AYUBA 34 - KITABI HABARI MOPIOHE

^1-2 Tingga diila timongoli tamotoloo̒ wau oa̒akali boli owatade? Naa, dungohilo totoonulalo loi̒yau̒ botie.

³ Otaawa lotau ua̒alo motabo wonu lamitalio, wau tataa-heyaalo molinepo wonu dungohelio.

⁴ Sua̒li botie musi palakisanto lapatao̒ pee̒-pee̒enta ito mololohe dalaalio.

⁵ Ualei Ayuba mao̒, ‘Diaaluo totala to olau̒, bo Allahu Taa̒ala diila lohuto longohi mai wolo u aadili to olau̒.

⁶ Wau̒ ilanggapu lohimbulo, sababu wau̒ loloi̒ya diila odusa. Botia paliiu̒ tiluhua, eleponu wau̒ diila ototala.’

⁷ Wolo timongoli mahe loo̒onto tau debo odelo tei Ayuba botie? Tio helo hentea̒ to Allahu Taa̒ala wuwuulia.

⁸ Tio ohilaa moheehea̒ wolo tau-tauwalo tamomaahu to palenta, wau moa̒awota wolo tau-tauwalo moleeto.

⁹ Tio moloi̒ya, deu̒ diila ohuna wambai̒o wonu tio motolopani mohutu kahandaki lo Allahu Taa̒ala.

¹⁰ Wuu tau-tauwalo tamolinepo, dungohilo! Diila pongalo aakali Allahu Taa̒ala Taa Laba-labaalo kawasa mohutu mai totala?

¹¹ Eeya momate mai manusia tutuuu̒de wolo huhutuulio, mopohutu olio tutuuu̒de wolo pii̒liilio.

¹² Allahu Taa̒ala Taa Laba-labaalo kawasa diila mohutu mai u moleeto; ngoa̒amila tau yilohia mai lo Eeya u aadili.

¹³ Monto tatoonu Allahu Taa̒ala mololimo kawasaa-Lio? Tatoonu tahelo pomalacaya mao̒ dunia botie to Eeya?

¹⁴ Humayaalio Allahu Taa̒ala momahuto nyawa lomanusia, wau muli mahama napasi lo tutumulio,

¹⁵ yi mateelo mola ngoa̒amila mahaluku u onyawa, wau manusia mowali peaahuo̒ debo odelo muloololio mai.

¹⁶ Naa, wonu yio̒ aaripu, poo̒tuotilo, taala mao̒ bulongamu wau dungohilo.

¹⁷ Wolo Allahu Taa̒ala taa̒adili wau molotolo boli buheli daa boito potalaamu? Wolo to lantobumu Allahu Taa̒ala molonuo̒ u aadili?

¹⁸ Allahu Taa̒ala mohukuumani mai olongia wau takawa-kawaasa wonu timongolio moleeto wau momaahu topalenta.

¹⁹ Eeya diila motiwambao̒ tomongo olongia, meaambo mopou̒daa̒ taa kaya wolo taa mosikini. Sababu timongolio ngoa̒amila yito pilopowali mai lo Eeya.

²⁰ To tomutaa̒ lou̒ hui, timongolio mowali mate wolo tumahuo̒lo mola. Allahu Taa̒ala mohukuumani mai takawa-kawaasa wau timongolio olo binasaalo mola; wolo gambangi patee lo Eeya mate-mateelo mao̒ taa molotolo boli buheli daa.

²¹ Eeya hemo ngimato mai tutumulo manusia, oontonga lo Eeya totoonulalo didiambangio.

²² Diaaluo u modio̒lomo, penu boli woloolo mola hulangio, u mowali potituua̒ lotaa odusa.

²³ Diila palalu Allahu Taa̒ala molantu mai saaa̒tilio, manusia monao̒ mai u aadilio lo Eeya.

²⁴ Lou̒ diila motulete wau momalakisa Eeya mopohinggi takaawasa wau momudua̒a tamobuulota wolio.

²⁵ Sababu, otaawa lo Eeya wolo u hepohutuo limongolio; yi Eeya mopodehu wau mongantulu olimongolio tou̒ hui.

²⁶ Timongolio tilambali lo Eeya sababu dusa limongolio, totalu lotaa dadaata timongolio hilukuumani lo Eeya.

²⁷ Sababu, timongolio diila lodungohe kahandaki lo Eeya wau diila lomandungi totoonulalo palenta lo Eeya.

²⁸ Timongolio loo̒sababu taa mosikini helo poi̒laalo susa hiyongi mongolio dilungohe lo Allahu Taa̒ala.

²⁹ Wonu bolo Allahu Taa̒ala molantu mai u motipoo̒oyo wambao̒, diaaluo penu boli ngotaa mao̒ tabuheli motulete wolo tombipidu to Eeya. Wonu bolo Eeya moluuo̒ baya-Lio, diaaluo penu boli ngotaa mao̒ tamoo̒ dungga to Eeya.

³⁰ Yi babaa-ngusawalo diila o olootolo u mongabuta polodeehe moleeto u okawasa.

³¹ Ayuba, wolo dusamu to Allahu Taa̒ala mai̒laakumu? Wolo yio̒ malodanti diilalo mohutu dusa?

³² Wolo yio malo molohone mola alihu poi̒laalo mai lo Eeya totalaamu? Wolo yio̒ malotadia mopohuheli huhutuumu boito?

³³ Diila pongalo aakali Allahu Taa̒ala mamoe̒ela wolo u otohilaamu, lapatio mao̒ huhutu lo Allahu Taa̒ala diila ilakolowamu? Botia, yio̒ tamusi molantu mao̒, diila wau̒. Poleleaalo mai wolo huhamaamu!

³⁴ Ngoa̒amila taa aaripu tantuulo maa̒akolo mao̒; taa molinepo tamo dungoheo̒ olau̒ mamoloi̒ya

³⁵ deu̒ tei Ayuba hemo bisala lou̒ diila mongalati, wau loi̒yaalio diila oboliilio.

³⁶ Wonu tataa-heyaalo lei Ayuba bilohelo wolo ulintapo, mamoi̒laalo deu̒ bisalaalio debo odelo taa moleeto.

³⁷ Totalaalio luli iloduhenga wolo dusa tuwau; tio helo malakala to Allahu Taa̒ala, wau helohina Eeya totalunto.