AYUBA 35 - KITABI HABARI MOPIOHE

^1-2 Ayuba, yio̒ tilala wonu molantobu deu̒ totalu lo Allahu Taa̒ala yio̒ diila ototala.

³ Yio̒ tala wonu mohintu, wolo aangio lo dusamu to Eeya; wau pae̒eda wolo u tolimomu wonu yio̒ diila helohutu dusa.

⁴ Wau̒lo tamaa mongohi mai tameto olemu wau olo tomongo sahabatimu boito.

⁵ Bilohilo mola to hulungo wau poo̒tuotilo donggo boli langgatio lo hehee-ngowaalo.

⁶ Wonu yio̒ odusa, Allahu Taa̒ala diila taaluhi. Wonu totalaamu dadaata, Eeya diila oa̒anga.

⁷ Wolo mohutu mopiohe, Eeya diila bantuamu. Otutu, Eeya diila momalalu penu boli wolo monto olemu.

⁸ Bo timongotamu tailuhialio wolo duduu-saamu. Eeya olo tao̒paae̒da wolo opopiohumu.

⁹ Tau-tauwalo tahe dileehe mamopo ilaalo suusa sababu ngongotio; timongolio monguatio̒ mei̒ tuulungi.

¹⁰ Bo diila ode Allahu Taa̒ala, Talo powali mai olio tahe mongohi mai halaapani tou̒ timongolio limilimi,

¹¹ wau tahe mongohi mai tomanusia aakali wau watade mongilabotao̒ bulungi wau binatangi todunia.

¹² Tau-tauwalo tahe dileehe boito mongiibode, bo Allahu Taa̒ala motipoo̒oyo sababu timongolio moleeto wau polupolu lo batingga.

¹³ Diila ohuna timongolio monguatio̒ tio̒opatea; Taa Laba-labaalo kawasa diila momilohei meaalo modungohe olimongolio.

¹⁴ Ayuba, lebe-lebe pomao̒ poli wonu yio̒ moloi̒ya deu̒ yio̒ diila moo̒onto to Eeya, wau palakalamu mailoluo totalu lo Eeya wau yio̒ hemohima mai to Eeya!

¹⁵ To lantobumu Allahu Taa̒ala diila mongohi mai hukuumani wau diila mopoo̒ tuotai totala.

¹⁶ Diila ohuna biisalamu tolongamu mola; malopatatai, deu̒ diila otaawamu wolo u heloi̒yamu.