BOHULO MONGO OLONGIA 19 - KITABI HABARI MOPIOHE

Tei Elia to Hui̒dee Sinai

¹ Ti Olongia Ahab helo hungguli mao̒ odeli Isebel dilelio, ngoa̒amila u mapilohutu lei Elia, wau olo woloolo mola tei Elia helomate yila-yilateelo mao̒ ngoa̒amila nabi Baal.

² Yi ti Isebel lolao mola habari botie odelei Elia, “Pohileaala dua̒ dedeewaalo mohukuumani mai, tumbao̒ momate-mateelo mao̒ olaatia, wonu loombu mola to saa̒ati debo odelo utie watia diila mopohutu mao̒ olanto odelo ito helo pohutu mao̒ tomongo nabi Baal.”

³ Tei Elia mailoohe, lapatao̒ tio lolahi alihu diila pateelio mate-matelo mao̒. Tio lonao̒ wolo tamoo-mayawa olio ode Bersyeba to Yehuda. Mola teto tio malo lolaa mao̒ tamoo-mayawa olio boito,

⁴ lapatao̒ to limbuta ode huta datahu wau luasi udelita ngotilonggadu ilo-ilolaanga wau lohuheli to walungo bungo lo ayu tuwau u mohimbungo. Teto tio malo tihuloo̒ wau ohilaa mateelo mao̒. “Watotia diilalo moo̒ tahangi, yaa Eeya,” ualio ode Eeya. Hamaalo nyawa lowatotia. “Watotia diila lebe mopiohe wolo loluuhuru lowatotia!”

⁵ Lapatao̒ tio lotibalatao̒ to walungo bungo lo ayu boito wau leituluhu. Debolo ngotaalio lo malai̒kati lodedeta olio wau lotahuda mao̒, “Bongulo Elia, polamelolo!”

⁶ Tei Elia lomiloheo̒ to palitio, lapatao̒ iloontongalio totili lo lunggongio roti ngopita yilalango wau ginti tuatuanga taluhu. Tio olo lolamelo wau longilu, tulusi luli lotibalatao̒.

⁷ To oluolio malai̒kati lo Eeya lonao̒ mai lodedeta olio wau lotahuda mao̒, “Bongulo, Elia, polamelolo, alihu yio̒ moo̒ tahangi to nonao̒mu u molamingo.”

⁸ Tei Elia lobongu, tulusi lolamelo wau longilu. Yi tio malo lotolai wau loo̒onao̒ wopato pulu hui mola hiheolio ode Hui̒dee Sinai, tambati lo Allahu Taa̒ala helo pobilohei batanga.

⁹ Mola teto tei Elia lotihui todelomo gowa. Lapatao̒ Eeya lotahuda mai olio, “Elia, donggo hemongola yio̒ tewe?”

¹⁰ Tei Elia lolametao̒, “Yaa Eeya, Allahu Taa̒ala Taa Laba-labaalo kawasa, watotia laito hemo kalaja bo ode Eeya lohihilao. Bo umati lo Isirai̒lu helo lambanga daantia limongolio wolo Eeya. Timongolio malo longgalao̒ memees-bawaalo Eeya wau helomate yila-yilateelo mao̒ mongo nabi lo Eeya. Bo watotia lohihilaolo talei tolaa, wau botia timongolio ohilaa momate olo watotia mate-mateelo mao̒!”

¹¹ “Lualoolo monto gowa boito,” tahuda mai lo Eeya olio, “wau tihuloolo motitalu ode ola-U̒ toitaato hui̒du.” Lapatao̒ Eeya yilumaodeo̒ teto, tilolode lodupoto u hihiipa loo̒ohuu̒ daa̒ tilinggula huhuu-luduwaala lobutao̒ wau huhuu-ideyaalo lopoo̒. Bo Eeya diila lopo bilohei batanga todelomo dupoto boito. Lapatao̒ dupoto boito yiloole mao̒, malowali mai liluhu, bo todelomo liluhu boito olo Eeya diila lopo bilohei batangaa.

