BOHULO MONGO OLONGIA 18 - KITABI HABARI MOPIOHE

Tei Elia wolei Obaja

¹ Lapatao̒ dengolo wakutu mola hiheolio, totaunu otoloulio sembo lohengu boito, Eeya lotahuda mai odelei Elia, “Ponao̒lo mola motaalua woli Olongia Ahab, diilalo mohiheo Wau̒ mamo potuhutai didi.”

² Yi malo monggato tei Elia. Tou̒ boito baala lopolobiti malo laba-labaalo to Samaria.

³ Sababu uito tei Ahab lotianga olei Obaja u mai lotaalua. (Tei Obaja yito tau̒wa lobele lou̒ ngaalaa̒ lo bele biluloa̒ saaha li olongia. Tio ngotaalio lotaa tio̒otutua hemo ibaadati to Eeya.

⁴ Tou̒ tei Ijebel helomate mongo nabi lo Eeya yila-yilateelo mao̒, tei Obaja botieelo tamalo tulungi ngohetu lota nabi wau heloluuo̒ todelomo gowa – limo lopulu lota todelomo gowa tuwau – wau helongohi mao̒ ua̒alo wau u yilumolo.)

⁵ Tei Ahab loloi̒ya mao̒ odelei Obaja, “Dulo ito molontale mota ngoilanggubu lipu botie wau mololohe butu lotaluhu meaalo dutulaa. Otanu ito mamoo̒ dungga huo̒yoto u mopoa̒ahu wadala wau bagalinto, alihu diila palalu ito momate-mateelo mao̒ penu boli tuwau monto bibiahunto.”

⁶ Lapatao̒ lolayadeo̒ lipu umaa lontaleelo boito, timongolio malo monggato. Tei Ahab ode dulungio tuwau wau tei Obaja ode dulungio uwewo.

⁷ Tohuungo dalalo tei Obaja lodunggaya wolei Elia. Lapatao̒ loo̒onuhe olei Elia, tei Obaja losujudu lomola wau lohurumati olio lapatao̒ lohintu mao̒, “Maa otutu utie ti Paaa̒ Elia?”

⁸ “Otutu, watia Elia,” tametao̒ lei Elia. “Botia ponao̒lo mota polelea mao̒ oli olongiyanto deu̒ watia woluo tewe.”

⁹ Tei Obaja lolametao̒, “Wolo totala laatia tilinggula ti Paaa̒ ohilaa mohudu olaatia odelei Ahab u pateelio mate-mateelo mao̒?

¹⁰ Domi Eeya tatumu-tumulo, Allahu Taa̒ala tahe tuboo li Paaa̒, watia mopoo̒taa mai deu̒ ti olongia malo poa̒hu mai olaatia mololohe oli Paaa̒ to utoonulalo mao̒. Wonu bolo tolipu tuwau tao̒kawasa teto moloi̒ya mai deu̒ ti Paaa̒ diaaluo mola teto, tei Ahab mohile wolo moo̒ohuu̒ alihu tao̒kawasa tolipu boito motadia deu̒ ti Paaa̒ memangi diila ilondungga mota teto.

¹¹ Wau botia ti Paaa̒ motohilaa alihu watia monao̒ mota ode olio wau moloi̒ya mao̒ deu̒ ti paaa̒ woluo tewe?

¹² Wonu bolo watia monao̒ mota monteea, Rohullah tanu mamodelo oli Paaa̒ ode tambati udiila otaawa lowatia! Wau wonu watia mopoo̒taa mao̒ odelei Ahab deu̒ ti Paaa̒ woluo tewe, lapatao̒ tio diila moo̒dungga oli Paaa̒, tantu tio mamomate olaatia mate-mateelo mao̒. Ototai mao̒, Paaa̒, watia botie tio̒otutua hemo ibaadati ode Eeya anggadu kikiia̒i!

¹³ Wolo diipo ilodungohe li Paaa̒ tou̒ tei Ijebel helomate yila-yilateelo mao̒ mongo nabi lo Eeya, watia maloluuo̒ ngohetuto lota lonto olimongolio todelomo gowa – limo lopulu lota todelomo gowa tuwau – wau helongohi mao̒ olimongolio ua̒alo wau u yilumolo?

¹⁴ Botia, yilongola ti Paaa̒ mopoa̒hu mota olaatia molele mao̒ odeli olongia deu̒ ti Paaa̒ woluo tewe? Tio tantu mamomate olaatia mate-mateelo mao̒!”

¹⁵ Tei Elia lolametao̒, “Domi Eeya Taa Laba-labaalo kawasa tahe bayaa lowatia, watia modanti mai mamonao̒ mota lohihilao motaalua woli olongia to dulahulo botie.”

Tei Elia wau mongo nabi lo Baal

¹⁶ Yi malonao̒ tei Obaja lopo duloheo̒ odeli olongia, wau tei Ahab olo lomonggata mota lodunggaya wolei Elia.

¹⁷ Tou̒ tei Ahab loo̒onto olei Elia, tei Ahab malo ngiibode, “Botie tio tamoo-tolonggaloa to Isirai̒lu!”

