AYUBA 21 - KITABI HABARI MOPIOHE

Tei Ayuba

^1-2 Tei Ayuba lolametao̒, “Dungohi mai wolo u maloi̒yaau̒ mai; bo uito u pohileeu̒ odelo poliyango.

³ Poluasia mai wau̒ mobuulota mobisala, lapatao̒ uito timongoli mowali muli mohina!

⁴ Diila wolo manusia wau̒ mohaamawa, oditolio diila mongola wonu wau̒ diila boti sabari.

⁵ Bilohilo mai wau̒, yi timongoli mamolinggolabu, timongoli mamei tontongo wau tunggiluu̒ mamohuu̒mo.

⁶ Wonu pikiilangiyou̒ mola owowoluwoau̒ botie humuhelo lomola wau̒ sababu molilintolo.

⁷ Yilongola taa moleeto yilohia lo Allahu Taa̒ala umulu hayahaya, wau halata limongolio helebe oduhenga mola?

⁸ Timongolio tumutumulo odito hiheolio tilinggula heloo̒onto walao̒ wau wombu limongolio lowali iludaa̒ mola.

⁹ Diilea limongolio aamani wau sontosa; Allahu Taa̒ala diila helo podungga mai baala toli mongolio.

¹⁰ Bibiahi mongolio hipo tonggalaa̒ mola, wau diila mototolo, helo tolowalaa̒i.

¹¹ Mongo walao̒ lotaa moleeto hilantia̒ wolo weengahu, debo odelo himba buboto u meengahe.

¹² Tilunuhe lotingohu rabana, tulali wau kocapi, timongolio rame hipolahua mola wau helo ngelu-ngelungo.

¹³ Duduulahio piloo̒ pulitio todelomo osanangi tutu, wau timongolio yilate polupolu lo odudame.

¹⁴ Lebe-lebe pomao̒ timongolio malo loi̒ya ode Allahu Taa̒ala, “Walahilo ami wau ponao̒olo! Ami diila paduli wau diila mohuto mongalati makusudu wau kahandaki-Mu duo̒lo tutumulo lami.”

¹⁵ To pikiilangi mola limongolio, “Momaya to Allahu Taa̒ala diila ohunalio, wau modua̒ mola to Olio diila opae̒daalio.

¹⁶ Tingga diila masababu olootolunto wambao̒, iloa̒ataalo totoonulalo mokusudu wau patujunto?” Bo wau̒ sama-samaata diila akolo wolo dalalo pikiilangi wau huhaama odito.

¹⁷ Wolo mapee̒enta woluo tohe lotaa moleeto pilate, wau timongolio tilemba lobaala wau omarapo? Wolo mapee̒enta Allahu Taa̒ala lomuluka toli mongolio, tilinggula timongolio hilukumani lo Eeya?

¹⁸ Wolo mapee̒enta timongolio debo odelo laato wau peaahuo̒ u hiliipa lodutalo wau lodupoto laolaode?

¹⁹ Timongoli moloi̒ya, “Walao̒ hukuumanio lo Allahu Taa̒ala sababu dusa liyamolio.” Bo loi̒yaau̒ mai: Taa odusa boitolo tamusi hukuumanio lo Allahu Taa̒ala, alihu timongolio mongalati deu̒ sababu dusa limongolio, yi Allahu Taa̒ala lopodungga mai hukuumani-Lio.

²⁰ Poluliyalo mao̒ taa odusa momanta dusalio lohihilao, poluliyalo mao̒ olasaalio muluka lo Allahu Taa̒ala Taa Laba-labaalo molanggato.

²¹ Wonu manusia mopulito masaalio todunia, tingga donggo paduli tio diila otaawa ngaalaa̒lio sanangi tutu?

²² Tingga mowali manusia mongaajali to Allahu Taa̒ala, hiambola Allahu Taa̒ala lohihilao tamomutoo̒ mahaluku to sologa?

^23-24 Woluo taa u seehati ngotilonggadu tio tumutumulo; tio mate wolo molaasa sanangi wau ilolulia lohilao. Opopatelio duo̒duo̒oto wolo laasa sanangi tutu, hiambola batangalio donggo polupolu lo olootolo.

²⁵ Bo woluo olo tailate polupolu lo opopaa̒to, diila pee̒enta mao̒ loo̒laasa sanangi tutu.

²⁶ Bo tokuubulu, timongolio pee̒-pee̒enta hibalata; pilupua̒ lo wulodu wau luanti.

²⁷ Memangi otaawau̒ wolo u he pikiilangio limongoli wau totoonulalo ololeeto u heiranjana limongoli.

²⁸ Yiyintumu, “Tou̒toonu bele lo takaawasa tahemohutu huhutu u juluhaka?”

²⁹ Tingga diipo pilohintua limongoli taa u dadaata helo pasiyari? Tingga diila palacaya timongoli habari upilopo dulohei limongolio?

³⁰ Uali mongolio, “To dulahee Allahu Taa̒ala mopodungga mai lo hukuumani, tahileeta mamoa̒ahu.”

³¹ Diaaluo tamongaibu watadelio; diaaluo tamolontuli ololeetio.

³² Tio dilelo ode kuubulu, wau pilopo tuwoto ode delomo wangopa lokuubulu; kuubululio dilaaha wau taataalo.

³³ Hilihu-lihua tahinao̒wa lolunuhe milatelio; wolo mumboyoto huta olo molambula olio.

³⁴ Oditolio, polo-liyangumu boito toongi wau totoonulalo totametumu yimbulo!”