AYUBA 5 - KITABI HABARI MOPIOHE

¹ Pongibodulo mola, wuu Ayuba, wolo o totameto? Malai̒kati toonu tapei̒ tulungiamu mai?

² Bo taa u mohulodu wamabai̒o tamaate sababu ngongoto hilaalio.

³ Pee̒enta iloontongau̒ taa mohulodu; tutumulio oontonga odito motoheto. Bo debolo wamabi̒o yilaa̒anatiu̒ tambati biluloa̒lio.

⁴ Yi mongo walai̒o diila pee̒enta mao̒ loo̒tapu poloduo̒lo; diaaluo tamohuto mopoduulua olimongolio to bubutoo̒.

⁵ Wolo u tilipu limongolio to halabolulio, lopulito tilamelo lotaa udiila otua ombongio. Tumbao̒ pale u tohuungo oa̒ayua mooyoto, lopulito tilamelo lotaa motula hipolaanga. Miliki wau okokaya limongolio hemantahu lotaa u mangoa lohalata.

⁶ Diila monto dunia ololeeto tumoodei; diila monto huta usuusa tumoodei.

⁷ Diila! Bo manusia lohihilaolo tamopo dungga mai topotala to batangalio, debo odelo polotio̒ bunga lotulu tilumoodei lonto tululio lohihilao.

⁸ Wonu wau̒ todelomo owowo-luwowamu, to Allahu Taa̒ala wau̒ mamo ngiibode mola. To Eeyaalo wau̒ mamopo duloheo̒, wau mohudu mola palakalaau̒.

⁹ Totoonulalo ilomata lo Allahu Taa̒ala polu-polutuo̒; ito diila mabo momahamu mao̒. Totoonulalo moo̒linggolabe u pilohutu-Lio mai, diila oyia̒apa wau diila opulitio.

¹⁰ Tio mopo tuhutai didi odeitaato dunia, tilinggula halabolu wau huta udatahu wau luasi mobata ilobuhuta.

¹¹ Tiolo Allahu Taa̒ala tamopolaio̒ taa dupa-dupaapa, wau moposanangi tutu taa usuusa.

^12-13 Diila pilomata-Lio ranjana lotaa dadaata aakali u moleeto, ilohentobe wau yilau̒po Eeya taa motota, tilinggula ngoa̒amila tolopani limongolio diila lomata, wau timongolio iloyimbuloa lo aakali limongolio lohihilao.

¹⁴ Tou̒ dulahu mobaango timongolio odungga lou̒ diila botie mobaango, oa̒apao̒-oa̒apao̒ debo odelo tou̒ hui.

¹⁵ Bo Allahu Taa̒ala mopoa̒ahu: taa mosikini monto opopate, taa dupdupapa monto polodeehe.

¹⁶ Botia o halaapani poli totaa diila owolo-wolo. Wau taa moleeto motipoo̒yo wolo ngolihu bahasa, sababu tunggi-Lio mapilo poo̒yongao̒ lo Allahu Taa̒ala.

¹⁷ Pomajulo yio̒ wonu Allahu Taa̒ala mohimelu mai olemu! Diila mao̒ pongingi wonu Eeya mohentea̒ olemu.

¹⁸ Sababu Allahu Taa̒ala tamopo ngongoto, Tio olo tamo hunemo. Wau uluu̒-Lio u momate, olo muli moponguli.

¹⁹ Wonu topotala monganjamu mai, laito yio̒ piloa̒ahu.

²⁰ Wonu bolo ilodiaa̒a lo ua̒alo monganjamu, yio̒ diila tamate lo polaango. Wonu popaatea wali-walihuhu, yio̒ aamani monto mautu.

²¹ Yio̒ dilaha monto pitana wau mopotoodei hilaa lotau alihu mopatu; taluwamu baala lou̒ diila moohe.

²² Wonu o opoparangi wau polobiti molemba mai, yio̒ matatapu wau molotolo hilao tumbao̒ bo moi̒ii̒. Yio̒ diila molaasa moohe meaambo molawalo, motaalua wolo binatangi mongantau u ohilaa moluhu.

²³ Halabolu u padeo̒mu diila tao̒ botu; binatangi u molinggelo diila tamoluhu olemu.

²⁴ Yio̒ maa̒amani motibiluloa̒ to kemamu; wau wonu palakisaamu hihiimbamu, ngoa̒amilalo loa̒ahu, diila iliilangi penu boli tuwau mao̒.

²⁵ Walao̒ wau wombumu diila tao̒ yia̒apa, timongolio ngodaata huo̒yota tohuta udataha wau luasi.

²⁶ Debo odelo pale hilingota, ilotolo to sembolio, yio̒ olo matumumulo seehati tunggula panggola.

²⁷ Ayuba, ngoa̒amilalo boito maa pilalakisa lami. Loi̒ya boito otutu, oditolio tolimowalo wambao̒.”