BOHULO MONGO OLONGIA 13 - KITABI HABARI MOPIOHE

¹ Tou̒ boito woluo nabi ngota to Yehuda. Tio ilahula lo Eeya u lonao̒ mola ode Betel. Nabi boito leidungga mola odito tou̒ tei Yerobeam donggo tihutihula totalu lomesba u hemo podewo bake.

² To palenta lo Eeya malo ngiibodu nabi boito tomesba boito, “Wuu mesba, wuu mesba! Odi-odieelo mola tahuda mai lo Eeya, ‘Ngotaalio lowalao̒ tai̒lunte Yosia mapo tutuolio mai todelomo ngaalaa̒ lei Dauda. Toitaatomu, wuu mesba, tio mamomate-mateelo mao̒ mongo iimamu tahi otuugasi to tata-mbatiyalo ibaadati todewa, wau tamale podewo olo bake toitaatomu. Wau toitaatomu olo tio mamo lumbila tutuu-lalowaalo manusia.’ ”

³ Uali nabi boito wumbutio mola, “Mesba botie mamo lohubu, wau wahu u toitaatio mamo bangguwata mola. Ui-uitolo bukutiilio deu̒ watia ilahula mai lo Eeya.”

⁴ Tou̒ tei Yerobeam loo̒dungohe tataa-heyaalo boito, yi tio lolunu toli nabi boito lapatao̒ malo nguatio̒, “Wau̒pa tau boito!” Bo polotodu lei Yerobeam hua̒a lowali lobualodu tilinggula tio diilalo loo̒ bantanga uluu̒lio poli.

⁵ Mesba boito debolo lolohubu lomola wau wahu toitaatio lotuwata mola ode huta, debo odelo u mailoi̒ya li nabi boito to palenta mai lo Eeya.

⁶ Lapatao̒ malo loi̒ya ti Olongia Yerobeam odeli nabi boito, “Tulungia mao̒ modua̒ mola ode Eeya Allahu Taa̒alaamu ode olau̒. Pohilea mola ponu-Lio u mopoo̒luli mai polotodu lo uluu̒uu̒!” Ti Nabi boito olo lodua̒ mola ode Eeya, lapatao̒ maloluli polotodu lo uluu̒ li olongia.

⁷ Lapatao̒ ti olongia loloi̒ya mao̒ odeli nabi boito, “Dulo molamela tobeleu̒. Wau̒ ohilaa mongohi mai palaseni olemu.”

⁸ Ti Nabi boito lolametao̒, “Eleponu ti Baginda mongohi mai olaatia ngotayadu lo okokaya li Baginda, watia diila tamo dudua̒ mota molamelo wau mongilu woli Baginda.

⁹ Watia maloo̒tapu mai palenta lonto Eeya udiila mowali molamelo wau mongilu, wau diila mowali mohualinga muli molibaya todalalo u pilonao̒wa mai lowatia tou̒ odia mai.”

¹⁰ Odi-odieelo mola tinabi boito lohualinga lolibaya todalalo wewo.

Ngotaalio lonabi panggola to Betel

¹¹ Tou̒ boito woluo ngotaalio lonabi panggola tabilu-biluloa̒ to Betel. Mongo walai̒o lopoo̒taa mao̒ olio pasali lonabi lonto Yehuda boito. Timongolio helo hungguli mao̒ pasali lou̒ wolo u pilohutulio to Betel todulahee boito, wau wolo uiloi̒yaalio odeli Olongia Yerobeam.

¹² Lapatao̒ malohintu tinabi panggola boito, “Nabi lonto Yehuda boito loli dalalo u toonu tou̒ tio lohualingo?” Yi pilotunu mao̒ limongolio dalala boito to olio.

¹³ Lapatao̒ tio lei̒ pohuli mao̒ olimongolio polana to kolodailio. Lapatao̒ uito tio lotitae̒ mola wau malonao̒

¹⁴ lohilapita mota oli nabi lonto Yehuda boito. Tio loo̒dungga oli nabi boito donggo hulo-huloa̒a towalungo ayu uleidaa̒. “Wolo Ito nabi talonto Yehuda boito?” yilintu mao̒ linabi panggola boito. “Otutu,” tametao̒ lotau boito.

¹⁵ “Dulo molamelo tobele lowatia,” uali nabi panggola boito.

¹⁶ Bo tinabi lonto Yehuda boito lolametao̒, “Bolo maa̒apu! Watia diila mowali mololimo totoduo li Paaa̒ ode bele li Paaa̒. Watia olo diila tamo lamela meaalo mongilu tewe woli Paaa̒.

