BOHULO MONGO OLONGIA 16 - KITABI HABARI MOPIOHE

¹ Yi malo tahuda mai Eeya odeli Nabi Yehu walae̒e Hanan, tahuda-Lio, “Potunggula mao̒ odelei Baesa tahuli-U̒ botie,

² ‘Muloololio mai yio̒ diila wolo-wolo, bo yio̒ mapiluduu̒-U̒ lowali tau̒wa to umati-U̒ Isirai̒lu. Botia yio̒ ilodusa debo odelo tei Yerobeam wau heloo̒ sababu umati-U̒ Isirai̒lu ilodusa olo, tilinggula lopotoodei omulukaa-U̒.

³ Sababu uito Wau̒ mamopo binasa olemu wau ngaalaa̒mu tutuuwauwa debo odelo u mapilohutu-U̒ to olei Yerobeam.

⁴ Pongawaa̒ lo ngaalaa̒mu tamaate tokota maa̒alo lo apula, wau timongolio tamaate to bulemengo kota maa̒alo lobulungi.’ ”

^5-7 Tahuli lo Eeya odelei Baesa wau ngaalaa̒lio boito pilo tunggulao̒ li Nabi Yehu sababu tei Baesa malohutu u moleeto to bibilohu Eeya, tei Baesa helo potoodei omuluka lo Eeya, diila bo sababu tio malomate yila-yilateelo mao̒ ngoa̒amila ngaalaa̒ lei Yerobeam. Hikaayati wewolio tomimbihu olei Baesa, leituladee opahalawanilio matiluladu todelomo buku Sojara Mongo Olongia lo Isirai̒lu. Tei Baesa yilate lapatao̒ yilobungio to Tirja. Tei Ela, walai̒o talolai̒ lobuulota wolio, lowali olongia.

Tei Ela, olongia lo Isirai̒lu

⁸ To taunu odulo pulaa wolomo pamalenta li Olongia Asa to Yehuda, tei Ela walae̒e Baesa lowali olongia to Isirai̒lu. Tio helo malenta to Tirja dulo taunu mola hiheolio.

⁹ Tei Jumri, ngotaalio lo polowila talo titau̒wa to ngotayadu pasuukani okaleta, helo woomboa loluwali olei Ela. Tou̒ dulahee tuwau to Tirja, tei Ela helongilu tunggula hiluwoa̒ tobele lei Arsa, tau̒wa lou̒ ngaalaa̒ lobele biluloa̒ saaha li olongia.

¹⁰ Lapatao̒ tei Jimri tilumuwotao̒ wau malomate olei Ela, yila-yilateelo mao̒ lapatao̒ lowali olongia lobuulota wolei Ela. Uito lotoduo totaunu odulo pulaa pitu pamalenta lo Olongia Asa to Yehuda.

¹¹ Lolamemeta tou̒ tei Jimri lowali olongia, tio helomate yila-yilateelo mao̒ ngoa̒amila ngaalaa̒ li Olongia Baesa. Tumbao̒ ngoa̒amila mongo ilaato lei Baesa mongo lolai̒ wau mongo sahabati lou̒ ngaalaa̒lio olo diaaluo penu boli ngotaa mao̒ tai̒lolabita.

¹² Lotuuu̒de lou̒ wolo u pilotahuda mai lo Eeya odelei Baesa lotimbuludei oli Nabi Yehu, ngoa̒amila ngaalaa̒ lei Baesa ilopatea yila-yilateelo mao̒.

¹³ Tei Baesa wolei Ela, walai̒o, helolubo dedee-waalo wau loo̒sababu taulo Isirai̒lu helohutu dusa. Sababu uito timongolio helo potoodei omuluka lo Eeya, Allahu Taa̒ala tamusi tuboo lotau Isirai̒lu.

¹⁴ Hikaayati wewolio tomimbihu olei Ela matiluladu todelomo buku Sojara Mongo Olongia lo Isirai̒lu.

Tei Jimri, olongia lo Isirai̒lu

¹⁵ To taunu odulo pulaa pitu pamalenta li Olongia Asa to Yehuda, tei Jimri lowali olongia lo Isirai̒lu wau helo malenta to Tirja ngotilonggadu pituhui mola. Tou̒ boito suludadu lo Isirai̒lu donggo hemomala Gibeton, kota taulo Pilistin.

¹⁶ Tou̒ timongolio loo̒dungohe deu̒ tei Jimri malo woomboa loluwali oli olongia wau malomate olio yila-yilateelo mao̒, yi to dulahulo boito to pilo tikemawa limongolio boito, timongolio ngoa̒amila malo mudua̒ao̒ olei Omri, eyaanggu limongolio, odelo olongia lo Isirai̒lu.

¹⁷ Lapatao̒ tei Omri wau pasuukanilio lololaa mao̒ Gibeton tulusi mola lomala Tirja.