¹⁸ “Watia diila tamoo-tolonggaloa,” loi̒ya mao̒ lei Elia, “bo ti Baginda lohihilao. Ti Baginda wau ngaalaa̒ li Bagindalo tamoo-tolonggaloa. Wolo helolubo babaa-laahalalo Baal, ti Baginda malo lambanga totoonulalo palenta lo Eeya.

¹⁹ Botia, Palentailo ngoilanggubu ulipu lo Isirai̒lu mola modunggaya wolaatia tohui̒dee Karmel. Deloa mola olo opato hetuto limo lopulu lota nabi Baal wau opato hetuto lota nabi Dewi Asyera boito u onggosia lodiile li olongia Ijebel!”

²⁰ Yi tei Ahab lotiangai lotia̒mbu ngoilanggubu ulipu wau mongo nabi lo Baal boito ode Hui̒dee Karmel.

²¹ Lapatao̒ tei Elia lohimbide mota ode ulipu boito wau loloi̒ya mao̒, “Tunggula omolua timongoli motohilaa debo ohilao duluo? Wonu Eeya boito Allahu Taa̒ala, tubowalo Eeya! Wonu Baa̒l boito Allahu Taa̒ala, tubowalo Baal!” Ulipu tahi aambua teto malo tipoo̒oyo wambao̒.

²² Lapatao̒ tei Elia loloi̒ya mao̒, “To wolota mongo nabi lo Eeya bo watiaalo taleitolaa, lebe-lebe pomao̒ tewe woluo wopato hetuto limo lopulu lota nabi Baal.

²³ Botia delowalo mai sapi ulai̒ mohelu duluo. Ahuli mao̒ mongo nabi lo Baal boito mohama sapi tuwau wau olotaalo, lapatao̒ molambalao̒ tulusi mopodutu mao̒ toilaato ayu podiio̒. Bo timongolio diila mowali mopolei̒ta tulu teto. Sapi u tuwau poli mapohetu mao̒ lowatia odito olo. Watia mamo ngolotao̒ boli molambalo wau mopodutu mao̒ toitaato ayu podiio̒. Bo watia olo diila tamo polei̒to tulu teto.

²⁴ Huliaalo mao̒ mongo nabi lo Baal boito modua̒ todewa limongolio, wau watia olo mamodua̒ mola ode Eeya. Tamo lametai lou̒ molao mai tulu, Tiolo Allahu Taa̒ala.” Ngoa̒amila ulipu helo tuwahei wolo suala daa̒, “Akolo!”

²⁵ Lapatao̒ ualei Elia ode mongo nabi Baal boito, “Sababu timongoli dadaata, toduolo timongoli molulaoto pomao̒ sapilio wau mopodapato mao̒, bo diila polei̒taa tulu to ayulio. Lapatao̒ uito podua̒alo mao̒ to ilamu.”

²⁶ Yi timongolio loluotao̒ sapi tuwau wau lopo dapato mao̒. Lapatao̒ uito timongolio malodua̒ ode Baa̒l tumulalo mao̒ dumodupo demola ngoputu lodulahu sambela hiwuwaatia̒, “Tameta mai ami, Baal!” Timongolio helohutu uito sambela tulusi hemongelu-ngelungo topalito mesba limongolio. Bo diaaluo totametio mai sama-samaata.

²⁷ To ngoputu lo dulahei tei Elia malo lumula hemo hanti-hantia̒ olimongolio. “Podua̒alo mola lebe moo̒ohuu̒! Diila matiolo ila? Otanu tio donggo hemo mikiilangi, meaalo donggo ode huali kikiio̒. Mowaliilio olo tio donggo pasi-pasiyari! Meaalo otanu tio donggo tuutuluhu, wau timongoli musi mopobongu mao̒ olio!”

²⁸ Mongo nabi boito luli lodua̒ mola lebe loo̒ohuu̒. Wau debo odelo biasaalio hepohutuo limongolio, timongolio helongalu-ngaluheo̒ wawai̒ mongolio wolo wamilo wau totobuo̒ tunggula duhu hilumehetai.

²⁹ Odi-odieelo mola timongolio mololaalaaita tunggula lolaangio debo odelo tai̒lo tuanga lolati. Bo diaaluo talo lametai, diaaluo talo poo̒tuotao̒.

³⁰ Lapatao̒ ualei Elia ode ngoilanggubu ulipu, “Dulo mohimbidei!” Timongolio ngoa̒amila malo tia̒mbu mai topalitio, lapatao̒ tio helo poo̒pioheo̒ mesba lo Eeya u malo lohubu.

³¹ Tio lohama mao̒ botu mopulaa duluo, timii̒du botu ilowakilia lotala tuwau monto opulaa dulo suku wali lei Yako, deu̒yito-yito taa u mailohia lo Eeya tanggulo Isirai̒lu.

³² Wolo boboo-tuwaalo boito tei Elia luli lomongu mao̒ mesba tambati poi̒baadatiala ode Eeya. To palito mesba boito tio longau̒de tanggi u totoonggade udaa̒ tilinggula mowali molanggomo taluhu tanu mopulaa limo loliiteri.

