AYUBA 22 - KITABI HABARI MOPIOHE

POLO-BISALAWA OTOLULIO 22:1–27:23 Tei Elipas

^1-2 Lapatao̒ malo loi̒ya tei Elipas, “To wolota umati lomanusia, diaaluo penu boli ngotaa mao̒ ohuna to Allahu Taa̒ala. Taa ulaba-labaalo o aakali wau obudi, bo ohuna duo̒lo batangalio lohihilao.

³ Wolo woluo pae̒daalio ode Allahu Taa̒ala, wonu yio̒ mohutu mao̒ kahandaki lo Eeya? Tingga woluo untungilio to Eeya, wonu tutumulumu wimu-wimumuto totoonulalo mao̒?

⁴ Diila sababu woohemu to Allahu Taa̒ala, yio̒ pilopo tulude wau ilanggapu ototala,

⁵ bo sababu mailaba dadaata dusamu, wau moleeta daa̒ huhutu wau pii̒limu.

⁶ Wonu wutatumu diila moo̒ baayali biloliilio, helambatomu ngoa̒amila pakeyangilio.

⁷ Taa u moongolo diila yilohiyamu u yilumolo, tapola-polaango diila pilopo yingomu mao̒ ua̒alo.

⁸ Pilomakemu huhuloa̒a wau kawaasa helohama wau lolaahangi huta ngoa̒amilalo.

⁹ Diila wambao̒ yio̒ diila motulungi mao̒ tahi jaandawa, bo tadidu otiilo otiyamo olo hedeehemu.

¹⁰ Sababu uito to palitumu, botia polupolu lo taalo, wau wolo tumahuo̒olo mola, hilaamu yilanggube lo owowoohe.

¹¹ Dulahu helebe modio̒lomo, diila mowali yio̒ moo̒onto; yio̒ moa̒humo odungga lo taluhee daa̒ ulaba-labaalo.

¹² Tingga diila Allahu Taa̒ala tabilu-biluloa̒ to hulungo ulaba-labaalo molanggato? wau momilohei ode walungo, ode popoo-liyamaalo u molanggata daa̒?

¹³ Bo yio̒ hemohintu, “Wolo otaawa lo Eeya? Eeya woluo tobolio̒ lo heengo wau diila moo̒ butoa̒i olanto”

¹⁴ Helantobumu deu̒ bibilohu Eeya iloheu̒uta loheengo wau deu̒ bo to eenggade wolota lohulungo wau dunia Eeya moonao̒?

¹⁵ Wolo yio̒ debo ohilaa lumaode to dalalo u tilulaoto lotau-tauwalo hileeta?

¹⁶ Timongolio bilantanga tou̒ diipo meidungga saaa̒ti lo opopatelio, peelihu lo taluhee daa̒ u molemba.

¹⁷ Timongolio boitolo tabuheli diila mololimo Allahu Taa̒ala, wau hemo lantobu deu̒ Eeya boito diila mowali mohutu mai wolo-wolo toli mongolio.

¹⁸ Lebe-lebe pomao̒ Allahu Taa̒ala tamalo powali mai olimongolio kaya! Otutu wau̒ diila mongalati pikiilangi lotaa moleeto!

¹⁹ Taa u mopiohu, hipoi̒ii̒ya polupolu lo weengahu, wonu moo̒onto taa moleeto moo̒tapu hukuumani.

²⁰ Totoonulalo haku lotaa moleeto malo antulu bilinasa, wau tulu lomobu yilaahu wolo u donggo ilolabita.

²¹ Naa, Ayuba, podameyalo wolo Eeya, alihu yio̒ moo̒toduo mai u aamani. Wonu uito pohutuomu, tantu yio̒ moo̒toduo mai untungi.

²² Tolimowalo wolo u pilo ngaajali mai lo Eeya olemu; tahuwalo uito ngoa̒amila todelomo hilaamu.

²³ Pohualingolo ode Eeya wolo dupadupapa lohilao u moleeto to belemu patutilio yinggilomu.

²⁴ Tapilalo hulawamu ulaba-labaalo pulua; pomahulalo ode wamoo̒ dutulaa u diilalo otaluhu.

²⁵ Poluliyalo mao̒ Taa Laba-labaalo kawasa mowali hulawamu, wau talaa̒amu ulaba-labaalo omutu.

²⁶ Yi yio̒ mowali yakini to Allahu Taa̒ala laito, wau motota mao̒ deu̒ Eeya bungo lo osanangimu tutu.

²⁷ Wonu yio̒ modua̒ mola, Eeya mamolametai olemu, wau yio̒ moo̒ pomata totoonulalo dantimu.

²⁸ Tolopanimu mao̒haasili laito, wau tilango mamolinelai tutumulumu.

²⁹ Taa u batingga podupaapa lo Eeya, bo taa udupa-dupapa lohilao poa̒ahuwolo.

³⁰ Allahu Taa̒ala mamo tulungi mai olemu wonu yio̒ diila ototala, wau wonu yio̒ mohutu mao̒ kahandaki lo Eeya.”