BOHULO MONGO OLONGIA 12 - KITABI HABARI MOPIOHE

Polo malakala lo susuu-kuwaala to ambahu tilayo

¹ Tei Rehabeam lonao̒ ode Sikhem, sababu ngoilanggubu ulipu lo Isirai̒lu to ambahu tilayo malo tia̒mbu mola teto u momudua̒a olio mowali olongia.

² Tou̒ boito tei Yerobeam walae̒e Nebat donggo woluo to Masiri sababu lolahi lonto li Olongia Salomo. Tou̒ tio loo̒dungohe pasali lei Rehabeam, yi tio luli lohualinga ode Isirai̒lu.

³ Ulipu to ambahu tilayo helo loduo olei Yerobeam, lapatao̒ timongolio wolio lonao̒ mota lotaalua wolei Rehabeam. Uali mongolio mao̒,

⁴ “Tei Salomo tiyamo li Baginda malongohi mai banta u mobuheeto ode lamiaatia. Botia wonu ti Baginda mopoheelo wau mopu kulangi nao̒ banta laimaatia wau dutolo lamiaatia, yi amiaatia mamo tiwato toli Baginda.”

⁵ Tei Rehabeam lolametao̒, “Wau̒ musi momikiilipo. Muli poonao̒ mai tolohui pomola.” Yi malo hualingo tau-tauwalo boito.

⁶ Lapatao̒ tei Rehabeam helohile naseehati tomongo panggola tapee̒enta lowali tamoo-nasehatia olei Salomo tiyamo lei Rehabeam. “Woloolo mola wau̒ molametao̒ totau-tauwala boito?” yilintu mao̒ lei Rehabeam, “Wolo naseehati limongoli?”

⁷ Timongolio lolametao̒, “Wonu ti Baginda tio̒otutua ohilaa taa̒luku wau hulumati to ulipu, poluasia mao̒ polohone limongolio boito, yi timongolio mamotiwato toli Baginda ohiheo-hiheolo mao̒.”

⁸ Bo nasehati lomongo panggola boito diila pilandungi lei Rehabeam. Bolii̒o mao̒, tio bo lonao̒ mota ode tahi muudawa taa ngohilaide wolio wau u botia hipomantua olio.

⁹ Toli mongolio tio malohintu mao̒, “Wolo naseehati limongoli to olau̒ u molametao̒ ulipu tahemohile alihu wau̒ mopoheelao̒ banta limongolio?”

¹⁰ Timongolio lolametao̒, “Odie mola u patutilio loi̒ya mao̒ li Baginda ode limongolio, ‘Olu-olulupuhio wau̒, wau̒ debo lebe molotolao̒ woliyamau̒!’

¹¹ Tiyamau̒ malongohi mai banta u mobuheeto ode limongoli, bo wau̒ mamongohi mai ulebe mobuheetao̒ poli. Tio helomate olimongoli wolo buuboo̒, bo wau̒ mamo muuboa̒ olimongoli wolo buuboa̒ oduhi wate!”

¹² Tolo hui mola lapatio mao̒ tei Yereboam wau ngoa̒amila tau boito luli lonao̒ lotaalua woli Olongia Rehabeam, debo odelo u mapilo malentaalio mao̒.

¹³ Bubuu-lemenga wolo naseehati lomongo panggola boito, ulipu talonao̒ mai ode olio boito yilimelulio wolo bangganga.

¹⁴ Lotuuu̒de wolo naseehati lotahi muudawa, tio loloi̒ya mao̒, “Tiyamau̒ longohi mai banta u mobuheeto olimongoli. Bo wau̒ mamohutu banta boito lebe mobuheetao̒ poli. Tio lomate olimongoli wolo buuboo̒, bo wau̒ mamo muuboa̒ olimongoli wolo buuboa̒ oduhi wate!”

¹⁵ Hihiile ulipu diila pilandungilio. Bo uito yito memangi kahandaki lo Eeya. Wolo upilo tahuda mai lo Eeya lotimbuludei oli Nabi Ahia lonto Silo tomimbihu olei Yerobeam walae̒e Nebat musi motoduo.

¹⁶ Tou̒ ulipu loo̒onto mao̒ deu̒ ti olongia diila mohuto modungohe olimongolio, yi timongolio malo nguatio̒, “Nte pongola wolei Dauda wau waliilio! Timongolio diila pee̒enta mao̒ helohutu wolo-wolo ode olanto. Ulipu lo Isirai̒lu, duloolo ito mohualingo! polulia mao̒ tei Rehabeam boito monguulusi batangalio lohihilao!” Yi malo hualingo ulipu lo Isirai̒lu,

¹⁷ wau tei Rehabeam lowali olongia bo tomadala lo Yehuda.

