BOHULO MONGO OLONGIA 15 - KITABI HABARI MOPIOHE

Tei Abiam, olongia lo Yehuda

¹ To taunu opulaa walulio pamalenta li Olongia Yerobeam to Isirai̒lu, tei Abiam lowali olongia lo Yehuda

² wau helo malenta ngotilonggadu tolo taunu mola to Yerusalemu. Tiilolio yito ti Maakha, walae̒e Abisalom.

³ Tio diila lealeaatu lohilao tatapu wau molotolo hilao to Eeya Allahu Taa̒alaalio, tingga wewo wolei Dauda, tiyombu liyombulio.

⁴ Bo, domi ti Olongia Dauda, yi Eeya, Allahu Taa̒ala tahe tuboo lei Dauda, malongohi mai odelei Abiam walao̒ ngota talo buulota wolio helo malenta to Yerusalemu wau lomintengi mao̒ kota boito.

⁵ Eeya helohutu mai sua̒li boito sababu tei Dauda maloo̒ sanangi hilaa-Lio. Tei Dauda diila pee̒enta mao̒ lomalonga palenta lo Eeya, ngopohia todelomo sua̒li lei Uria taulo Het boito.

⁶ Popaatea towolota lei Rehabeam wolei Yerobeam u tilumulalio tomaasa lei Rehabeam donggo pohu-pohutu tulusi ngotilonggadu pamalenta lei Abiam.

⁷ Hikaayati uwewolio tomimbihu olei Abiam matiluladio todelomo buku Sojara Mongo Olongia lo Yehuda.

⁸ Tei Abiam olo yilate wau yilobungio to Kota lei Dauda. Tei Asa walai̒o lowali olongia lobuulota wolio.

Tei Asa, olongia lo Yehuda

⁹ To taunu opulaa dulopulu pamalenta li Olongia Yerobeam to Isirai̒lu, tei Asa lowali olongia lo Yehuda.

¹⁰ Tio helo malenta wopato pulaa tuwau lotaunu mola hiheolio to Yerusalemu. Tiyombulio taabua yito ti Maakha, walae̒e Abisalom.

¹¹ Debo odelo tei Dauda, nenemoyaalio, tei Asa helopoo̒ sanangi hilaa lo Eeya.

¹² Ngoa̒amila tasuuntali tao̒tuugasi to tataa-mbatiyalo polubowalo dewa yilinggilio, wau ngoa̒amila balaahala ubilongu lomongo olongia tahelo malenta tou̒ dipo-dipolulio mai tio pilopo diaalulio to ngoilanggubu lipu.

¹³ Tiyombulio taabua, ti Maakha, yilinggilio lonto huhuloa̒lio odelo tiilo olongia taabua, sababu tio malohutu bui̒ balaahala u huloto ode Asyera, dewi u molomiodu. Tei Asa malo polohubeo̒ balaahala boito wau pilobulio to Lumbaya Kidron.

¹⁴ Eleponu diila ngoa̒amila tambati polubowalo balaahala ilaantulu lei Asa, bo tio debo tatapu wau molotolo hilao to Eeya ngotupa lo tutumulio.

¹⁵ Ngoa̒amila hulawa wau talaa̒ u mapilodewo liyamalio ode Eeya, hedilelolio ode Bele lo Eeya, odito olo hulawa wau talaa̒, dewolio lohihilao.

¹⁶ Tomaasa pamalenta li Olongia Asa lonto Yehuda wau li Olongia Baesa lonto Isirai̒lu laito o popaatea towolota li olongia duulota boito.

¹⁷ Tei Baesa heloluhu Yehuda wau lopo toheetao̒ kota Rama u loheu̒tao̒ dalalo u potuwotalo wau poluwalalo ode Yehuda.

¹⁸ Sababu uito ti Olongia Asa helohama mao̒ ngoa̒amila hulawa wau talaa̒ udonggo woluo to Bele lo Eeya wau to bele biluloa̒ saaha li olongia lapatao̒ yilaolio ode Damusiki odelei Benhadad olongia lo Siria, walae̒e Tabrimon, deu̒yito-yito wombu lei Hejion. Babaa-langiyalo boito heilaolio loli dengolo lota taduduulaa̒ lobele biluloa̒ saaha li olongia; wau wolo tahuli odie,

¹⁹ “Duloolo ito mopoo̒ toheetao̒ wumbuta lopolo sahabatinto debo odelo u mapilohutu lomongo dulaa̒anto. Woleeto watia helolao mai hulawa wau talaa̒ odelo palaseni, wau moheinga oli tuani momunto mao̒ wumbuta wolei Baesa olongia lo Isirai̒lu, alihu tio muli mopo walingao̒ pasuukanilio monto madala lowatia.”