³³ Tio lohuludeo̒ ayu podiio̒ toitaato mesba, lapatao̒ sapi u tuwau boito hei̒lo-iloloongio wau pilodutulio toitaato ayu boito. Lapatao̒ tio loloi̒ya, “Tuangilo totoo-mbeyaalo mohelu wopato wolo taluhu tunggula mopolu, lapatao̒ huwata mola taluhu boito toitaato dewo lobake wau ayulio.” Lapatao̒ timongolio helo pohutu mao̒ sua̒li boito,

³⁴ tio loloi̒ya mao̒, “Pee̒entapo,” lapatao̒ hepilohutu limongolio. “Muli pee̒entapo,” ualei Elia, wau timongolio luli lopohutu mao̒.

³⁵ Yi matilu molohei taluhu topalito mesba boito tilinggula tanggilio olo lopolu mai lotaluhu.

³⁶ Tou̒ leidungga wakutu mopodewo bake lolaango, ti Nabi Elia lohimbedeo̒ mesba boito tulusi lodua̒ mola, “Yaa Eeya, Allahu Taa̒ala tahe tuboo lei Abraham, Isihaka wolei Yako, poi̒laalo lomai masaatia botie deu̒ Eeyaalo Allahu Taa̒ala lo Isirai̒lu, watia wato lo Eeya. Poi̒laalo lomai olo deu̒ totoonulalo upilohutu lo watotia botie yito topalenta mai lo Eeya.

³⁷ Tametalo mai, yaa Eeya! Tametalo mai watotia alihu ulipu botie motota mao̒ deu̒ Eeya, yaa Eeya, deu̒yito-yito Allahu Taa̒ala, wau deu̒ Eeyaalo tahe lohutu mai olimongolio luli lohualinga ode Eeya.”

³⁸ Lapatao̒ Eeya lolao mai tulu lonto hulungo wau lolumbila tunggula lopobu bake boito wolo ayu podiii̒o, bobootulio boli hutalio wau helo dilatao̒ tunggula lopulito taluhu uwoluo todelomo tanggi boito.

³⁹ Tou̒ ulipu loo̒onto sua̒li boito timongolio leidumulo lomola tohuta sambela loi̒loi̒a, “Eeya boito Allahu Taa̒ala! Otutu Eeya boito Allahu Taa̒ala!”

⁴⁰ Yi maloloi̒ya tei Elia, “Wau̒upa mao̒ mongo nabi lo Baal boito! Diila mao̒ polulia penu boli ngotaa mao̒ tamoo̒lahi!” Lapatao̒ tau-tauwalo helo heu̒upa mongo nabi lo Baal boito, tulusi tei Elia malodelo mola olimongolio ode Dutulaa Kison wau mola teto tio helomate olimongolio yila-yilateelo mao̒ ngoa̒amilalo.

Polohengu lopaluto

⁴¹ Lapatao̒ uito malo loi̒ya tei Elia odeli Olongia Ahab, “Botia mopiohulo ti Baginda mota molamelo! Ngopee̒po madidia mai, sababu tingohio maa ilodungohe.”

⁴² Lapatao̒ tei Ahab mota lolamelo, wau tei Elia lobotula mola ode yitaato Hui̒dee Karmel. Mola teto tio losujudu lomola wolo bayalio ode huta towolota lohuu̒lio duuduluo.

⁴³ To tamoo-mayawa olio, tio loloi̒ya mao̒, “Botuloolo mai ode bolitutuo̒ wau pomilohe mota ode mantahu deheto.” Wato boito lobotula mola, lapatao̒ luli lohualingai wau loloi̒ya mao̒, “Watia diila loo̒onto wolo-wolo.” Tunggula poo̒opitu tei Elia helo poa̒hu watolio laahe bootula u helo milohe.

⁴⁴ Tou̒ opitulio wato boito luli lohualingai wau loloi̒ya mao̒, “Watia loo̒onto mota heengo debo odelo kikiio̒ paladu lo uluu̒ dungga-dungga mai lonto mantahu deheto.” Yi tei Elia loloi̒ya mao̒ ode watolio, “Ponao̒lo mota odeli Olongia Ahab, ahuli mao̒ tio motitae̒ to kaletaalio wau mohualinga tou̒ tio diipo otaabuta mai lodidi.”

⁴⁵ To delomo ngoi̒nta lomato wambai̒o heengo lowali loduo̒mai, wau dupoto lohiipai loo̒ohuu̒ wau didi mohulodu olo malo tuhutai. Tei Ahab malotitae̒ mola ode kaletaalio tulusi lohualinga ode Yijreel.

⁴⁶ Tou̒ boito tei Elia loo̒tapu mai lotolo lonto Eeya. Tio lolupi mao̒ jumbalio ode yitaato wau lopo bintolao̒ to wohutalio tulusi tilumeteo̒ leimulo wolei Ahab ngohayaa̒ dalalo demola huhebu hulubangi lokota Yijreel.