AYUBA 3 - KITABI HABARI MOPIOHE

Poloilaalo suusa lei Ayuba ode Allahu Taa̒ala

¹ Lapatao̒ tei Ayuba malo bisala wau helo laa̒anati dulahu ilowaliilio mai, ualio mao̒,

^2-3 “Yaa Allahu Taa̒ala, laa̒anatialo dulahu ilowali mai lo watotia, wau hui tumula mai watotia todelomo talomo liilo lo watotia!

⁴ Yaa Allahu Taa̒ala, powaliyalo mai dulahee boito modio̒lomo, ambunguolo lulutalo monto toloe̒ela lo Eeya tunggula mooli; ambunguolo diila mao̒ polulia lo Eeya olo tinelaa mobaango molinelaa olio.

⁵ Ambunguolo powaliyalo mai dulahee boito moito diila boti mobaango, modio̒loma daa̒, moliliu̒lo wau diila boti mobaango; ambunguolo wanggubilo wolo heengo wau leidaa̒, aambunguolo tau̒bilo monto tinelo mato lodulahu.

⁶ Patutilio hui boito yinggilolo monto yia̒apo taunu wau hulalo; diilalo mao̒ eelaalo, diilalo mao̒ olo loi̒yaalo.

⁷ Ambunguolo huliilo mao̒ hui boito polupolu lo modio̒lomo diaaa̒ odembinga daa̒, diaaa̒ owengahu.

⁸ Wuu taa u mohunemo wau taa u mopo dulungo Lewiatan, tembaalo mai dulahee boito wolo tadia wau laa̒anati;

⁹ diila bolo poliyama tiimuru motinelai, diila mao̒ polulia tinelaa mobaango motinelo! Huliilo mao̒ hui boito diila ohuna mohima podunggaalio mai dulahu wau halaapani u bohu.

¹⁰ Malaa̒-laa̒anatilo hui tilopotala tou̒ watotia pilotutu mai limaama, wau piloluli mao̒ lomanta polodutolo.

¹¹ Yilongola watotia diila yilateelo todelomo talomo li maama, meaalo nyawa lobunto tou̒ watotia pilotutu mai?

¹² Yilongola watotia iloo̒ode limaama lo watotia boli piludui̒o, wau tilutualio wolo tutulio?

¹³ Humayaalio tou̒ boito watotia yilate, yi watotia motuluhu, wau mohuheli wolo duo̒duo̒oto,

¹⁴ debo odelo mongo olongia wau takawaasa muloololio mai daa̒, umuli momongu bele biluloa̒ saaha li olongia tojamani muloololio mai daa̒.

¹⁵ Watotia leituluhu debo odelo walao̒ talolai̒ li olongia, tamoluango belelio wolo talaa̒ hulawa.

¹⁶ Yilongola watotia diila pilotutu mai lou̒ diila onyawa alihu tuutuluhu lo watotia meinulota tutu wau moluhu wolo majanunu lapatao̒ motuluhu?

¹⁷ Mola teto, todelomo kuubulu, tamoleeto diila mohutu umoleeto, wau tamoo-kalajawa u bangganga tai̒lo pulita lo lotoolo, mowali molopata woongolio.

¹⁸ Wau olo tawalo molaasa olulia lohilao, molopato monto antingo lotahi podahawa.

¹⁹ Mola teto ngoa̒amila tau tutuuwauwa: tamasa-masaahuru wau tadiila masa-masaahuru. Wau mongo wato lolopato pulitio mao̒.

²⁰ Yilongola manusia piloluli turusi tumutumula modutolo? Yilongola tinelo yilohi mai to talimilimi?

²¹ Timongolio lebe motohilaa kuubulu wolo halata, mohima mautu, bo diila hemei dungga.

²² Osanangi tutu bolo mowali olaasawa wonu timongolio mate wau lobungolo.

²³ Dulahee momooli limongolio wanggube lo Allahu Taa̒ala, timongolio bilalaalio lonto totoonulalo mantahu.

²⁴ Tuloi̒o watotia molamelo mopoi̒laalo suusa, diila ohuheliilio watotia mopoi̒laalo suusa.

²⁵ Totoonulalo u moo̒lawalo olo watotia, helo lemba mai towatotia, totoonulalo u oohe lowatotia, leituhata olo watotia.

²⁶ Duo̒lo watotia diaaa̒ u aamani, watotia helo dutolo lou̒ diila opulitio.”