BOHULO MONGO OLONGIA 1 - KITABI HABARI MOPIOHE

Ti Olongia Dauda tomaasa panggolalio

¹ Botia ti Olongia Dauda mapanggola daa̒. Eleponu tio wiluloto wolo kaingi mohulodu, tio debo mohuhulo.

² Masababu uito mongo pogaweelio loloi̒ya mao̒, “Taa Molamahu, opiohelio mongowatotia mololohei tadulahu ngota u motibiluloa̒ woli Baginda. Tio mamo tuluheo̒ woli Baginda alihu ti Baginda molaasa mopatu.”

^3-4 Lapatao̒ mailolohio mai to ngoilanggubu Isirai̒lu ngotaalio tadulahu gaaga. Yi to Sunem ilodunggaalio ngotaalio tadulahu gaaga daa̒ tanggulio Abisag. Tio dilelolio mai odeli olongia, tulusi tio malodaha oli olongia wau helo raawati olio. Bo ti olongia diila lou̒ulauwa wolio.

Tei Adonia helohile wolo moo̒ohuu̒ mowali olongia

^5-6 Sababu tei Absalom mailate, yi tei Adonia, walao̒ talolai̒ lei Dauda oluolio lowali tamohuhula daa̒. Tiilolio ilunte Hagit. Tei Adonia yito taa u gaaga. Tiyamolio diila pee̒enta mao̒ heloingo olio wonu tio mohutu totala. Tei Adonia botie ohilaa daa̒ mowali olongia, yi tio helo podapato ode batangalio ngojumula kaleta lo popaatea wau suludadu owadala wau limo lopulu lota tamoo-kawalia batanga lohihilao.

⁷ Lapatao̒ tio mota lodulohupa wolei Yoab woli Iimamu Abyatar. Tiilo lei Yoab tai̒lunte Jeruya. Tei Yoab woli Iimamu Abyatar akolo u lomantu tolopani lei Adonia.

⁸ Bo ti Iimamu Jadok, tei Benaya walae̒e Yoyada, Nabi Natan, Simei, tei Rei wolo tamoo-kawalia batanga li Olongia Dauda diila lotiwambao̒ odelei Adonia.

⁹ Tou̒ dulahee tuwau to tambati u ilunte Botu Tulidu totili butu lotaluhu En-Rogel, tei Adonia helo podewo bake lohimba, sapi ulai̒ wau walao̒ sapi u hiliingohe. Tio helo loduo walao̒ mongo lolai̒ li Olongia Dauda uwewo, wau mongo pogawee lobele biluloa̒ saaha li olongio lonto suku Yehuda ode potihunggu lobake boito.

¹⁰ Bo tei Salomo tawali-yaliilio, wau ti Nabi Natan wolei Benaya wau tamoo-kawalia batanga li Olongia Dauda diila tiloduolio.

Tei Salomo pilludui̒o lowali olongia

¹¹ Yi ti Nabi Natan mota lodunggaya woli Batsyeba, tiilo lei Salomo, lapatao̒ loloi̒ya mao̒ olio, “Wolo ti Olongia taabua diipo loo̒dungohe deu̒ tei Adonia, walao̒ talolai̒ li Hagit, malo mudua̒ao̒ batangalio lowali olongia, hiambola ti Olongia Dauda diila motota lolo-loolo sua̒li boito?

¹² Wonu ti Olongia taabua ohilaa alihu tei Salomo woli Olongia taabua lohihilao moa̒ahu, watia monasehati mai

¹³ hua̒a pona̒olo mota motaalua woli Olongia Dauda, wau mopoo̒taa mao̒ odie olio: ‘Diila ti Baginda lohihilao tamalo tadia to olaatia deu̒ tei Salomo walao̒ talolai̒ lowatia mamowali olongia motuuloa̒ woli Baginda? Botia, yilongola tei Adonia talowali olongia?’ ”

¹⁴ Ualei Yonatan wumbutio mola, “De, tou̒ ti Olongia taabua donggo hemobisala woli olongia, watia matumuotao̒ u mopoo̒ lotolao̒ wolo u mailoi̒ya li Olongia taabua.”

¹⁵ Yi maa lonao̒olo ti Batsyeba mota lotaalua woli olongia to delomo huwaliilio. Ti Olongia tou̒ boito mapanggola daa̒, wau ti Abisag, tadulahu lonto Sunem boito, donggo hemohinta mao̒ olio.

¹⁶ Ti Batsyeba malo sujudu mola totalu li olongia, tulusi ti olongia lohintu mao̒, “Wolo u otohilaamu?”

¹⁷ Ti Batsyeba lolametao̒, “Paduka Taa Molamahu, ti Baginda malo tadia mai olaatia domi tanggulo Eeya, Allahu Taa̒ala li Baginda, deu̒ tei Salomo walao̒ talolai̒ lowatia mamowali olongia mobuulota woli Baginda.

¹⁸ Bo botia lou̒ diila ilotaawa li Baginda, deu̒ tei Adonia malowali olongia.