¹⁸ Tou̒ tei Jimri loo̒onto deu̒ kota boito maa yilambatio, tio tilumuwotao̒ ode delomo bele biluloa̒ saaha li olongia wau lomobu bele biluloa̒ saaha li olongia boito pee̒-pee̒enta wolo batangalio, oditolio tio mailateelo mola.

¹⁹ Uito lotoduo mai sababu tio helohutu u moleeto to bibilohu Eeya. Tutuuwauwa debo odelo ti Olongia Yerobeam, tei Jimri olo ilodusa to Eeya wau heloo̒ sababu umati lo Isirai̒lu ilodusa olo.

²⁰ Hikaayati uwewolio tomimbihu olei Jimri, leituwoto woomboa polo hiyanati u yilanjanaalio, matiluladu todelomo buku Sojara Mongo Olongia lo Isirai̒lu.

Tei Omri, olongia lo Isirai̒lu

²¹ Malowali lopoo̒olo mola todelomo bangusa lo Isirai̒lu sababu woluo tamo tohilaa alihu tei Tibni walae̒e Ginat mowali olongia, bo woluo olo tamo tohilaa olei Omri mowali olongia.

²² Pulitio mao̒ timongolio talo tiwambao̒ to olei Omri loo̒haama. Tei Tibni yilate wau tei Omri lowali olongia.

²³ Uito lowali totaunu otolo pulaa tuwau pamalenta li Olongia Asa to Yehuda. Tei Omri helo malenta odelo olongia to Isirai̒lu mopulaa dulo taunu mola hiheolio. Ngotilonggadu wolomo taunu mola u bohulio tio helo malenta to Tirja.

²⁴ Bo lapatao̒ tio lotali mao̒ hui̒dee tuwau ngohalaga wolomo lihu doi talaa̒ lonto tahingota-ngotawa tai̒lunte Semer. Lapatao̒ tio lomongu mao̒ kota tuwau tohui̒dee boito wau longunte mao̒ Samaria, lodudua̒ tanggulee Semer, bakasi taa ohuu̒wo lohui̒dee boito.

²⁵ Tei Omri helohutu duduu-sawaalo ulebe udaa̒ mao̒ lou̒ pilohutu lomongo olongia tahelo malenta tou̒ dipo-dipolulio mai tio.

²⁶ Debo odelo tei Yerobeam, tei Omri ilodusa wau heloo̒ sababu taulo Isirai̒lu olo ilodusa. Masababu uito timongolio helo potoodei omuluka lo Eeya, Allahu Taa̒ala tamusi tuboo taulo Isirai̒lu.

²⁷ Hikaayati wewolio tomimbihu li Olongia Omri, wau ngoa̒amila umaa pilohutulio matiluladu todelomo buku Sojara Mongo Olongia lo Isirai̒lu.

²⁸ Lapatao̒ tei Omri yilate mao̒ wau yilobungio to Samaria, tei Ahab walai̒o lowali olongia lobuulota wolio.

Tei Ahab, olongia lo Isirai̒lu

²⁹ To taunu otolo pulaa walu pamalenta li Olongia Asa to Yehuda, tei Ahab walae̒e Omri lowali olongia to Isirai̒lu wau helo malenta to Samaria dulo pulaa dulo taunu mola hiheolio.

³⁰ Tio helohutu dusa ulebe udaa̒ mao̒ to bibilohu Eeya wolo mongo olongia tou̒ dipo-dipolulio mai tio.

³¹ Diipo lotuuheta to olio olo tilumumula ilodusa debo odelo ti Olongia Yerobeam, tio tumbao̒ lonika woli Isebel walai̒ Olongia Etbaal lonto Sidon, wau tio helo ibaadati to Baal.

³² Tio malomongu bele poi̒baadatiala ode Baa̒l to Samaria, wau todelomo bele poi̒baadatiala boito tio lohutu mao̒ mesba tuwau ode dewa boito.

³³ Tio lohutu olo bui̒ lo Dewi Asyera. Tio helohutu dusa lebe dadaata lou̒ pilohutu lo ngoa̒amila olongia lo Isirai̒lu tahelo malenta tou̒ dipo-dipolulio mai tio. Sababu uito tio helo potoodei omuluka lo Eeya, Allahu Taa̒ala tamusi tuboo lotau Isirai̒lu.

³⁴ Tomaasa pamalenta lei Ahab, kota Yerikho luli bilongu lei Hiel taulo Betel. Bo debo odelo u mapilo tahuda lo Eeya tou̒ dipo-dipolulio mai lotimbulude olei Yosua walae̒e Nun, tei Hiel iloolia lowalai̒o duulota: tei Abiram tamohuhula daa̒ yilate tou̒ tei Hiel lopodutu mao̒ wumbatio lokota, wau tei Segub tawaliyali yilate tou̒ tei Hiel helo pohuli huhuu-hebuwalo hulubangi lokota boito.