AYUBA 23 - KITABI HABARI MOPIOHE

Tei Ayuba

^1-2 Bo tei Ayuba lolametao̒, “Wau̒ umoliyoo̒ moloto-lotoloolo mao̒ ohilaa mopo lopato batanga wau mopoi̒laalo suusa to Allahu Taa̒ala; diila mowali otongau̒ mopotoodu pongolaasa suusa.

³ Aa, bolo potala otaawau̒ tambati ilowoluo lo Eeya, alihu wau̒ moo̒ nao̒ wau modunggaya wolo Eeya.

⁴ Yi to Eeya potaluwou̒ mao̒ palakalau̒ botie, monto tunggiluu̒ daata-daatalo mao̒ tataa-heyaalo poloduulua.

⁵ Ohilaa otaawau̒ wolo umapo tahuda mai lo Eeya, wau woloolo mola Eeya mongohi mai tameto.

⁶ Wolo Eeya madiila mopobunto-bunto kawasa lo Eeya to olau̒? Diila! Eeya tantu mamo dungohe loloo-iyaau̒.

⁷ Wau̒ diila ototala wau moo̒ poduulua batanga totalu lo Eeya, yi wau̒ mapoi̒laalo molopato u ohihieo-hiheolo mao̒.

^8-9 Yiloloohuu̒ Allahu Taa̒ala to tiimuru, otolopa, huliaalio, tilayo, bo penu boli tou̒toonu Allahu Taa̒ala diaaa̒; wau wau̒ diila loo̒dungga to Eeya.

¹⁰ Bo otaawa lo Eeya totoonulalo dalaluu̒ wau olo timii̒du diambanguu̒. Wonu debo odelo hulawa wau̒ sopuolo, yi maa obukuti deu̒ hilaau̒ belesi.

¹¹ Wau̒ lodungohe to Eeya wolo tatapu wau molotolo hilao; diila pee̒enta mao̒ wau̒ lobale lonto dalalo u tilantu mai lo Eeya.

¹² Totoonulalo palenta lo Allahu Taa̒ala laito hedungoheu̒, kahandaki lo Eeya hedudua̒au̒, wau diila lodudua̒ hilaau̒ lohihilao.

¹³ Allahu Taa̒ala boito diila mobolio̒; diaaluo tamowali moluwali to Eeya. Eeya mohutu mai wolo u kahandakio-Lio.

¹⁴ Eeya mamoponao̒ ranjanaa-Lio ode olau̒, wau donggo dadaata poli ranjana lo Eeya wewolio mao̒ leeto.

¹⁵ Sababu moohe to Eeya, yi hilumehelo lomola wau̒; helebe pikiilangiyou̒ mola ngoa̒amila boito, helebe moohe lomola wau̒.

^16-17 Taa Laba-labaalo kawasa helo ngantulu mai totoonulalo obuheliu̒. Wau̒ yiloohe sababu Allahu Taa̒ala, wau diila sababu modio̒loma daa̒, eleponu dio̒loma boito lomalita olau̒, wau lolanggu bayau̒.