Yi malonao̒ tei Benaya ode Bele lo Eeya wau lomate olei Yoab yila-yilateelo mao̒ mota teto. Lapatao̒ tei Yoab yilobungio tobelelio to bulemengo kota.

³⁵ Lapatao̒ ti olongia lomudua̒a olei Benaya lowali eyaanggu diti lo popaatea lobuulota wolei olei Yoab, wau tei Jadok piludui̒o lowali iimamu lobuulota wolei Abyatar.

Tei Simei yilate

³⁶ Lapatao̒ uito ti olongia lotiangai olei Simei tulusi loloi̒ya mao̒ olio, “Bongula mao̒ bele ode batangamu to Yerusalemu botie. Poti biluloo̒olo teto wau diila mao̒ pohinggi monto kota.

³⁷ Wonu yio̒ buheli lumualao̒ wau mota lumaodeo̒ walao̒ Dutulaa Kidron, yi yio̒ musi pateelo mate-mateelo mao̒; wau yio̒ lohihilaolo tamomanta totala boito.”

³⁸ “Saaya, Paduka Taa Molamahu,” tametao̒ lei Simei. “Watia mamo duduo̒ palenta li Baginda.” Yi malo tibiluloo̒ tei Simei to Yerusalemu dengolo mola wakutu hiheolio.

³⁹ Lapatao̒ tolo taunu mola malo toduo mai sua̒li u wumbutio mola botie: Duulota wato lei Simei tilumetea̒ ode Gat, odeli Olongia Akhis walao̒ talolai̒ lei Maakha. Tou̒ tei Simei piloo̒taalio pasali losua̒li boito, yi tio

⁴⁰ lopohuli mao̒ polana to kolodailio tulusi lonao̒ odeli Olongia Akhis to Gat mota mololohe watolio duulota boito. Ilodungaalio timongolio tulusi luli dilelolio lohualingai.

⁴¹ Tou̒ tei Salomo loo̒dungohe wolo u mapilohutu lei Simei boito,

⁴² yi tio malei̒ tiangai olei Simei lapatao̒ loloi̒ya mao̒, “Wau̒ malohutu mao̒ olemu lodanti domi Eeya deu̒ yio̒ diila tamololaa mao̒ Yerusalemu. Wau wau̒ olo malo poe̒elao̒ olemu deu̒ wonu bolo yio̒ lumualao̒ monto Yerusalemu, yio̒ musi mate. Naa, yio̒ malodanti wau akolo u modungoheo̒ palentaau̒ boito, diila odito?

⁴³ Bo botia yilongola diila ileelamu mola dantimu boito wau yilambangamu palentaau̒?

⁴⁴ Otaawamu tutu ngoa̒amila ololeetomu toliyamau̒. Sababu uito Eeya mamo hukuumani mai olemu,

⁴⁵ bo wau̒ mapoo̒ toheeto-Lio mai tunggula ohiheo-hiheolo mao̒.”

⁴⁶ Lapatao̒ loloi̒ya mao̒ odito, ti olongia lomalentao̒ olei Benaya tulusi malonao̒ tei Benaya mota lomate olei Simei yila-yilateelo mao̒. Botia tei Salomo okawasa lealeaatu todelomo yilaidialio.