¹⁹ Tio malo podewo dadaata himba, sapi ulai̒ wau walao̒ sapi u hiliingohe. Tio olo malo loduo ode potihunggu boito walao̒ mongo lolai̒ li Baginda woli Iimamu Abyatar wolei Yoab, eyaanggu diti lo popaatea li Baginda. Bo, tio diila loloduo olei Salomo.

²⁰ Paduka Taa Molamahu, ngoilanggubu ulipu lo Isirai̒lu masaatia donggo hipo himaawa putuusani lonto oli Baginda pasali lo tatoonu tamamo buulota woli Baginda mowali olongia.

²¹ Wonu ti Baginda diila mongohi mao̒ putuusani boito, tantu molamemeto tou̒ ti Baginda mate mao̒, watia wau walao̒ talolai̒ lowatia mapo hutuolio odelo tamoo-hiyanitia.”

²² Tou̒ ti Batsyeba donggo hemobisala, ti Nabi Natan leidungga mai tobele biluloa̒ saaha li olongia.

²³ Lapatao̒ piloo̒taalio oli olongia pasali lononao̒ mai lei Natan. Ti Batsyeba yilumualo, wau tei Natan tilumuotao̒, tulusi losujudu lomola totalu li olongia.

²⁴ Tei Natan maloloi̒ya, “Paduka Taa Molamahu, wolo ti Baginda malo pomalalumu mola deu̒ tei Adonia mamo buulota woli Baginda mowali olongia?

²⁵ To dulahulo botie tio malo podewo dadaata himba, sapi ulai̒ wau walao̒ sapi u hiliingohe. Ngoa̒amila walao̒ talolai̒ li Baginda matiloduolio. Wau olo mongo eyaanggu diti lo popaatea li Baginda, wau ti Iimamu Abyatar. Timongolio masaatia donggo hemohutu potihunggu wolio wau hitingalaa̒ meengahu, ‘Pomali-tutuo̒lo mola Olongia Adonia!’

²⁶ Bo, tio diila loloduo olaatia. Ti Iimamu Jadok wolei Benaya wau tei Salomo olo diila tiloduolio.

²⁷ Wolo ti Baginda talo poa̒hu olio helohutu ngoa̒amilalo botie, lou̒ diila lopoo̒taa ode mongo pogawee li Baginda deu̒ tatoonu tamaa mobuulota woli Baginda?”

²⁸ Ti Olongia Dauda loloi̒ya mao̒, “Tianga mai ti Batsyeba.” Yi ti Nabi Natan yilumualao̒ wau ti Batsyeba luli tilumuotai lotaalua woli olongia.

^29-30 Lapatao̒ uali Baginda mao̒ olio, “Memangi wau̒ malodanti olemu, domi tanggulo Eeya, Allahu Taa̒ala lo Isirai̒lu, deu̒ tei Salomo talolai̒mu mamo buulota wolau̒ mowali olongia. Naa, botia wau̒ modanti mai olemu domi Eeya tatumu-tumulo, tamalo lopatai olau̒ lonto tilolahepalo osuukaliu̒, deu̒ to dulahulo botie wau̒ mamoe̒elao̒ dantiu̒ olemu.”

³¹ Yi malo sujudulo mola ti Batsyeba sambela loloi̒ya mao̒, “Pomali-tutuo̒lo mola Paduka Olongia u ohiheo-hiheolo mao̒!”

³² Lapatao̒ ti Olongia Dauda helei̒ tiangai olei Jadok, Natan wolei Benaya. Tou̒ timongolio lonao̒ mai,

³³ malo loi̒ya ti olongia odeli mongolio, “Tianga mai mongo polowiraau̒ wau ponao̒lo odelei Salomo walau̒uu̒ talolai̒. Potae̒ya mao̒ tio toitaato bagaliu̒ lohihilao, wau delowa mola tio ode butu lotaluhu Gihon.

³⁴ Mola teto tei Jadok wolei Natan musi momudua̒a olio mowali olongia lo Isirai̒lu. Lapatao̒ uito timongoli musi mopotingohe mola toroompeti motingalaa̒ meengahu, ‘Pomali-tutuo̒lo mola Olongia Salomo!’

³⁵ Lapatao̒ tunuheelo tio muli mohualingai odia motihuloa̒a totambati huhuloa̒au̒, sababu tio-tioolo tamaa tilulaotuu̒ lowali olongia mobuulta wolau̒ u momalenta Isirai̒lu wau Yehuda.”

³⁶ “Saaya, Taa Molamahu,” tuwaheo̒ lei Benaya, “pohileaala dua̒ Eeya, Allahu Taa̒ala li Baginda, mopoo̒ toheetai palenta li Baginda boito.

³⁷ Odelo woloolo mola Eeya malo duo̒lai oli Baginda, pohileaala dua̒ boli Eeya olo mohutu mai pamalentaalio laito lebe otilapulo wolo Pamalenta li Baginda.”

