BOHULO MONGO OLONGIA 11 - KITABI HABARI MOPIOHE

Ti Olongia Salomo lololaa to Eeya

¹ Ti Olongia Salomo heilohilao to mongobua deli dadaata. Ngopohia tipuusili li olongia lo Masiri, tei Salomo helonika olo wolo mongobua lo Het, Moab, Amon, Edom wau Sidon.

² Eeya malo malentai deu̒ taulo Isirai̒lu diila mowali monika mou̒ulaua wolo babaa-ngusawalo boito, sababu timongolio de mamoo̒ sababu taulo Isirai̒lu molubo ila-ila wewo. Eleponu odito, tei Salomo helonika olo wolo mongobua deli.

³ Woluo pitu lohetuto lota puusili tahi bangusawa henilika lei Salomo, wau woluo olo tolo hetuto lota pipialio. Mongo dile boi-boitolo taloo̒ sababu olei Salomo malo lolaa to Allahu Taa̒ala,

⁴ tilinggula tou̒ tio maa pilanggola mola timongolio loo̒pio olio helolubo ila-ila wewo. Tei Dauda, tiyamo lei Salomo, tatapu wau molotolo hilao to Eeya, Allahu Taa̒alaalio, bo tei Salomo diila debo odelo tiyamalio.

⁵ Tei Salomo helolubo Asytoret, dewi bangusa lo Sidon, wau olo Molokh dewa umoo̒ toitupo u hetuboo bangusa lo Amon.

⁶ Odi-odieelo mola tei Salomo ilodusa to Eeya. Tei Dauda, tiyamo lei Salomo malo dudua̒ to Eeya wolo lealeaatu lohilao, bo tei Salomo diila debo odelo uito.

⁷ Toitaato hui̒dee ambahu tiimuru lo Yerusalemu, tio lopo tihulao̒ tambati polubowalo Kamos, dewa taulo Moab, wau ode Molokh, dewa taulo Amon – duduuluwolo dewa umoo̒ toitupo.

⁸ Tei Salomo helo potihulao̒ olo tataa-mbatiyaalo tou̒toonu mongo dilelio tabangusa deli loo̒tapo mao̒ dupa wau helo podewo bake ode dedeewaalo limongolio lohihilao.

^9-10 Mapoo̒oluo Eeya, Allahu Taa̒ala lo Isirai̒lu, lopo bilohei batanga odelei Salomo wau helo poe̒elao̒ olio deu̒ tio diila mowali molubo ila-ila wewo, bo tei Salomo diila lodungohe to Eeya. Tio tumbao̒ lololaa to Eeya, tilinggula Eeya malo muluka to olio.

¹¹ Eeya lotahuda mai, “Sababu wolo lotota lou̒tau yio̒ lolambaga daantiamu wola-U̒ wau diila lodungohe totoonulalo palentaa-U̒, yi Wau̒ mamohama bele biluloa̒ saaha li olongia boito monto olemu, wau mohudu mao̒ ode ngotaalio lo pogaweemu.

¹² Eleponu odito, domi tiyamamu Dauda, Wau̒ diila tamopohutu mai sua̒li boito tou̒ yio̒ donggo tumu-tumulo. To maasa pamalenta lowalao̒ talolai̒mu, bolo Wau̒ mopohutu mai sua̒li boito.

¹³ Bo diila ngoilanggubu lo bele biluloa̒ saaha li olongia boito mahamaa-U̒ monto olio. Domi wato-U̒ tei Dauda, wau Domi Yerusalemu u mapilowali-U̒ kotaa-U̒ boito, Wau̒ mamopo labitao̒ ngosuku ode walao̒ talolai̒mu.”

Mumuu-suuwaalo li Olongia Salomo

¹⁴ Yi Eeya malohutu mao̒ olei Hadad, ngotaalio lo wali mai li Olongia Edom, helomuusua woli Olongia Salomo.

^15-16 Lohiheo mola tou̒ dipo-dipolulio uito, lapatao̒ ti Olongia Dauda lopo taa̒luku mao̒ Edom, tei Yoab, eyaanggu hilaide lo popaatea li Olongia Dauda, lonao̒ ode Edom mola lolobungao̒ tahidudua̒ olio uilate. Wolomo hula mola hiheolio tio wau tahidudua̒ olio lotibiluloa̒ to Edom. Wau todelomo wakutu boito timongolio helomate yila-yilatelo mao̒ ngoa̒amila mongo lolai̒ mola teto.

