AYUBA 2 - KITABI HABARI MOPIOHE

Tamoomuyuwa luli lohimontala olei Ayuba

¹ Mamaaha-lukuwalo sologawi luli lotaalua mao̒ wolo Eeya, wau Tamoomuyuwa olo woluo towolota limongolio.

² Yi Eeya lohintu mao̒ olio, “Lonto utoonu mai yio̒?” Tamoomuyuwa lolametao̒, “Lonto nonao̒ ode utoonulalo mao̒ odito mota odia mai wau helo lontale dunia.”

³ Eeya lohintu mao̒, “Wolo mapiloo̒ tuotumu wato-U̒ tei Ayuba? To ngoilanggubu dunia diaaluo taa u odito tatapu wau molotolo hilao wau mopiohe hale debo odelo tio. Tio hemolubo ola-U̒ wau sama-samaata diila helohutu u moleeto. Tio debo donggo tatapu wau molotolo hilao to Olau̒, eleponu yio̒ malomiyo ola-U̒ u mopo topotala mao̒ olio lou̒ diila o alaasani.”

⁴ Bo Tamoomuyuwa lolametao̒, “Nyawa wau kesehaatani lebe ohalaga wolo halata. Manusia iloheela lohilao mopobake totoonulalo milikiilio asali tio debo tumu-tumulo.

⁵ Humayaalio batangalio poo̒ngongoto lo Eeya, tantu tio mahua̒ molaa̒anati to Eeya!”

⁶ Yi malo tahuda Eeya to Tamoomuyuwa, “Ooo̒, pohutuwalo wolo wambai̒o wolio, asali diila patea tio mate-mateelo mao̒.”

⁷ Yi Tamoomuyuwa lonao̒ lonto talu lo Eeya, wau helo potoodeo̒ bohe u olaala mohutodu to ngangaawaa̒ lei Ayuba lonto paladu oa̒ato demola wimbupululio.

⁸ Lapatao̒ tei Ayuba lotihuloa̒ totili huntua lo puputo, wau lohama poo̒ lo ulongo u longahu-ngahu wawai̒o.

⁹ Dilelio loloi̒ya mao̒ olio, “Diila pongalo aakali yio̒ debo donggo tatapu wau molotolo hilao to Allahu Taa̒ala. Ntali laa̒anatialo Tio, lapatao̒ potipateelo mola!”

¹⁰ Tametao̒ lei Ayuba, “Yio̒ mobisala debo odelo taa mohulode daa̒! Diila pongalo aakali ito bo ohilaa mololimo wolo u mopiohe monto Allahu Taa̒ala, hiambola udiila mopiohe potoulinto?” Oditolio, eleponu tei Ayuba heloo̒ laasa totoonulalo baala boito, bo tio diila helo lapali tataa-heyaalo u moluwali Allahu Taa̒ala.

Mongo sahabati lei Ayuba lonao̒ mai

¹¹ Baala leidungga tobatanga lei Ayuba mai̒lo dungohe lo sahabatilio toulota, deu̒yito-yito tei Elipas lonto kota Teman, tei Bildad taulo Suah wolei Jopar taulo Naama. Timongolio malo heeluma ohilaa momilohe wau moliyango olio.

¹² Bo tou̒ lonto u molamingo timongolio loo̒onto olei Ayuba, timongolio ngopee̒ diilalo moo̒onuhe olio. Yi hilumoyongo timongolio wolo hungga-hunggalao̒ wau helo ngaidingo pakeyangi limongolio boli lomua̒yade mola peyahuo̒ ode dulente wau to lunggongi mongolio.

¹³ Pitu hui mola timongolio helo tihuloa̒a tohuta, totili lei Ayuba, lou̒ diila helo loi̒ya penu boli ngotahe mao̒, sababu iloontonga limongolio malo odito buheeto polodutolio.