AYUBA 4 - KITABI HABARI MOPIOHE

POLO-BISALAWA BOHULIO 4:1–14:22 Tei Elipas

^1-2 Lapatao̒ malo bisala tei Elipas, ualio mao̒: “Ayuba, wolo yio̒ molee̒ wonu wau̒ mobisala mai? Diila mambo wau̒ motipo̒oyo batanga lebe mohiheo.

³ Dadaata tau mailohiyamu pongaajali, wau timongolio tahi luupuhe mapiloo̒ lotolumu.

⁴ Tataaheemu umongohi sumaangati, mopobongu taa u meiteduo̒, mototolo mohilao wau moongolo.

⁵ Bo botia yio̒ lohihilao ilodungga lo limilimi; yio̒ iloohea, wau lowali yilooli halaapani.

⁶ Diila maa yio̒ tadebo wau molotolo hilao to Allahu Taa̒ala; diila tutumulumu udiila o aibu? Wonu odito, patutiliyolo yio̒ yakini mola wau diila mooli halaapani.

⁷ Pikiiriyalo mola, wolo mapee̒enta woluo taa udiila ototala ilodungga lo topotala wau musiba?

⁸ Otaawau̒ monto bibiilohuu̒ taa u momadeo̒ halabolu ololeeto, wau momua̒yade bili lobaala odelo bili lo pilomulo, mamolipu u topotala wau osuukali!

⁹ Debo odelo dupoto moo̒ohuu̒ daa̒, odi-odieelo mola muluka lo Allahu Taa̒ala mopobinasa mai olimongolio tunggula mopulito!

¹⁰ Taa moleeto moheuwanga wau motingohu daa̒ wau hayahaya, debo odelo singa timongolio humoyongo wolo suala moo̒ohuu̒. Bo Allahu Taa̒ala loheu̒to tunggilo lotipoo̒oyo toli mongolio wau lomoli duduu-ngitio.

¹¹ Timongolio yilate debo odelo singa ilopulita lo ua̒alo, tilinggula mongo walai̒o helo bubuua̒lawa diila ota-otaa mao̒.

¹² Pee̒enta tuwaulio lowahi leidungga mai ode olau̒, debo odelo lohuuma moa̒aluti todelomo bulongau̒.

¹³ Tuutuluhuu̒ ilotolosoa wau ilogodaalio, debo odelo loo̒ tohiilopo u mobulilo tou̒ hui modio̒loma tutu.

¹⁴ Wau̒ olo iloohea mola wau polo-polopalio; ngangaawaa̒lo wawaau̒ hilumeulo moo̒ohuu̒ hulu-huluhelio.

¹⁵ Dupota mobata mohiipo wopo-woopoto helo lenggula bayau̒, yi tilimihela lomola hapatuu̒.

¹⁶ Tuwaulio lobatanga tilimihulao̒ totaluu̒; Piloo̒ tuotuu̒, bo tio deli to olau̒. Lapatao̒ ilodungoheu̒ tingohu suala helomoo̒ oduo̒otio lo owowoluwoa,

¹⁷ ‘Wolo pongalo aakali manusia diila ototala totalu lo Allahu Taa̒ala? Wolo pongalo aakali tio diila o aibu tomato lo Talo powali mai olio?

¹⁸ Tumbao̒ mongo wato lo Allahu Taa̒ala tosologa, diila mowali palacayaa-Lio. Tumbao̒ to mamaa-lai̒kati-Lio ilodunggaa-Lio totala wau aibu.

¹⁹ Lebelebe pomao̒ mahaluku monto huta modudangia mahaluku peaahuo̒ u mowali pitiloolo debo odelo titio̒!

²⁰ Mahaluku boito tumutumulo tou̒ dimodupo, lapatao̒ mate iloloihia tou̒ lolaango, wau u ohiheolo mao̒ diilalo otoloma.

²¹ Yi yiloolilo mola totoonulalo u mililiiki; tio olo yilate lou̒ diila loo̒tapu pikiilangi seehati.’