¹⁷ Bo, tei Hadad utou̒ boito donggo muda, matilumetea̒ ode Masiri wolo dengolo lota taulo Edom, tahi pomayawa liyamolio.

¹⁸ Timongolio lomonggato lonto Midian, lapatao̒ lonao̒ ode Paran. Mola teto dengolo lota tawewolio helo panggala woli mongolio, lapatao̒ pee̒-pee̒enta lonao̒ ode Masiri mola lodunggaya woli olongia lo Masiri. Ti Olongia boito longohi mao̒ odelei Hadad bele wau huta u tambati poti biluloa̒lio wau pohumbuto tutumulo.

¹⁹ Yi tei Hadad olo lowali tamani mopiohu li olongia, tilinggula ti olongia longohi mao̒ wipahio lohihilao, deu̒yito-yito tawaliyali tobele biluloa̒ saaha li olongia Tahpenes, odelei Hadad u lowali dilelio.

²⁰ Lapatao̒ dile lei Hadad boito lopotutu mai walao̒ talolai̒ ngota tai̒lunte Genubat. Walao̒ botie pilou̒daa̒alio mola lodile li olongia lohihilao wau lotibiluloa̒ tobele biluloa̒ saaha li olongia wolo mongo walao̒ li olongia.

²¹ Tou̒ tei Hadad lololimo habari deu̒ ti Olongia Dauda mailate, wau tei Yoab, eyaanggu hilaide lopopaatea lo Isirai̒lu mailate olo, yi malo loi̒ya tei Hadad odeli olongia lo Masiri, “Poluasia mai watia muli mohualinga ode lipu pilohuluta loduhu lowatia.”

²² “Yilongola?” yilintu mao̒ li olongia, “Wolo yio̒ ii̒ilangi tewe, tilinggula yio̒ ohilaa mohualinga ode lipu pilohuluta loduhumu?” “Watia diila ii̒ilangi wolo-wolo,” loi̒ya mao̒ lei Hadad, “bo polulia mai watia mohualingo.” Yi malo hualingo tio ode lipu pilohuluta loduhulio.

²³ Allahu Taa̒la helohutu mao̒ olo olei Rejon, walae̒e Elyada, helo muusua wolei Salomo. Tei Rejon yito wato talolahi lonto oli tuanilio yito ti Olongia Hadadejer lonto Joba.

²⁴ Ti Olongia Daud pee̒enta lopoo̒laaheo̒ olei Hadadejer botie wau helomate yila-yilatelo mao̒ mongo sahabati lei Hadadejer lonto Siria. Tou̒ boito tei Rejon lolahi lonto olei Hadadejer wau helo ngambu tau-tauwalo lapatao̒ lowali tau̒wa lo woomboa. Tio wau tahidudua̒ olio lonao̒ ode Damusiki tulusi lotibiluloa̒ tokota boito. Mola teto tahidudua̒ olio lomudua̒a olio lowali olongia lo Siria.

²⁵ Debo odelo tei Hadad, ti Olongia Rejon olo helo muusua wolo Isirai̒lu tomaasa tutumulio lei Salomo, wau hemopo tolonggalo tolipu boito.

Danti lo Allahu Taa̒ala odelei Yerobeam

²⁶ Taa wewo tahelo mintaa̒ tingolo loluwali olei Salomo yito ngotaalio lo pogaweelio tai̒lunte Yerobeam. Tio walae̒e Nebat lonto Jereda to Epraim. Tiilolio majilanda tai̒lunte Jerua.

²⁷ Wumbutio mola botie hikaayati pasali pilomintaa̒ tingolo lei Yerobeam. Tou̒ huta to ambahu huliaalio Bele lo Eeya donggo hetambulalo, wau dingingo meeseli lokota donggo hepoo̒piohulo,

²⁸ tei Yerobeam olo helo kalaja teto. Tou̒ tei Salomo loo̒onto deu̒ tei Yerobeam molimomoto mokalaja wau moo̒olohu, yi tio lohudu mao̒ olio titihula u longimato mao̒ kalaja pakusa tomadala losuku Manasye wau Epraim.

²⁹ Tou̒ dulahee tuwau tei Yerobeam yilumualao̒ lonto Yerusalemu. To huungo dalalo tohuta datahu u luasi tio nilao̒ mai li Nabi Ahia lonto Silo utou̒ boito pakepake jumba u bohu.