¹⁸ Eleponu odito ti Olongia Rehabeam debo donggo lopoa̒hu olei Adoniram, ngotaalio lo tau̒wa tamoo-kalajawa pakusa, helo poduo̒to ulipu. Bo timongolio helomai̒ olio wolo botu tunggula yilate. Loo̒onto sua̒li boito tei Rehabeam hua̒a lotitae̒ mola ode kaletaalio, lapatao̒ lolahi ode Yerusalemu.

¹⁹ Tumulalo mai tou̒ boito ulipu to ambahu tilayo bele biluloa̒ saaha li olongia lo Isirai̒lu bolo laito hemo mintaa̒a tingolo tomongo olongia wali mola lei Dauda.

²⁰ Tou̒ ngoilanggubu ulipu lo Isirai̒lu loo̒dungohe deu̒ tei Yerobeam maluli lohualingai lonto Masiri, timongolio malo loduo olio ode dudunggaya tuwau lapatao̒ lomudua̒a olio lowali olongia lo Isirai̒lu. Bo ulipu suku lo Yehuda wambai̒o tadebo molotolo hilao to wali mola lei Dauda.

Laamali li Nabi Semaya

²¹ Tou̒ ti Olongia Rehabeam leidungga mola to Yerusalemu, tio helo ngambu mai pajulelio ngohetuto walu lopulu lihu lota talaba-labaalo mopiohu lonto suku Yehuda wau Benyamin u loluhu taulo Isirai̒lu wau lopowuli okokawasaalio to susuu-kuwaalo wimbihu tilayo lo Isirai̒lu.

²² Bo Allahu Taa̒ala lopoa̒hu oli Nabi Semaya

²³ lopo tunggulao̒ habari botie odelei Rehabeam, wau ode ngoilanggubu suku Yehuda wau Benyamin,

²⁴ “Diila mao̒ tuhua mongo wutatumu taulo Isirai̒lu. Pohualingolo! Wolo u malo toduo mai yito kahandaki-U̒.” Yi timongolio ngoa̒amila malo dudua̒ palenta lo Eeya, lapatao̒ lohulinga ode bele limongolio ngota-ngota.

Tei Yerobeam lololaa to Eeya

²⁵ Tou̒ lowali olongia lo Isirai̒lu, tei Yerobeam lopoo̒ toheetao̒ kota Sikhem tomadala hihui̒-hui̒dea lo Epraim, tulusi malo tibiluloa̒ mola teto u ngopee̒ mola. Lapatao̒ tio luli lonao̒ lonteeto wau helo poo̒toheeto kota Pnuel.

^26-27 To delomo hilaalio tio hemo mikiilangi mola odie, “Wonu ulipu debo monao̒ ode Yerusalemu mola mopodewo bake to Bele lo Eeya debo odelo u hepohutuo limongolio masaatia botie, yi timongolio mamuli mohualingo momantu olei Rehabeam, olongia lo Yehuda, lapatao̒ mamomate olau̒ mate-mateelo mao̒.”

²⁸ Lapatao̒ helo timbangi mola sua̒li boito, tio malohutu bui̒ mahelu duluo lonto sapi hulawa tulusi loloi̒ya mao̒ ode ulipu, “Bangusa lo Isirai̒lu! Malo tuuu̒de hiheolio timongoli helonao̒ ode Yerusalemu mola loi̒baadati. Botia, uti-utieelo ila-ila limongoli u malodelo olimongoli yilumualao̒ lonto Masiri!”

²⁹ Lapatao̒ tei Yerobeam lopo tambati mao̒ tuwau lonto sapi hulawa boito to Betel wau uwewolio to Dan.

³⁰ Yi ulipu poli malohutu dusa, sababu timongolio lonao̒ ode Betel wau ode Dan mota loi̒baadati.

³¹ Tei Yerobeam olo lopo tihulao̒ tataa-mbatiyalo ibaadati uwewo to boboo-litutuo̒walo hui̒dee, wau tio helo mudua̒a mongo iimamu towolota lo ngangaa-laa̒waalo tadiila suku Lewi.

Eeya helo laa̒anati ibaadati to Betel

^32-33 Lapatao̒ tei Yerobeam helopo tambati mao̒ mongo iimamu boito to Betel u lotuugasi mola teto wau tio lohihilao helo podewo bake ode sasaa-piyaalo hulawa u pilohutulio boito. Lapatao̒ tio lolantu mao̒ dulahu opulaa limo hulalo owalulio odelo dulahu buka ode Isirai̒lu, tutuuwauwa debo odelo dulahu buka to Yehuda. Todulahee boito tei Yerobeam lonao̒ ode Betel wau helo podewo bake u loporame dulahu buka umaa tilantulio.