³⁸ Yi tei Jadok, Natan, Benaya wau tamoo-kawalia batanga li olongia malo loduo olei Salomo lotitae̒ ode yitaato bagali li olongia, lapatao̒ timongolio helolunuhe olio ode butu lo taluhu Gihon.

³⁹ Lapatao̒ tei Jadok lohama tambati lowinulo jaitun umaa dilelolio mai lonto Keme lo Eeya, tulusi lomudua̒a olei Salomo wolo lomake winulo boito. Torompeti olo mapilo tingohio mola wau ngoa̒amila tawoluo teto helo tingalaa̒ meengahu, “Pomili-tutuo̒lo mola Olongia Salomo!”

⁴⁰ Lapatao̒ timongolio ngoa̒amilalo helo lunuhe olio luli lohualingo sambela hitingalaa̒ lou̒ meengahu wau helo potingohe mola tulali, tilinggula huta debo odelo mamobutao̒ sababu rameyangi boito.

⁴¹ Tei Adonia wau ngoa̒amila tamulio boheli yilapatao̒ helohutu pohunggu, tou̒ timongolio loo̒dungohe rameyangi boito. Tou̒ tei Yoab loo̒dungohe tingohu torompeti boito tio malohintu, “Wolo u malo toduo tokota tilinggula rame daa̒?”

⁴² Tei Yoab diipo yilapata poli lobisala mao̒, debolo malonao̒ mai tei Yonatan, walai̒ Iimamu Abyatar, “Dulo tuwotai,” ualei Adonia. “Yio̒ taa mopiohe, tantu u dilelomu mai, habari u mopiohe olo.”

⁴³ “Maa̒apu, diila habari u mopiohe,” tametao̒ lei Yonatan. “Ti Olongia Dauda malo mudua̒a olei Salomo lowali olongia!

⁴⁴ Tei Jadok, Natan, wolei Benaya wau tamoo-kawalia batanga li olongia lohihilao ilahulalio lodudua̒ olei Salomo. Timongolio malo potae̒ olio toitaato bagali li olongia,

⁴⁵ wau tei Jadok wolei Natan malo mudua̒a olio tobutu lotaluhu Gihon. Masaatia timongolio maluli lohualinga ode kota sambela hitingalaa̒ meengahu wolo hiramea, wau ngoilanggubu kota hibuluhuta daa̒. Uitolo rameyangi u ilodungohe limongoli engonti.

⁴⁶ Tei Salomo masaatia malowali olongia.

⁴⁷ Tumbao̒ mongo polowila li olongia malonao̒ mota helo lapali mao̒ hinta moa̒ahu odeli Olongia Dauda. Timongolio loi̒ya mao̒, ‘Pohileaala dua̒ Allahu Taa̒ala li Baginda mopowali mai olei Salomo laito lebe otilapulo wolo pamalenta li Baginda.’ Lapatao̒ to tambati lo potuluhelio, ti Olongia Dauda sujudu lolubo to Allahu Taa̒ala,

⁴⁸ wau lodua̒, ‘Ilopujialo mola Eeya, yaa Eeya, Allahu Taa̒ala tahe tuboo umati lo Isirai̒lu. Todulahee botie ngotaalio lowali mai lowatotia mapiluduo̒ lowatotia lowali olongia lobuulota wolo watotia. Wau Eeya malo poluasi mai olo watotia tilumumulo u losakusi mao̒ olio!’ ”

⁴⁹ Taa hetiloduo lei Adonia mailoohe, tilinggula timongolio ngoa̒amilalo matilimihula tulusi lonao̒, ngota-ngota helohama dalaalio lohihilao.

⁵⁰ Yi mailoohe daa̒ tei Adonia olei Salomo, tilinggula tio tilumetea̒ mota ode Kema lo Eeya wau helodihu huhuu-duwaalo mesba teto.

⁵¹ Tau lopoo̒taa mao̒ sua̒li boito odeli Olongia Salomo. Timongolio helo poo̒taa mao̒ deu̒ sababu tei Adonia moohe daa̒ olei Salomo, yi tio malonao̒ mota ode kema wau helodihu huhuu-duwaalo mesba boito wau loloi̒ya, “Watia diila tamonao̒ monteea tou̒ tei Salomo diipo motadia mao̒ to olaatia deu̒ tio diila tamomate olaatia mate-mateelo mao̒.”

⁵² Tei Salomo lolametao̒, “Wonu tio mohutu u mopiohu, yi tio penu boli ngoi̒di mao̒ diila tahukuu-maniyola; bo wonu tio mohutu u moleeto, yi tio musi pateelo mate-mateelo mao̒.”

⁵³ Lapatao̒ ti olongia mota lei̒ hama mai olei Adonia lonto mesba boito. Yi malonao̒ mai tei Adonia, wau losujudu lomola totalulio. Lapatao̒ ti olongia loloi̒ya mao̒, “Yio̒ mowali mohualingolo!”