AYUBA 9 - KITABI HABARI MOPIOHE

Tei Ayuba

^1-2 Bo tei Ayuba lolametao̒, “Memangi, otaawau̒, loloo-iyaamu boito diila tilaala. Bo, diila pongalo aakali manusia momalakala moluwali to Allahu Taa̒ala wau mopo olaaheo̒ to Eeya?

³ Monto ngolihu lo yiyintu u podudulai lo Allahu Taa̒ala, penu boli ngotahe mao̒ diila otameta lo manusia.

⁴ Allahu Taa̒ala boito aaripu daa̒ wau okawasa; tatoonu tamoo̒ taahangi moluwali to Eeya?

⁵ Allahu Taa̒ala mopo limbata hui̒dee lou̒ diila otaawa lo tau, lapatao̒ mopobubuu-linggayangao̒ wolo muluka wau mailaba muluka.

⁶ Allahu Taa̒ala mohutu mai liluhu tunggula huta molotau̒lo, wau wolihi polumude dunia moheheeula,

⁷ Allahu Taa̒ala mowali modini mato lodulahu mobutu tou̒ dimodupo, wau molaahangi popoo-liyamaalo motinelaa tou̒ hui.

⁸ Bilua̒du Eeya dulente daa̒ lou̒ diila bilantua; dilu-dilutaa̒a-Lio wulea naha lodeheto.

⁹ Pilopohuli lo Eeya jeejeri lo poliyama huliaalo to ayuntaala, wau olo poliyama Bulotu Kikiio̒, poliyama Belantik wau poliyama Karatika.

¹⁰ Diila opahaamuanto totoonulalo ilomata lo Eeya, diila mambo ito moia̒apo mumuu-jijatiyaalo Eeya.

¹¹ Eeya yilumaode totaluu̒, bo diila iloontongau̒; Eeya yilumaode laito totiliu̒, bo diila moi̒laalo olau̒.

¹² Wonu Eeya molambato, tatoonu tabuheli modini to Eeya? meaalo buheli mohintu to Eeya, ‘Wuu, Eeya donggo hemongola?’

¹³ Allahu Taa̒ala diila mongotonga muluka wau patu hilaa lo Eeya; tahi pomantua oli Rahab olo taa̒luku to Eeya.

¹⁴ Oditolio, woloolo mola wau̒ botie mowali mobata to Eeya? Tingga tataa-keyaalo wolo u polametuu̒?

¹⁵ Eleponu wau̒ diila ototala, wolo lotoluu̒, ngopohia mei̒ odehu hilao monto Allahu Taa̒ala hakimuu̒?

¹⁶ Humayaalio Eeya molametai wonu wau̒ mongiibodu, wau̒ molawalo, wolo otutu Eeya motuhatawa modungohe sualau̒?

¹⁷ Eeya lopotoyopu mai olau̒ todelomo dupotaa huloyongo, loduhengai dutoluu̒ lou̒ diila o alaasani.

¹⁸ Diila piloluli mai lo Eeya wau̒ helohiita napasi penu boli ngopee̒ mola; tumbao̒ bilangguwa-Tio olau̒ wolo opopaa̒ato ulaba-labaalo wau̒ losuukali ulaba-labaalo.

¹⁹ Wolo wau̒ musi mopobaalia lotolo wolo Eeya? Bo bilohilo, malo odito olotoolo-Lio! Humayaalio to Eeya wau̒ mopodudulao̒ lo aibu, tatoonu tabuheli motianga to Eeya ode bubutoo̒?

²⁰ Wau̒ debo molotolo hilao wau diila helohutu dusa, bo tunggiluu̒ debo odelo moloi̒ya u bolii̒o mao̒; timii̒du loi̒ya u miloodeli lo tunggiluu̒, debo odelo mopotala batangau̒.

^21-22 Wau̒ diila ototala, bo wau̒ diila paduli. Wau̒ motolu tumumulo. Olau̒ diduuluo upolohuna daa̒ poli; tao̒totala wau tao̒tutu, tutuuwauwa wambao̒ paladio: Allahu Taa̒ala mamopo binaasa mai duduuluolo.

²³ Wonu taa u diila ototala debolo mate mola, Allahu Taa̒ala bo moi̒ii̒ wambao̒.

²⁴ Dunia yiludu lo Allahu Taa̒ala ode tahi julukawa, wau mongo hakimu mapilohutu lo Eeya pitoo̒ ngoa̒amila. Pilohutu mai lo Allahu Taa̒ala ngoa̒amila botie, wonu diila Eeya, donggo tatoonu poli?

²⁵ Duduulahuu̒ lopaluto wolo molamemeta daa̒, lapatao̒ yiloolilo mola lou̒ diila loo̒laasa sanangi.

²⁶ Debo odelo bulotu molinggahu, tutumuluu̒ lolamemeto lopaluto, debo odelo linggahu bulungi bulia lotipadungo, lodehita mangusaalio.

^27-28 Wonu wau̒ ohilaa umiyomo wau moi̒ii̒ meengahu, wonu yimontalau̒ lipatou̒ mao̒ totoonulalo dutolo, yi duduutoluu̒ muli monguli mai, mohilapita olau̒; sababu otaawau̒, deu̒ Allahu Taa̒ala debo mopotala olau̒.

²⁹ Naa, wonu odito, paduli wolo wau̒?

³⁰ Diaaluo sabongi umoo̒ luluta dusaau̒!

³¹ Allahu Taa̒ala lopoloduo̒ olau̒ todelomo bountu, tunggula pakeyangiu̒ olo helo nganggapu olau̒ moo̒lonuo̒.

³² Humayaalio Allahu Taa̒ala boito diila manusia, wau̒ mamoo̒ tametao̒ o-Lio; lapatao̒ ami mamotaalua wolo bubutoo̒ u mopoo̒ lapato totoonulalo polohaamawa.

³³ Bo to wolota lami diaaluo hakimu tamowali momutoa̒ olami duulota.

³⁴ Pohileaala dua̒ Allahu Taa̒ala mohuheli mohukuumani mai olau̒ wau mopoo̒ lamingao̒ monto olilintolo Eeya!

³⁵ Wau̒ diila moohe to Eeya wau mamobisala botia, sababu otaawau̒ hilaau̒ lohihilao.