BOHULO MONGO OLONGIA 10 - KITABI HABARI MOPIOHE

Nonao̒ mai li Olongia taabua lipu lo Syeba

¹ Ti Olongia Taabua lipu lo Syeba loo̒dungohe pasali omasaahuru lei Salomo. Yi tio lonao̒ mai ode Yerusalemu mai lotesi olei Salomo wolo yiyintu u hitootola.

² Tio lonao̒ mai wolo ngojumulaa daa̒ tahidudua̒ wau unta usaarati deto-detohe ramba-ramba, botu polioto, wau dadaata daa̒ hulawa. Tou̒ lodunggaya wolei Salomo, ti olongia taabua boito loo̒owolimao̒ yiyintu hidala-dalaala u lowali pilikii-langilio.

³ Ngoa̒amila yiyintu boito ilotameta lei Salomo, diaaluo penu boli tuwau mao̒ u odito totoolio to olio.

⁴ Ti Olongia taabua boito losakusi mao̒ lohihilao malo odito tinepio lei Salomo,

⁵ dudelo lokalaja mongo pogawee lobele biluloa̒ li olongialio, wau pakeyangi ngotumbao̒ wau bebee-leyaalo limongolio. Tio loo̒onto mao̒ ua̒alo wau uilumolo u hepo hintalio, wau dudelo lomongo wato hipo hintaawa potihunggu, wau babaa-keyaalo u hepilodewo lei Salomo to Bele lo Eeya. Ngoa̒amilalo boito heloo̒ linggalabe oli olongia taabua lo Syeba boito wau bolo leitontongo.

⁶ Yi malo loi̒ya tio odeli Olongia Salomo, “Totoonulalo u ilodungohe lowatia tolipu lowatia pasali li Tuani wau tinepo li Tuani, memangi otutu!

⁷ Muloololio mai watia diila palacaya, bo yinta watia lonao̒ mai wau malo sakusi mao̒ ngoa̒amilalo wolo mato lowatia lohihilao, bolo watia yakini. Tutuulio tutu totoonulalo u ilodungohe lowatia boito diipo ngotayadu lou̒ iloontonga lowatia botia. Malo ilaalo tinepo wau okokaya li Tuani lebe udaa̒ mao̒ lou̒ pilo habariilio olaatia.

⁸ Donggo boli pae̒daalio mongo dile li Tuani! Wau donggo boli muujurulio mongo pogawee talaito hipo kalajawa toli Tuani tilinggula mowali modungoheo̒ monto li Tuani lohihilao totoonulalo pongaajali u molinepo!

⁹ Ilopujialo mola Eeya, Allahu Taa̒ala li Tuani! Wolo lomuduo̒ oli Tuani lowali olongia lo Isirai̒lu, Eeya lopoi̒laalo malo odito sanangilio Eeya toli Tuani. Diila opulitio Eeya helomonu mai bangusa lo Isirai̒lu; uito sababuulio Eeya lomuduo̒ oli Tuani lowali olongia limongolio, alihu ti Tuani mowali mopo tihulao̒ butoo̒ wau u aadili.”

¹⁰ Lapatao̒ ti olongia taabua lipu lo Syeba boito lohudu mao̒ odelei Salomo papaa-laseniyalo u dilelolio mai, deu̒yito-yito lebe lou̒ wopato lihu lokilo hulawa wau ngojumulaa daa̒ botu polioto wau ramba-ramba. Diilalo pee̒enta mao̒ tei Salomo helo lolimo ramba-ramba u odito daatalio debo odelo uilohi li olongia taabua lipu lo Syeba boito ode olio. (

¹¹ Kakaa-paliyaalo lei Hiram ulodelo mai hulawa lonto Opir odelei Salomo, helodelo mai olo ngojumulaa daa̒ botu polioto wau ayu luhi.

¹² Ayu boito hepilomake lei Salomo u lohutu mao̒ tataa-laliyaalo to Bele lo Eeya wau tobele biluloa̒ li olongia li olongia; wau olo helohutu kocapi wau gaambusi ode tahi polahua. Aa̒a-yuwaala boito yito ayu luhi ulaba-labaalo mopiohu u pee̒enta pilopo woluolio mao̒ ode Isirai̒lu; diilalo pee̒enta mao̒ tau heloo̒onto ayu u mopiohe odito.)

¹³ Ngopohia lo papaa-laseniyalo u biasaalio hewohi lei Salomo, tio olo helongohi odeli olongia taabua lipu lo Syeba boito ngoa̒amila u pilohilelio. Lapatao̒ malo hualingolo ti olongia taabua boito ode lipulio pee̒-pee̒enta wolo ngoa̒amila tahidudua̒ olio.

