AYUBA 24 - KITABI HABARI MOPIOHE

¹ Yilongola Allahu Taa̒ala diila lolantu mai dulahee pomutoa̒alo, alihu tau-tauwalo tahi totaawa to Eeya moo̒tapu u aadili?

² Woluo tau-tauwalo tahe lopohei tuoto lo sipatana, alihu hutalio mowali luasi. Timongolio hemotao̒ himbala lohimba, wau lopo lantungao̒ to lantunga lohimba limongolio.

³ Kolodai miliki lo tadidu otiilo otiyamo, pilotetei̒ mongolio; sapi ngotaalio lo janda, hilama limongolio odelo pongakuwalo.

⁴ Timongolio helo langgu taa mosikini moo̒tapu hakuulio, yi lou̒ pakusa malo tituuo̒olo mola taa u mosikini.

⁵ Oditolio, tamosikini boito debo odelo kolodai molinggelo u mololoohe ua̒alo to huta luasi u pilobutua lo aa̒a-yuwaalo kekeei wau moopa; bo to tataa-mbatiyalo boito wambao̒ o ua̒alo ode mongo walai̒o.

⁶ Halabolu lotaa wewo lou̒ pakusa kilalajaalio; hungo lo angguru lotaa moleeto musi yimoo̒lio.

⁷ Tio diila opohuuloto wau pakeyangi u pomatuwalo batanga tou̒ hui.

⁸ Tio lobata lodidi polodu tohui̒dee, lapatao̒ lohimbideo̒ tohui̒dee botu u lotiwolungo.

⁹ Taa moleeto mopowato walao̒ tadidu otiilo otiyamo, wau lohama tau̒nge lotaa mosikini tao̒ biloli to olio.

¹⁰ Taa mosikini lonao̒ lou̒ diila o pakeyangi wau boo̒; tio polaangolo ngotilonggadu hemongotolo pale to halabolu.

¹¹ Monto jaitun hemohutu winulo wau monto hungo lo angguru, minumani, bo tio lohihilao laba-labaalo motoa̒ango.

¹² To kokoo-tawaalo odungohe suala mopoilaalo suusa sababu mongongoto wau pongolaasa u moleeto, tau-tauwalo hipalia hemo ngiibode mei raawati, bo Allahu Taa̒ala diila lodungohe dua̒ limongolio; Eeya diila lohuto lomandungi mai olimongolio.

¹³ Woluo tau-tauwalo tadiila mololimo tinelo mololimo tinelo wau momuusu tinelo, timongolio diila moo̒onuhu wau diila modudua̒ dalalio.

¹⁴ Tou̒ subu tamoomatea mate-mateelo mao̒ mobongu mai monto tutuluhio, tulusi lumualao̒ momate mateelo mao̒ taa umosikini, wau ngotilonggadu dulahee diipo dimodupai, tio tuua̒o̒-tuua̒o̒ mohehulo debo odelo tamootao̒wa.

¹⁵ Tamoojinawa mohima meidungga lolaango; pilomakelio polau̒be baya alihu tau diila moo̒onuhe olio.

¹⁶ Tamootao̒wa momonggari bele tou̒ hui; tou̒ dulahu tio mohalahu monto u mobaango wau motituuo̒.

¹⁷ To olio, dimodupo moo̒ohe daa̒, bo dio̒lomo ulaba-labaalo, moo̒sanangi.”

Tei Jopar

¹⁸ Lapatao̒ ualei Jopar, “Taa moleeto peelihu lo taluhee daa̒, huta milikiilio ilolaa̒anatia lo Allahu Taa̒ala; ilengi lo anggurulio botia diilalo otau; diduuluo tahe mokalaja teto.

¹⁹ Debo odelo salju moolu otuhata lo polohengu wau mato lodulahu, odi-odieelo mola taa odusa tiloololo ode delomo dunia lotaa yilate.

²⁰ Tiilolio lohihilao molipata olio, luluu-wantiyalo mongo batangalio. Tanggulio diilalo o eela; tio pilopo binasa debo odelo bungo lo ayu u loombahu.

²¹ Ngoa̒amila boito lotoduo sababu tio helodeehe tahi jandawa, wau helo tiparangi totiilo taa diila owalao̒ talolai̒.

²² Bo Allahu Taa̒ala, wolo kawasaa-Lio mopolahi taa molotolo boli buheli daa̒. Allahu Taa̒ala mopohutu mai, yi mateelo mola taa juluhaka.

²³ Allahu Taa̒ala mongohi olio tutumulo aamani, bo mongimato olio diila ohuhe-huheliilio.

²⁴ Bo ngopee̒ mola tio tumumulo sanangi tutu, bo lapatio mao̒ mohualingo u ohiheo-hiheolo mao̒. Tio mololante debo odelo huo̒yoto udiila ohuna; debo odelo panggeyango pale u ilootolo monto batangio.

²⁵ Tatoonu tamoo̒ paahe ilaalo boito, meaalo diila mololimo obobanali lo loi̒yau̒?”