²⁰ Tei Benhadad akolo wolo hihiile boito lapatao̒ helo poa̒hu mongo polowilalio wolo pasuukani limongolio u loluhu kokoo-tawaalo Isirai̒lu. Timongolio lopoo̒laaheo̒ Iyon, Dan, Abel-Bet-Maakha wau Kinerot membideo̒ bulalo Galilea wau ngoilanggubu madala Naputali.

²¹ Tou̒ tei Baesa loo̒dungohe sua̒li boito, yi tio malo huheli lopoo̒ toheetao̒ Rama. Tio malonao̒ ode Tirja wau bo utou̒ ngopee̒ mola diila helopaatea.

²² Lapatao̒ uito, ngoa̒amila tau to ngoilanggubu Yehuda diaaluo penu boli ngotaa mao̒ tadiila pilalenta li Olongia Asa u lomintaa̒ botu wau ayu u pilomake lei Baesa to Rama helopoo̒ toheetao̒ kota boito. Babaa-langiyala boito hepilomake lei Asa ulopoo̒ toheetao̒ kota Mispa wau Geba, kota tuwau tomadala Benyamin.

²³ Hikaayati wewolio tomimbihu li Olongia Asa, deu̒yito-yito opahalawanilio wau kokoo-tawaalo u hepiloo̒ toheetio, matiluladu todelomo buku Sojara Mongo Olongia lo Yehuda. Tou̒ tio mapanggola mola tei Asa helo dutolaa lo ngongoto to oa̒atio mohu-mohualia.

²⁴ Tio yilate wau yilobungio to kuubulu lomongo olongia tokota lei Dauda. Tei Yosapat, walai̒o talolai̒ lowali olongia lobuulota wolio.

Tei Nabab, olongia lo Isirai̒lu

²⁵ To taunu oluolio pamalenta li Olongia Asa to Yehuda, tei Nabab walae̒e Yerobeam lowali olongia to Isirai̒lu wau helo malenta dulo taunu mola hiheolio.

²⁶ Debo odelo tiyamolio tahe lomalenta tou̒ dipo-dipolulio mai, tio olo helohutu u moleeto to bibilohu Eeya tilinggula loo̒sababu taulo Isirai̒lu helohutu dusa.

²⁷ Tei Baesa, walae̒e Ahia, lonto suku Isakhar helo woombowa loluwali olei Nadab, lapatao̒ lomate olio yila-yilateelo mao̒. Tou̒ boito tei Nadab wolo pasuukanilio donggo hemomala kota Gibeon tomadala Pilistin.

²⁸ Uito yilowali todelomo taunu otolulio pamalenta li Olongia Asa to Yehuda. Odi-odieelo mola tei Baesa lowali olongia lo Isirai̒lu lobuulota wolei Nadab.

²⁹ Lolamemeto lapatio mao̒ tei Baesa lowali olongia, tio helomate yila-yilateelo mao̒ ngoilanggubu ngaalaa̒ lei Yerobeam, Lotuuu̒de lou̒ wolo u mapilo tahuda mai lo Eeya lotimbulude towato-Lio, ti Nabi Ahia lonto Silo, yi ngoilanggubu ngaalaa̒ lei Yerobeam ilopatealio yila-yilateelo mao̒, diaaluo penu boli ngotaa talo aahu.

³⁰ Tei Yerobeam ilodusa wau heloo̒ sababu taulo Isirai̒lu olo ilodusa. Lou̒ odito tei Yerobeam lopotoodei omuluka lo Eeya, Allahu Taa̒ala tahe tuboo taulo Isirai̒lu.

³¹ Hikaayati u wewolio tomimbihu olei Nadab matiluladu todelomo buku Sojara Mongo Olongia lo Isirai̒lu.

³² Ngotilonggadu maasa pamalenta li Olongia Baesa lonto Isirai̒lu, popaatea laito helo toduo towolota lei Baesa wau li Olongia Asa lonto Yehuda.

Tei Baesa, olongia lo Isirai̒lu

³³ To taunu otolulio pamalenta li Olongia Asa to Yehuda, tei Baesa walae̒e Ahia lowali olongia to ngoilanggubu Isirai̒lu. Tio helo malenta to Tirja dulo pulaa pato lotaunu mola hiheolio.

³⁴ Tutuuwauwa debo odelo ti Olongia Yerobeam tahelo malenta tou̒ dipo-dipolulio mai, ti Olongia Baesa olo ilodusa to Eeya wau heloo̒ sababu taulo Isirai̒lu olo lohutu dusa.