Okokaya li Olongia Salomo

¹⁴ Timii̒du taunu ti Olongia Salomo hemo lolimo ngopee̒ dulo pulaa tolo lihu lokilo hulawa,

¹⁵ diipo yilia̒apo papaa-edawaalo lonto polo daahangi, wau bebee-yawaalo lonto tahipo daahangia, mongo olongia lo Arabi, wau timii̒du gubolonulu lo Isirai̒lu.

¹⁶ Tei Salomo helohutu dulo hetuto porisai leidaa̒ lonto hulawa dilupa. Hulawa u pilomakelio ode timii̒du porisai boito otanu pitu lokilo.

¹⁷ Tio olo helohutu tolo hetuto porisai hulawa ulebe mooyoto. Hulawa u pilomake ode timii̒du porisai u mooyoto boito otanu dulo kilo, ngoa̒amila hulawa dilupa. Ngoa̒amila porisai boito dilutulio tobalai u ilunte Balai Oa̒ayua Libanon.

¹⁸ Tio olo lohutu kadera tuwau lo bele biluloa̒ saaha li olongia ulei̒daa̒ u yilolude wolo tua̒lango wau diladai hulawa tutu.

¹⁹ Kadera boito opolotodu lo uluu̒, wau mohu-mohualia obui̒ singa. To wulea lokadera boito obui̒ lunggongo sapi. Kadera boito olo o lilintonga lotua̒du mohelu wolomo.

²⁰ To hudu oloihi wau hudu olowala timii̒du lilintonga lotua̒de boito obui̒ singa – ngoa̒amilalo mopulaa duluo. Diila pee̒enta mao̒ woluo kadera lo bele biluloa̒ saaha li olongia debo odelo uito penu boli to bele biluloa̒ saaha li olongia toonu olo.

²¹ Ngoa̒amila pakaakasi u pongiluma lei Salomo pilohutu lonto hulawa, wau ngoa̒amila pakaakasi to Balai Oa̒ayua Libanon olo pilohutu lonto hulawa tutu. Diaaluo u pilohutu lonto talaa̒, sababu to jamani lei Salomo tau hemo lantobu talaa̒ diila ohalaga.

²² Tei Salomo o kaapali dadaata u hemobite pee̒-pee̒enta wolo kaapali li Olongia Hiram. Tolo taunu pee̒enta kakaa-paliyaalo boito hipo hualinga mai hemodelo hulawa, talaa̒, tua̒langa, dihe wau bulungi meraki.

²³ Ti Olongia Salomo lebe kaya wau lebe molinepo wolo totoonulalo olongia to dunia.

²⁴ Ngoa̒amila taa to ngoilanggubu dunia hipo-tolopania u modunggaya wolei Salomo u modungohe pongaa-jaliilio umolinepo uilohi mai lo Allahu Taa̒ala olio.

²⁵ Timongolio ngota-ngota lonao̒ mai ode olio lou̒ hideloa palaseni odelei Salomo. Timongolio helongohi mao̒ babaa-langiyalo talaa̒, hulawa, pakeyangi, tingolo, ramba-ramba, wadala wau bagali. Odi-odieelo mola timii̒du taunu.

²⁶ Tei Salomo helomongu hilaide lo popaatea u tilitangoalio ngolihu wau wopato hetuto kaleta lo popaatea wau mopulaa dulo lihu lota pajule owadala. Ngotayadio pilopo tambatilio to Yerusalemu wau lebelio to utoonulalo kota u wewo.

²⁷ To delomo jamani pamalenta lei Salomo, to Yerusalemu talaa̒ debo odelo balangi biasa motuuwauwa wolo botu, wau ayu woohu Libanon malo odito daatalio odelo ayu lo ara biasa.

²⁸ Lotimbulude totaa u hipo ngusahawa tomimbihu polo daahangi li olongia, wadala pilopo dunggalio mai lonto Masiri wau Kilikia,

²⁹ wau kakaa-letawaalo popaatea pilopo dunggalio mai olo lonto Masiri. Halaga lowadala tuwau ngohetuto limo lopulu doi talaa̒, wau halaga kaleta tuwau lo popaatea wolomo hetuto doi talaa̒. Lapatao̒ lotimbulude totaa u hipo ngusahawa tomimbihu polo daahangi boito olo wawaa-dalaalo wau kakaa-letawalo popaatea boito luli hepotaliilio ode mongo olongia lo Het wau mongo olongia lo Siria.