AYUBA 42 - KITABI HABARI MOPIOHE

Tei Ayuba

^1-2 Tametao̒ lei Ayuba to Eeya, “Otaawa lo watotia, yaa Eeya, deu̒ Eeya Laa-labaalo kawasa; Eeya mambo mohutu mai penu boli wolo wambai̒o.

³ Eeya lohintu mai yilongola watotia buheli molingu to hikimati lo Eeya lebe-lebe pomao̒ wototia lohihilao diila motota lolo-loolo. Watotia helo bisala susuu-aliyaalo udiila opahamua lo watotia, pasali lo susuu-aliyaalo u malo moo̒linggolabu olo watotia botie.

⁴ Eeya helei̒ dungoheo̒ olo watotia tou̒ Eeya motahuda mai, wau mongohi totameto wonu Eeya mohintu mai.

⁵ Muloololio mai pongotota lo watotia pasali lo Eeya bo he ilodungohe lowatotia lonto tau wambao̒, bo botia ilotaawa lowatotia Eeya wolo lotaalua baya.

⁶ Masababu uito watotia moolito moe̒ela mola totoonulalo loi̒ya lowatotia wau wolo lolee̒ watotia helo tihuloa̒a to peaahuo̒ wau wahu.”

Poheu̒to

⁷ Tou̒ yilapato lotahuda mai odelei Ayuba, Eeya malo tahuda odelei Elipas, “Wau̒ lomuluka to olemu wau to sahabatimu duulota, sababu timongoli diila loloi̒ya u otutuulio mao̒ pasali lo batanga-U̒. Bo wato-U̒ tei Ayuba diila odito.

⁸ Naa, hamaalo mai botia pitu sapi ulai̒ wau pitu himba ulai̒, wau ponao̒lo odelei Ayuba. Lapatao̒ podewoa mao̒ ngoa̒amilalo boito odelo bake yilalango ode batangamu. Tei Ayuba mamodua̒ mola ode limongoli wau dua̒lio matolimoo-U̒. Timongoli diila tapoo̒olito-U̒, eleponu timongoli paatuti mololimo hukuumani. Timongoli diila helo loi̒ya u otutuulio mao̒ pasali lo batanga-U̒, hiambola tei Ayuba helo loi̒ya mao̒.”

⁹ Tei Elipas, Bildad wolei Jopar helo pohutu mao̒ wolo u piloa̒hu Eeya, wau Eeya lololimo dua̒ lei Ayuba.

¹⁰ Lapatao̒, tou̒ tei Ayuba lodua̒ mola ode sahabatilio toulota boito, Eeya maluli lopokaya mai olio wau helongohi olio poo̒oluo piu̒wa lonto totoonulalo hakuulio u muloololio mai.

¹¹ Ngoa̒amila tahulango wau wutato taabua lei Ayuba, wau ngoa̒amila tamoo̒taawa wolio talo hiheo, mai lobiilohe wolio lapatao̒ helohutu potihunggu pee̒-pe̒enta wolio tobelelio. Timongolio lopoi̒laalo pongolaasa limongolio u limilimi to tilolahepaalo usuusa u mapilopo dungga mai lo Eeya to olio, wau helo liyanga olio. Ngota-ngota towolota limongolio helongohi mao̒ ngojumulaa doi wau hua̒limo hulawa ngobotu odelei Ayuba.

¹² Tei Ayuba bilarakati mai lo Eeya wolo diila o eengadelio todelomo labito tutumulio, wolo maasa tou̒ tio diipo heloo̒ toduo mai marapo. Tei Ayuba helo tolomiliki mopulaa pato lihu batade himba, wolomo lihu unta, dulolihu sapi, wau ngolihu kolodai.

¹³ Tio heloo̒tapu walao̒ pitulota mongo lolai̒ wau toulota walao̒ mongobua.

¹⁴ Walai̒o taabua tabohulio iluntelio Yemima, tao̒luolio Kejia, wau tawaliyali daa̒ Kerenhapukh.

¹⁵ To ngoilanggubu lipu diaaluo tadulahu debo odelo gaaga lowalao̒ taabua toulota lei Ayuba boito. Timongolio heilohia tayadu todelomo wariisani liyamolio, tutuuwauwa wolo mongo wutati mongolio mongo lolai̒.

¹⁶ Lapatao̒ uito tei Ayuba donggo tilumumula mola ngohetuto wopato pulu lotaunu hiheolio, tilinggula tio dongo ilohiangio loo̒onto tomongo wombulio wau mongo walai̒ mongolio.

¹⁷ Lapatao̒ tei Ayuba yilate to umulu u panggola daa̒.