AYUBA 30 - KITABI HABARI MOPIOHE

¹ Bo botia wau̒ hilantia̒ lotaa ulebe humula wolau̒. Muloololio tiyamo limongolio hebiloheu̒ hina daa̒ u hemodaha himbau̒ wolo apula diiti.

² Olau̒ timongolio diila ohuna sababu mailo pulita lo lotolo.

³ Timongolio pilolaango wau helo dutolaa daa̒, tilinggula helo lamela waa̒ato u mohengu tohuta luasi udelita udiila otau.

⁴ Timongolio helo monggato diu̒to tohuta luasi udiila tilolopani lapatao̒ lolamelao̒ mopio duungo boli waa̒atio.

⁵ Timongolio pilolontulo wolo tingalao̒ debo odelo lopolontulo tamootao̒wa.

⁶ Timongolio lotibiluloa̒ todelomo gogoowalo; huhuu-wangowaalo to dingingo hui̒dee lowali bele limongolio.

⁷ To oa̒ayua polodu timongolio hemo heuwanga debo odelo binatangi, heloti polemboa̒ to walungo pilomulo aa̒ayuwaalo kekeei wau moopa.

⁸ Timongolio diila otanggulo wau diila ohalaga, tau-tauwalo tamaa yilanengo lonto lipulio.

⁹ Botia timongolio lonao̒ mai wau wau̒ hepilo iii̒yalio; to olimongolio, wau̒ botie bo garapu ngoa̒amilalo.

¹⁰ Wau̒ hebilohe limongolio hina wau kootolo, tumbao̒ bayau̒ heponula loiyohu limongolio.

¹¹ Sababu Allahu Taa̒ala lohutu mai olau̒ molulupuhu diila o lotolo, timongolio diila hemo pobunto-bunto hemoluhu wolo majanunu limongolio.

¹² Woomboa boito heloluhu olau̒ lonto talu, wau dudehuu̒ mairanjana limongolio.

¹³ Timongolio hemongabuto dalaluu̒ u mopobinasa olau̒; diaaluo penu boli ngotaa mao̒ talolanggu tou̒ timongolio moluhu.

¹⁴ Debo odelo taluhee daa̒ timongolio helohupao̒ dingingo meeseli lo biintengiu̒; ramerame timongolio lonao̒ mai helodeehe batangau̒.

¹⁵ Otihela hapato lohenggubei batangau̒; debo odelo hiipo dupoto, halaga lo batangau̒ lopaluto; debo odelo heengo yilumaode, mailooli lomola osanangiu̒ tutu.

¹⁶ Botia ngopee̒ yilateelo mola wau̒; diaaa̒ u moo̒heelo todelomo dudutoluu̒.

¹⁷ Tou̒ hui ngoa̒amila tulaluu̒ molilintolo; raasa ngongoto u hemoluhi diila ohuhe-huheelilio.

¹⁸ Allahu Taa̒ala helodihu tioopatea olau̒ to karaki lo boo̒ou̒ tilinggula pakeyangiu̒ lotidahuhi to wawau̒.

¹⁹ Ode delomo latao̒ wau̒ pilomuhulo Eeya, wau̒ lowali debo odelo puputo wambai̒o!

²⁰ Watotia helo ngiibode mola to Eeya, yaa Allahu Taa̒ala, Eeya diila helo lametai olo watotia; wonu watotia modua̒ mola, Eeya diila helo poo̒tuotai to watotia.

²¹ Eeya helo tiparangi mai olo watotia, Hedileehe lo Eeya watotia wolo ngoilanggubu olootolo Eeya.

²² Eeya lopoluli mai wototia pilolaao̒ dupoto; todelomo dutalo pilopo bale-baleyango lo Eeya batanga lowatotia.

²³ Otaawa lo watotia, dilelo lo Eeya watotia ode aalamu lo mautu, tambati lo ngoa̒amila tahitumula ilaambu.

²⁴ Yoliongola Eeya heloluhu taa u tilopotala, tadiila mowali mohutu penu boli wolo ngopohia momolohone odehu hilao̒?

²⁵ Diila mawatotia tahilu moyongo wolo taa u hisuusawa, wau helo tolia̒ngo tai̒lo diaaluo?

²⁶ Watotia hemo halapu mai sanangi tutu wau u mobaango, bo usuukali wau u modio̒lomo lomola ulotoduo mai.

²⁷ Watotia he ilaantango lohilaa suusa wau suukali daa̒; dulahu odungga dulahu helebe dadaata mola dilutolaa lowatotia.

²⁸ To delomo diila boti mobango, diila o tinelo, watotia helonao̒ ode utoonulalo mao̒; watotia tilimihulao̒ totalu lotaa dadaata, helei̒ tuulungi.

²⁹ Suala lo watotia siluukali polupolu lo odehu hilao debo odelo hiyongo soligala wau bulungi unta.

³⁰ Alipo lowatotia lowali loitomo; batanga lowatotia pilobu lo polipotolo.

³¹ Muloololio mai heilo dungohe lowatotia muusiki umoo̒ wengahe hilao, botia bolo hiyongo hilimuta ngoa̒amilalo.