¹⁷ Eeya lomalentai olaatia diila tamo lamela meaalo mongilu wau diila mohualinga moli dalalo u tutuuwauwa lou̒ pilonao̒wa mai lowatia odia.”

¹⁸ Yi ti nabi panggola lonto Betel boito olo helo himbulo mao̒ to olio, lou̒ loloi̒ya, “Watia olo nabi odelo Ito. To palentai lo Allahu Taa̒ala olo malai̒kati ngota malo poa̒hu mai olaatia molutulao̒ wau mohinta Olanto tobele lowatia.”

¹⁹ Ti Nabi lonto Yehuda boito malo dudua̒ mota ode bele linabi panggola boito wau lolamela wolio.

²⁰ Tou̒ timongolio donggo hihuloa̒a hemo lamela, Eeya lotahuda mao̒ odeli nabi panggola boito,

²¹ tilinggula tio lodini oli nabi lonto Yehuda boito, ualio mao̒, “Eeya lotahuda mai deu̒ Ito diila lodungohe to Eeya. Ito diila lohutu wolo upilo malentaa-Lio mai to Olanto.

²² Ito maluli lohualingai wau lolamela longilu, lebe-lebe pomao̒ Ito madilini u mohutu sua̒li boito. Sababu uito Ito mapateelio mate-mateelo mao̒, wau milate-Nto diila talobungolio to kuubulu lo ngaalaa-Nto.”

²³ Lapatao̒ timongolio yilapato lolamelao̒, ti nabi panggola boito malo pohuli mao̒ polana to kolodai lonabi lonto Yehuda boito,

²⁴ tulusi malo monggatolo tinabi boito. Tohuungo dalalo tio tiluhu losinga tuwau, lapatao̒ yilate dilangapio. Lapatao̒ milatelio le̒iinggayalo mao̒ todalalo, wau kolodailio tihu-tihula totiliilio. Singa boito olo tihu-tihula teto.

²⁵ Tau-tauwalo tahilaode, loo̒onto milate wau singa boito teto. Lapatao̒ timongolio malonao̒ ode Betel wau helo poo̒taa mao̒ wolo u iloontonga limongolio boito.

²⁶ Tou̒ tinabi panggola boito loo̒dungohe pasali losua̒li boito, tio malo loi̒ya, “Tantulo mao̒ tio nabi tadiila lodungohe palenta lo Eeya! Uito sababuulio Eeya lolao mota singa boito u lodangapo olio wau lomate olio yila-yilateelo mao̒ debo odelo u tilahuda mai lo Eeya tou̒ dipo-dipolulio mai.”

²⁷ Lapatao̒ malo loi̒ya tinabi panggola boito ode mongo walai̒o, “Popohulia mao̒ polana to kolodayiu̒.” Lapatao̒ tio lotitae̒ mola ode yitaato kolodailio, tio olo lomonggato.

²⁸ Ilodunggaalio milate linabi talonto Yehuda boito donggo dutudutu todalalo wolo kolodai wau singa totiliilio. Singa boito diila lodangapo kolodai boito, wau diila olo yilonga milate boito.

²⁹ Tio lomintaa̒a milate boito wau lopodutu mao̒ toitaato kolodailio, tulusi luli dilelolio ode Betel mola hiliyongalio wau yilobungio mao̒.

³⁰ Ti Nabi panggola boito lohihilao tamalo lobungo milate boito tokuubulu lo ngaalaa̒lio, lapatao̒ tio wau mongo walai̒o helo hiyongao̒ milate boito. Timongolio loloi̒ya, “Atio̒olo yio̒, wutatuu̒, atio̒olo!”

³¹ Lapatao̒ uali nabi panggola boito ode mongo walai̒o, “Wonu bolo wau̒ mate, lobunga mao̒ wau̒ tokuubulu botie totili linabi boito.

³² Wolo umai loi̒yaalio to palenta mai lo Eeya ode mesba to Betel boito wau ode ngoa̒amila tambati lo ibaadati to kokoo-tawaalo Samaria tantu mamotodua mai.”

Tei Yerobeam helohutu u moleeto

³³ Ti Olongia Yerobeam debo diila mohuto mololaa mao̒ huhutuulio u moleeto. U monguulusi mao̒ tata-mbatiyala poi̒baadatialo umaa bilongulio boito, tio tulusi wambai̒o helo luloatao̒ iimamu lonto ngangaa-laa̒waalo biasa. Penu boli tatoonu tamohuto, hepiludui̒o lowali iimamu.

³⁴ Huhutuulio u moleeto boito heloo̒ sababu waliilio mola tilopotala wau loa̒antulu sama-samaata.