AYUBA 39 - KITABI HABARI MOPIOHE

¹ Wolo otaawamu omolua batade lo hui̒dee pilotutu mai liilolio? Wolo mapee̒enta ilimatowamu buu̒lu molinggelo lopotutu mai lo walai̒o?

² Tingga otaawamu ngoolo mola hiheolio buu̒lu boito ombodaa̒? Tingga mowali tou̒ mopotutu mai yia̒apamu?

³ Wolo otaawamu omolua bubuu-uluwaalo boito helo tinggou lo wawai̒o, tulusi helo potutu mai lomongo walai̒o?

⁴ Mongo walai̒o he oduhenga mola udaa̒ wau molotolo tohuta luasi udiila tilolopani; bubuu-uluwaalo boito lonao̒ wau diila helo hualingai ode liilolio.

⁵ Tatoonu talomuli kolodai molinggelo to oa̒ayua? Tatoonu talomua̒de talilio wau lopoluli mao̒ lojalena odito mota odia mai?

⁶ To olio boito wohiya-U̒ huta luasi udelita odelo belelio wau huhuu-tawaalo udatahu wau luasi watingo u tambati biluloa̒lio.

⁷ Tio lopoo̒ lamingao̒ lonto kokoo-tawaalo wau oraamelio, diaaluo tamowali mopoluwamo wau mopokalaja mao̒ olio.

⁸ Huta luasi u pilobutua lo huo̒yoto to hui̒dee tambati lo ua̒alolio, yilolohio pilomulo u moidu mola teto.

⁹ Wolo sapi molinggelo mohuto mokalaja to olemu? Wolo mohuto tio motihui todelomo lantungamu?

¹⁰ Tingga mowali tihutomu tio boito wau pakusaamu momadeo̒ to olemu? Tingga mowali ahulamu sapi boito moheideo̒ to halabolumu?

¹¹ Tingga mowali pongakuwamu omambolio umolotolo, wau wuduomu tosapi kalajaamu u mobuheto?

¹² Wolo palacayamu sapi boito mohimoa̒ sembomu, wau modelo mai ode tambati hepo lotaa̒amu sembo?

¹³ Mailaba linggahio pepelo polipio̒ lo bulungi unta! Bo tomboto duwayo diila o yilabotalio.

¹⁴ Bulungi unta momutito tohuta, lapatao̒ tolaalio; yi hungayoolo umamo popatu putitio.

¹⁵ Bulungi unta diila mongalati deu̒ tanu olumbetaa̒ lotau putitio wau bibii-natangiyalo molinggelo molumbetao̒ olio.

¹⁶ Tio osikapu debo odelo walai̒o boito diila milikiilio; tio diila pandungi wonu tolopanilio diila ohuna wambai̒o.

¹⁷ Wau̒lo talohutu olio lowali mohulodu wau abaloolo, diila yilohiu̒ olio hikimati wau aakali.

¹⁸ Bo wonu bolo tio matumeteo̒ moo̒ohuu̒, yi maa olaahelio wadala wau jokilio.

¹⁹ Wuu Ayuba, wolo yio̒ talongohi lotolo towadala wau huwoo̒ ulambe mao̒ lambe mao̒ to dangungulio?

²⁰ Wolo yio̒olo talopoa̒hu towadala lumantia̒ debo odelo bulita, wau wolo hilaolio moo̒huu̒-huu̒ulo mola mopoo̒ohe-oohe totau?

²¹ Tio mongahu huta to lumbaya wolo wengahu, wau sumaangati lealeaatu heloluhu ode tanalapa polo huluwalo.

²² Diila otawaalio boliilio lo humuhela wau moohe; diaaluo wamilo umoo̒ onggolao̒ olio.

²³ Tingolo u tahitahio̒ lo tamootae̒a olio kele-kelee̒eto wau umilapo otuhata lo tinelo.

²⁴ Wolo sumaangati wali-walihuhu wadala boito tumeteo̒; wonu torompoti motingohu tio diila moo̒ otongo batanga.

²⁵ Tio mohilao moo̒huu̒-huu̒ulo mola timii̒du torompeti potingohulo monto u molamingo ilobowalio boolo polotuhua. Ilodungohelio wuwaatio̒ lomongo polowila tou̒ timongolio hemongohi palenta.

²⁶ Wolo bulia ilaajalimu tumomboto wonu tio motidulunga ode huliaalio wolo polipio̒ oa̒a-oa̒abu?

²⁷ Wolo palentaamu diludua̒ lobulungi rajawali tou̒ tio diipo lohutu beelealio to hui̒dee molanggato?

²⁸ To bolitutuo̒ hui̒dee botu tio lomongu belelio; huudu boboo-tuwaalo u hilalita lowali biintengilio.

²⁹ Lonteeto tio longimato ode totoonulalo mantahu matolio helo hehulaa lopeehu mangusa.

³⁰ Tou̒toonu woluo u mate, teteetolo tio, wau duhu lo mangusa boito heililu lomongo walai̒o.