³⁰ Lapatao̒ tei Ahia lolopatao̒ jumbalio, wau longaidinga lowali mopulaa dulo pita.

³¹ Lapatao̒ malo loi̒ya tio odelei Yerobeam, “Hamaawa mao̒ mopuulo pita ode batangamu, sababu Eeya, Allahu Taa̒ala lo Isirai̒lu malo tahuda mai odie olemu, ‘Wau̒ mamohama bele biluloa̒ saaha li olongia botie monto olei Salomo, wau mongohi mai mopuulo suku to olemu.

³² Ngosuku madebo to olei Salomo, domi wato-U̒ tei Dauda, wau domi Yerusalemu, umaa tilulaotu-U̒ lonto ngoilanggubu lipu lo Isirai̒lu lowali kotaa-U̒.

³³ Wau̒ mamohutu mai sua̒li boito sababu tei Salomo malo lolaa mao̒ ola-U̒ wau helolubo dedeewaalo, deu̒yito-yito: Asytoret, dewi bangusa lo Sidon; Kamos, dewa bangusa lo Moab; wau Milkom, dewa bangusa lo Amon. Tei Salomo diila lodudua̒ kahandaki-U̒. Tio diila debo odelo tiyamolio tei Dauda talo dungohe ola-U̒ wau hemo ponao̒ palentaa-U̒.

³⁴ Eleponu odito Wau̒ diila tamohama ngoilanggubu bele biluloa̒ saaha li olongia boito monto olio. Tio mapoluli-U̒ mao̒ okawasa ngotupa lo tutumulio. Sua̒li boito pohutuwo-U̒ domi wato-U̒ tei Dauda, tamaa tilulaotu-U̒ wau talo dungohe totoonulalo butoo̒o-U̒ wau palentaa-U̒.

³⁵ Yilaidia botie mahamaa-U̒ monto walao̒ talolai̒ lei Salomo wau mopuulo suku mawohi-U̒ mai olemu.

³⁶ Bo ngosuku mapoluli-U̒ mao̒ olio, alihu laito woluo ngotaalio monto wali mola lowato-U̒ Dauda tamo malenta duo̒lo-U̒ to Yerusalemu, kota umaa tilulaotu-U̒ odelo tambati poi̒baadarialo to ola-U̒.

³⁷ Wau yio̒, Yerobeam, mapowaliyo-U̒ olongia lo Isirai̒lu wau luasiya-U̒ momalenta ngoilanggubu madala u kahandakiyomu.

³⁸ Wonu yio̒, debo odelo wato-U̒ tei Dauda, modungohe wolo lealeaatu lohilao to ola-U̒ boli tumumulo modudua̒ ngoa̒amila butoo̒o-U̒ butoo̒-U̒, wau moo̒sanangi hilaa-U̒ lou̒ moponao̒ ngoa̒amila upilo malentaa-U̒ mai olemu, yi Wau̒ mawolemu laito. Wau̒ mamo powali mai olemu olongia to Isirai̒lu. Wau̒ mamomanta deu̒ waliimu mola mamowali olongia lo Isirai̒lu mobuulota wolemu, tutuuwauwa debo odelo u mapilohutu-U̒ odelei Dauda.

³⁹ Sababu tei Salomo ilodusa, Wau̒ mamo hukuumani mai wali lei Dauda, bo diila u ohiheo-hiheolo mao̒.’ ”

⁴⁰ Tou̒ habari boito leidungga mola odelei Salomo, tio lotolopani u momate-mateelo mao̒ olei Yerobeam. Bo tei Yerobeam malolahi odeli Olongia Sisak to Masiri, wau lotibiluloa̒ mota teto tunggula tei Salomo yilate.

Opopate li Olongia Salomo

⁴¹ Hikaayati wewolio pasali lei Salomo, tomimbihu ngoa̒amila umaa kilalajaalio wau tomimbihu pongototaalio, matiluladio todelomo buku Riwaayati lo Tutumulo lei Salomo.

⁴² Wopato pulu lotaunu mola hiheolio tei Salomo helo malenta to Yerusalemu to ngiolanggubu Isirai̒lu.

⁴³ Tou̒ tio yilate mao̒ yilobungio tokota lei Dauda. Lapatao̒ tei Rehabeam walai̒o talolai̒ lowali olongia lobuulota wolio.