AYUBA 41 - KITABI HABARI MOPIOHE

¹ Tingga mowali wau̒upomu tihuayo Lewiatani, bo wolo oa̒ilo tola ngomato? Tingga mowali dilalio awadumu wolo tataa-liyaalo pongawadu?

² Tingga mowali yio̒ momasi mao̒ tali to wulingio meaambo aito wate to walelio?

³ Pongalo aakali tio momolohone olemu u mei̒ bebasiyalo? meaalo moheeluma wolemu lopatolo?

⁴ Pongalo aakali tio mohutu polo akolowa wolemu, wau modanti malaito momaya olemu?

⁵ Pongalo aakali yio̒ mongawadeo̒ olio debo odelo bulungi hebiahulo, u moposanangi mongowato taabua?

⁶ Pongalo aakali tio podaahangi lo lotahi pohalawa wau taya-tayadulo towolota lotahi podaahangia?

⁷ Tingga mowali tooo̒mu alipio wolo totobuo̒ omato totolu meaalo pai̒yomu tio wolo totobuo̒ limbulimbu molaapata to lunggongio?

⁸ Tengguli mao̒ tio pee̒entapo, wau diilalo mao̒ wuliyamu poli; polobaalia boito diila talipatomu ohiheo-hiheolo mao̒.

⁹ Timii̒du taa u moo̒onto Lewiatani, mamowali molulupuhu tulusi modehulo mola didu motota lou̒ tau.

¹⁰ Tio parangiolo wonu bonguloolo monto otuluhelio; diaaluo penu boli ngotaa mao̒ tabuheli timihula totalulio.

¹¹ Tatoonu tamowali moluhu olio lou̒ diila otohauta lo topotala? To dunia botie diaaluo tamambo mohutu mao̒.

¹² Duloolo wungguliyou̒ mai tomimbihu lowawao̒ pongawaa̒ lo Lewiatani, pasali olootolio wau modeliilio u gaaga.

¹³ Diaaluo penu boli ngotaa mao̒ tamoo̒ kaidingo boo̒lio ambahu bulemengio meaalo mopo laapata boo̒ lo popaatea u pakepake olio.

¹⁴ Tatoonu tamoo̒ hua̒atao̒ tunggilio uhaya-hayao̒ u motoheto, tuatuanga duduu-ngitowalo u moo̒tihela hapato?

¹⁵ Debo odelo porisai leiwoludu, uitolo wuleaalio, leidembinga modetoa̒, debo odelo botu totohetio.

¹⁶ Tinggai dedeehea, leitihuta daa̒, tilinggula penu boli dupoto diila moo̒ tuotao̒.

¹⁷ Porisai boito odito totoheto aa̒aita tilinggula diila pongalo aakali pohalahulo.

¹⁸ Wonu bolo Lewiatani moboolo, momo lotio̒olo mola tinelo; matolio umilato debo odelo butulio mato lodulahu.

¹⁹ Dila lotulu yilumualai loloo̒po lomola lonto tunggilio; bunga lotulu helo popoolotio̒ ode utoonulaalo mao̒.

²⁰ Poloo̒ lohubulo lonto delomo wulingio, debo odelo poloo̒ lo ayu podiio̒ towalungo ulongo.

²¹ Napasiilio moo̒ lei̒ta bohu; lei̒to tulu lumualai monto ngangolio.

²² Dangungulio odito tohetio, tilinggula ngoa̒amilalo moohe totalulio.

²³ Diaaluo tambati moluluhio̒ to alipio; diila pongalo akali mopoo̒ sababu debo odelo toheto waja.

²⁴ Hilaalio debo odelo toheto botu, diila motota lou̒ molawalo molotolo wau motoheto, debo odelo botu lo hihiilinga.

²⁵ Wonu tio timihula mola, penu boli tamolotolo daa̒ oolia lo buheli, pohutuolio mao̒ diilalo olotolo sababu moohe daa̒.

²⁶ Diaaluo wamilo umoo̒ pali olio; totobuo̒, pana boli totobuo̒ limbulimbu diila moo̒ ngongoto olio.

²⁷ Wate ilanggapulio debo odelo aaluti lo huhuu-oyotowalo wau tombaha debo odelo luhihio̒ ayu lo heo̒buutua lo huhuu-ngowaalo.

²⁸ Diaaluo pana umoo̒ lanenga olio; botu u pomahulolo to olio debo odelo laato wambai̒o.

²⁹ Tunggudu ilanggapulio huo̒yoto ngopata u mohengu; tio moi̒ii̒ wonu tau momai̒ olio wolo totobuo̒ limbulimbu.

³⁰ Tolitio̒ to ombongio debo odelo poo̒ lo yinggilua u moluito huudio. Debo odelo pakaakasi pongaahu tio helo ngaahu latao̒ wau lomutao̒ olio.

³¹ Deheto kilaahio tilinggula lowali debo odelo taluhu lombu-lombula; Debo odelo panji hepo tubuwalo winulo u hibui-buiya.

³² Tio lololaa mao̒ bakasi liyodu lo oa̒ato u motinelo, deheto yilomeelio lowali bui u moputio̒ lakulio.

³³ Toitaato dunia diaaluo baliilio; mahaluku udiila moo̒onuhu moohe, ui-uitolo tio!

³⁴ Penu boli binatangi u oontonga laba-labaalo moo̒heerani sababu udaalio bilohelio hina; towolota totoonulalo binatangi mongantau, tio-tiolo olongia.”