AYUBA 6 - KITABI HABARI MOPIOHE

Tei Ayuba

^1-2 Lapatao̒ tei Ayuba lolametao̒, “Humaya mao̒ susaau̒ tutu tilimengo lo buheetio,

³ tantu lebe mobuheeto wolo hungayo to auhe daa̒. Oditolio, diila mao̒ polinggolabu wonu loi̒yaau̒ laatao̒-laatao̒ wau tametameo̒.

⁴ Pana lo Taa Laba-labaalo kawasa lolaapata to batangau̒; peedilio loloo̒polo mola to ngoilanggubu jiwa wau batangau̒. Oheebati lo Allahu malo moo̒tihela hapato, wau luluhu olau̒ debo odelo pasuukani lomusu.

⁵ Kolodai mao̒lulia lohilao wonu wohiyalo huo̒yota muda, odito olo sapi wonu wohiyalo ua̒alolio.

⁶ Bo ua̒alo diila olamita tatoonu, tamohuto? Diila pongalo aakali putio̒ putito olamitio?

⁷ Diila mohuto wau̒ modedetao̒; molonuo̒ wau̒ wonu molamelao̒.

⁸ Yilongola Allahu Taa̒ala moomu modungohei dua̒au̒? Yilongola diila piloo̒tuo-Tio mai iiboduu̒?

⁹ Bolo potala Allahu Taa̒ala motuuhatawa mopotoyopu mai olau̒! Bolo potala Eeya motuuhatawa mohutu wau momate olau̒ mate-mateelo mao̒!

¹⁰ To olau̒ sua̒li boito madebo odelo poliyango; wau̒ mamo ngelungo to huungo polodutolo. Totoonulalo palenta lo Allahu Taa̒ala Taa Laba-labaalo mantali, maa dilungoheu̒ wau piloo̒ tuotuu̒ tulusi.

¹¹ Wolo olootoluu̒ botie tilinggula wau̒ debo donggo woluo? Wolo halaapaniu̒ u ohilaa tumumula mola lebe mohiheo?

¹² Wolo debo odelo toheeto botu batangau̒ botie? Wolo monto tombaha batangau̒ botie?

¹³ Malo pulito lotoluu̒ hemei̒ tulungi; to olau̒ madiduu̒ polotulungi.

¹⁴ To delomo dutolo debo odelo utie, he halaapuwou̒ mai sahabati tutu. Diila otaawa wolo wau̒ debo donggo molotolo hilao meaalo malo malonga Taa Laba-labaalo kawasa.

¹⁵ Bo timongoli, wuu mongo sahabati, tadiila mowali palacayaalo wau pongakuwalo. Timongoli debo odelo dutulaa u ilopulita lo taluhio, tou̒ didi diila helei dungga mai.

¹⁶ Timongoli debo odelo dutulaa u molilo wau bulabulai̒, sababu ilotau̒be lo salju wau esi.

¹⁷ Molamemeto wonu meidungga sembo polodulahe, salju wau esi boito moolu lou̒ diila obakasi. Wamoo̒ dutulaa lowali lohengu, diila o taluhu wau lohengu daa̒.

¹⁸ Mongo kapila yilapalo tou̒ mololohe taluhu; timongolio ode utoonulalo mao̒ wau yilate tohuta ohungo u luasi daa̒.

¹⁹ Kapila lonto Syeba wau lonto Tema mololohe taluhu boito wau heme haalapu moo̒dungga.

²⁰ Bo halaapani limongolio diila ohuna tobiihu dutulaa u diaaa̒ taluhio.

²¹ Debo odelo dutulaa boitolo timongoli, sahabatiu̒; yio̒ tilimouli wau yiloohe loo̒onto mao̒ dudutoluu̒.

²² Yilongola? Wolo wau̒ hemohile u hitua-tuwaua monto olemu? Meaalo mopoa̒hu olemu mosoloi̒ tau u polohuna daa̒ olau̒?

²³ Wolo wau̒ mei̒ poa̒ahu wau mei̒ toloto monto musu tadiila odehu hilao?

²⁴ Naa, poo̒laata mai wau̒, poi̒laalo mai totalau̒! Wau̒ mamo tipoo̒oyo wau modungoheo̒ loiyamu.

²⁵ Tataa-heyaalo u juujulu moo̒luli hilao, bo loi̒yamu bo latabu, diila oboliilio!

²⁶ Totoonulalo loi̒yau̒ he anggapuo limongoli dupoto wambai̒o; diila ohuna timongoli molametai olau̒ tamalo pulito halaapani.

²⁷ Tumbao̒ walao̒ didu otiilo otiyamo ilundi limongoli paladio, sahabatimu modudulo ilaakali limongoli u mowali kaya.

²⁸ Ntali, poo̒tuoti mai wau̒; diila pongalo aakali wau̒ botie mohimbulo mai olemu?

²⁹ Diila mao̒ pohutu udiila aadili, pongalatilo mola! Diila mao̒ pohentea̒ olau̒, wau̒ otutu diila ototala.

³⁰ Wolo to lantobumu wau̒ hemo himbulo, diila mowali mopo hiihede u mopiohe wau u oa̒aibu?