BOHULO MONGO OLONGIA 17 - KITABI HABARI MOPIOHE

Tei Elia wau sembo lomohengu ulaba-labaalo

¹ Woluo ngotaalio lonabi tai̒lunte Elia. Asaliilio mai lonto Tisbe, kota tuwau tomadala lo Gilead. Tou̒ dulahee tuwau tio lonao̒ mai odeli Olongia Ahab wau loloi̒ya mao̒, “Domi Eeya tatumu-tumulo, Allahu Taa̒ala tahe tuboo taulo Isirai̒lu wau tahe bayaa lowatia, watia mopoo̒taa mai odeli Tuani deu̒ ngotilonggadu dulo meaalo tolo taunu u wumbutio mola botie diaaluo mai wombulo wau didi penu boli ngoi̒di mao̒, ngopohia wonu watia molele mai.”

² Lapatao̒ uito Eeya lotahuda mai odelei Elia,

³ “Tolai mao̒ tambati botie, ponao̒lo ode tiimuru ode ngotuali lo Dutulaa Yordan wau potituo̒olo mola teto membideo̒ lowalao̒ Dutulaa Kerit.

⁴ Yio̒ mowali mongilu mao̒ monto walao̒ dutulaa boito, wau paao̒ ahula-U̒ mai modelo ua̒alo ode olemu.”

⁵ Tei Elia lodudua̒ palenta lo Eeya boito, wau lonao̒ mota ode walao̒ dutulaa Kerit tulusi lotibiluloa̒ mota teto.

⁶ Tio longilu lonto walao̒ dutulaa boito, wau lolamela roti wau tapu u hedelo lopaao̒ timii̒du dumodupo wau lolaango.

⁷ Lapatao̒ dengolo wakutu mola hiheolio, walao̒ dutulaa boito lohengu olo sababu diaaluo didi.

Tei Elia wau janda to Sarpat

⁸ Lapatao̒ Eeya lotahuda mai odelei Elia,

⁹ “Botia yio̒ musi monao̒ mola ode kota Sarpat, totili lo Sidon wau potibiluloo̒ mola teto. Wau̒ malo poa̒hu ngotaalio lojanda mola teto alihu tio mongohi ua̒alo olemu.”

¹⁰ Yi malonao̒ tei Elia ode Sarpat. Tou̒ leidungga mola tohuhebu lokota boito, tio loo̒onto ngotaalio lojanda donggo hemo himoa̒a ayu podiio̒. Lapatao̒ ualei Elia odeli janda boito, “Ibu tulungia hamaawa mai taluhee ngoi̒di yilumo lowatia.”

¹¹ Tou̒ ti janda boito donggo nao̒nao̒ mota mohama mai taluhee boito, tei Elia longuatia̒ mota, “Ibu, deloa mai olo roti ngoi̒di.”

¹² Ti janda boito lolametao̒, “Domi Eeya tatumu-tumulo, Allahu Taa̒ala tahe tuboo li Paaa̒, watia motadia mai deu̒ watia diila oroti. Watia bo olabu lopale ngoonggomo todelomo manggo, wau ngoi̒di winulo jaitun todelomo buutulu. Watia donggo hemo himoa̒ ayu podiio̒ u potubuwalo balangi ungoi̒di boito, alihu watia wau walao̒ lowatia mowali molamela. Ui-uitolo ua̒alo lamiaatia u pulitio; lapatao̒ uito amiaatia mamohima mao̒ mate wambai̒o.”

¹³ “Diila mao̒ polawalo, Ibu!” ualei Elia olio, “Toduolo ti Ibu mohutu mao̒ ua̒alo odeli Ibu wau walai̒ Ibu. Bo tou̒ dipo dipolulio mai uito pohutuwapo meimulo roti mooyoto ngobotu monto labu wau winulo boito, wau deloa mai odia.

¹⁴ Sababu Eeya, Allahu Taa̒ala tahe tuboo taulo Isirai̒lu, lotahuda mai deu̒ manggo boito malaito tuatuanga labu, wau buutulu boito malaito tuatuanga winulo tunggula tosaaa̒ti Eeya mopo tuhutai didi ode dunia.”

¹⁵ Lapatao̒ malonao̒ janda boito lopohutu mao̒ wolo uiloi̒ya lei Elia. Yi timongolio toulota maa ilohetua lou̒ aalo u lotuuheta heo̒ dula-dulaheelio mola hiheolio.

¹⁶ Wau debo odelo u mapilo tahuda mai lo Eeya lotimbulude olei Elia, manggo boito laito ilotua lolabu, wau buutulu boito olo laito ilotua lowinulo.

¹⁷ Dengolo wakutu mola lapatio mao̒ walai̒o lijanda boito ilodungga longongoto. Helebe mohiheo helebe tiluhua mola ngongotio tilinggula tio yilate.

¹⁸ Lapatao̒ uali janda boito odelei Elia, “Wato lo Allahu Taa̒ala, yilongola ti Paaa̒ helohutu mai sua̒li botie ode laatia? Wolo nonao̒ mai li Paaa̒ u loo̒sababu Allahu Taa̒ala mamoe̒elai dusa laatia, tilinggula walao̒ laatia musi mate?”

¹⁹ Tei Elia lolametao̒, “Deloa mai walao̒ boito odia mai.” Lapatao̒ tei Elia malohama walao̒ talolai̒ boito lonto oliilolio, wau lodelo mola ode huwali leidaa̒ toitaato, tohuwali upilo tihangata lei Elia. Tei Elia lopo balatao̒ walao̒ boito toitaato tambati hepo tuluhelo,

²⁰ lapatao̒ lodua̒ mola wolo suala udaa̒, “Yaa Eeya, Allahu Taa̒ala lo watotia, yilongola Eeya lopodungga mai baala botie ode yitaato lijanda botie? Tio malongohi mai poti hangatalo ode watotia wau botie Eeya lomate walai̒o yila-yilateelo mao̒!”

²¹ Lapatao̒ uito poo̒otolu tei Elia lotidambao̒ mola lowawaai̒o toitaato walao̒ boito, sambela lodua̒ mola, “Yaa Eeya, Allahu Taa̒ala lowatotia, ambunguolo potumula mai walao̒ botie!”

²² Eeya lodungohe dua̒ lei Elia; walao̒ boito malohilao mai wau luli tilumumulo.

²³ Lapatao̒ tei Elia lolaahe mola lonto huwaliilio sambela lodelo mao̒ walaa̒a boito ode liilolio wau loloi̒ya mao̒, “Ibu, utie walai̒ Ibu! Tio maluli tilumumulai!”

²⁴ Ti janda boito lolametao̒, “Botia bolo ilotaawa lowatia deu̒ ti Paaa̒ yito wato lo Allahu Taa̒ala wau loi̒ya li Paaa̒ boito memangi otutu lonto Eeya!”