AYUBA 36 - KITABI HABARI MOPIOHE

^1-2 Dungohilo ngopee̒e pomola poli wau posabalilo, donggo woluo u maloi̒yau̒ mai domi Allahu Taa̒ala.

³ Pongototau̒ luasi; mapohunaau̒ mai uito u mopo bukuti mao̒ deu̒ aadiliilo Talopowali mai olau̒.

⁴ Loi̒yau̒ diaaluo u paaluti; taa u otutu aaripu woluo totalumu.

⁵ Allahu Taa̒ala boito molotolo boli buheli daa̒, totoonulalo u hitua-tuawaua o pahaamua lo Eeya. Diaaluo penu boli ngotaa mao̒ tabilohe lo Eeya hina.

⁶ Taa u odusa diila piloluli lo Eeya tumumula mohiheo, Eeya mongohi mai u aadili totaa u hiduutola.

⁷ Tau-tauwalo juujulu he piloo̒tuoto lo Eeya, pilohutu lo Eeya timongolio okawasa debo odelo mongo olongia, tilinggula timongolio hurumatiolio ohiheo-hiheolo mao̒.

⁸ Bo wonu tau punguolio wolo rante wate, wau modutolo akiibati lo huhutuulio lohihilao,

⁹ yi dusa wau obatingga limongolio mahuo̒o lo Allahu Taa̒ala.

¹⁰ Ilahulalio timongolio modungohe u piloe̒ela-Lio mai wau mololaa mao̒ ololeeti mongolio.

¹¹ Wonu timongolio modudua̒a to Allahu Taa̒ala wau motiwato to o-Lio, yi timongolio tumumula dame wau maa̒amuru demola pulito lo tutumulio.

¹² Bo wonu diila modungohe, yi timongolio mate todelomo ohulodio.

¹³ Taa u diila o eeya hemolahu oyiyingo; penu boli hukuumanio lo Eeya, diila mohuto timongolio mei̒ tulungi.

¹⁴ Timongolio mate lo woongolo daa̒ tomaasa humulaalio, sababu tutumulio polupolu lohina.

¹⁵ Allahu Taa̒ala mongaajali manusia moli dudutolo, Eeya momake osuusa u mopongalati mai olio.

¹⁶ Allahu Taa̒ala malo lopatai olemu lonto usuukali, tilinggula yio̒ loo̒ toduo mai aamani, wau meja lo yintaamu polupolu lo ua̒alo.

¹⁷ Bo botia motuuu̒de wolo ololeetumu, yio̒ mololimo hukuumanimu.

¹⁸ Poo̒dahailo, yio̒ diila bolo oimbuloa lodoi sooroi̒; diila mao̒ yio mowali lapaloolo sababu lo okokaya.

¹⁹ Diila ohuna wambai̒o yio̒ mongiibodu mei̒ tulungi, diila ohuna totoonulalo omambowa wau olootolumu.

²⁰ Diila mao̒ wooloolamu hui u modio̒lomo, saaa̒tilio lo babaa-ngusawalo binasa wau mooli.

²¹ Poo̒dahailo, diila mao̒ pomalingo ode ojuluhaka. Dutolumu milakusudu alihu tolaamu mao̒ u moleeto.

²² Eelailo, Allahu Taa̒ala boito otutu udaa̒ kawasaa-Lio. Tingga woluo guru debo odelo oheebati-Lio?

²³ Tatoonu tamowali molantu dalalo to Eeya meaalo buheli mopotulude to Eeya hemohutu totala?

²⁴ Laito Eeya pujiolo sababu huhutuu-Lio, wau yio̒ olo paatuti moduduo̒, modungohe palenta lo Eeya.

²⁵ Ngoa̒amila tau moo̒onto huhutuu-Lio; bo diaaluo penu boli ngotaa mao̒ tio̒otutua moo̒ paahamu to Eeya.

²⁶ Allahu Taa̒ala otutu molamahu, diila otonea̒anto Eeya meaambo moia̒apo taunu-Lio.

²⁷ Allahu Taa̒ala talo mantango taluhu lonto dunia lowali heengo lapatao̒ lolomelao̒ lowali heeheto taluhu didi.

²⁸ Eeya lomopaa̒ai didi lonto heengo; pilomuhutai lo Eeya ode yitaato umati lomanusia.

²⁹ Diaaluo penu boli ngotaa mao̒ mongalati oliyoo̒ lo hehee-ngowaalo wau tingohu lo bulongodu to hulungo tambati piloti poo̒oyo lo Allahu Taa̒ala.

³⁰ Eeya lolinelaa ngoilanggubu hulungo wolo ilato, bo wamoo̒ deheto debo modio̒lomo tutu.

³¹ Uitolo dudeloolio Eeya helo potumulo babaa-ngusawalo wau helongohi mai ua̒alo u dadaata tutu.

³² Eeya loheu̒upa ilato wolo uluu̒-Lio wau lopoa̒hu olio modehito timantahu lo Eeya.

³³ Tingohu bulonggodu tuotio deu̒ dutalo mamolemba, penu boli bibiahe olo motota deu̒ dutalo daa̒ hua̒a meidungga.