¹² Lapatao̒ malei dungga mai tulu, bo Eeya olo diaaluo to delomo tulu boito. Lapatao̒ uito owowoluwoalio malowali loliilo mola, tulusi dungo-dungohei suala ukikiio̒ u molumboyoto.

¹³ Tou̒ tei Elia loo̒dungohe suala boito, tio lolau̒be bayalio wolo jumbalio, lapatao̒ yilumualao̒ wau tilimihula to ngango logowa boito. Yi ilodungohe mai suala u lotahuda, “Elia, hemongola yio̒ tewe?”

¹⁴ Tei Elia lolametao̒, “Yaa Eeya, Allahu Taa̒ala Taa Labab-labaalo kawasa, watotia laito hemo kalaja bo ode Eeya lohihilao. Bo umati lo Isirai̒lu helo lambanga daantia limongolio wolo Eeya. Timongolio malo longgalo memees-bawaalo Eeya wau helomate yila-yilateelo mao̒ mongo nabi lo Eeya. Bo watotia lohihilaolo talei tolaa, wau botia timongolio ohilaa momate olo watotia mate-mateelo mao̒!”

¹⁵ Eeya lotahuda mai, “Pohualingolo mola ode huta datahu wau luasi udelita totili lo Damusiki! Lapatao̒ ponao̒lo ode kota wau tuwata mao̒ winulo ode yitaato lunggongo lei Hasael odelo tuoto pilomudua̒ olio lowali olongia lo Siria.

¹⁶ Pohutua mao̒ odito olo odelei Yehu walae̒e Nimsi, alihu tio mowali olongia lo Isirai̒lu, wau odelei Elisa walae̒e Sapat lonto Abel-Mehola, alihu tio mowali nabi mobuulota wolemu.

¹⁷ Tatoonu wambai̒o tadiila ilopatea lei Hasael yila-yilateelo mao̒, mapateelio mate-mateelo mao̒ lei Yehu, wau timongolio taloa̒ahu lonto olei Yehu mapateelio mate-mateelo mao̒ lei Elisa.

¹⁸ Bo pitu lolihu lota to Isirai̒lu mapoa̒ahu-U̒, deu̒yito-yito tau-tauwalo tadebo molotolo hilao to olu-U̒ wau tadiila pee̒enta mao̒ helo sujudu wau lolubo bui̒ Baal meaalo helodiilao̒.”

Tei Elisa tilulaoto Eeya

¹⁹ Yi malo monggato tei Elia wau loo̒dungga olei Elisa udonggo hemomadeo̒. Woluo mopulaa dulo panggalo sapi totalulio wau tei Elisa lohihilao helomadea̒ wolo panggalo sapi u pulitio. Tou̒ tei Elia yilumaodeo̒ totili lei Elisa, tei Elia malo hinggi jumbalio wau lopo enggangao̒ to binggungo lei Elisa.

²⁰ Yi tei Elisa lololaa mao̒ sasaapilio wau tilumeteo̒ mota helo hilapita olei Elia, wau loloi̒ya mao̒, “Poluasia mai watia mohualingo mola mohintupo tomongo dulaa̒ lowatia, lapatao̒ watia mamo dudua̒ oli Paaa̒.” Tametao̒ lei Elia, “Ooo̒. Wau̒ diila modini olemu.”

²¹ Tei Elisa luli lohualinga ode halabolulio lapatao̒ helo ngolotao̒ sasaapilio. Ayu lo popadei̒o pilomakelio odelo ayu podiio̒ u lotubu tapu lo sasaa-piyaalo boito. Lapatao̒ tio helo laya-layaadeo̒ tapu boito to tahidudua̒ olio tulusi timongolio lolamelao̒. Lapatao̒ uito tei Elisa lonao̒ lodudua̒ olei Elia wau lowali tamoomantua olio.