AYUBA 19 - KITABI HABARI MOPIOHE

Tei Ayuba

^1-2 Bo tei Ayuba lolametao̒, “Yilongola wau̒ tulusi hetuletea wolo ulintapo limongoli, wau hesikisaa limongoli wolo loi̒ya?

³ Wuwuulia timongoli hemohina olau̒, wau wau̒ ilalinaya limongoli lou̒ diila laasa loolito.

⁴ Humayaalio tilaala huhutuuu̒, uito diila mopoluhi olimongoli.

⁵ To pikiilangi mola limongoli batangamu lebe mopiohe wolau̒; suusau̒ he anggapuo limongoli bukuti lo totalaau̒.

⁶ Ototai mao̒ deu̒ wau̒ donggo hesikisaa mai lo Allahu Taa̒ala, wau yilau̒po todelomo taalo Eeya.

⁷ Wau̒ helomanja-manja sababu opoparangi lo Eeya boito, bo diaaluo penu boli ngotaa mao̒ helo poo̒tuota olau̒. “Tou̒toonu u aadili,” wuwaatiu̒, bo diaaluo talo dungohe olau̒.

⁸ Allahu Taa̒ala loheu̒tai dalaluu̒, wau̒ diila loo̒ laodu, huhuu-luupilou̒ hepilohutu mai lo Eeya lodio̒loma tutu.

⁹ Eeya helo lambato halataau̒ ngoa̒amila, wau tangguluu̒ u mopiohu yiruusaa lo Eeya.

¹⁰ Eeya heloluhu wolo polu-polutuo̒ olau̒ lonto totoonulalo mantahu, debo odelo talo mahuta waa̒to lonto pilomulo, lapatao̒ piloluli lo Eeya lominggalato wau lololante, odi-odieelo mola bilantanga lo Eeya totoonulalo halaapaniu̒.

¹¹ Muluka lo Allahu Taa̒ala to olau̒ wali-walihuhu; wau̒ ilaanggapu lo Eeya odelo musu lo Eeya.

¹² Pasuukani lo Eeya heloluhu lou̒ diila otabuula; dalaluu̒ tilanggua wau kemaau̒ bilaala.

¹³ Mongo pohutatau̒ pilopo lamingo lo Eeya lonto olau̒; wau̒ lowali tau deli to ngoa̒amila tamoo̒taawa wolau̒.

¹⁴ Kaumu kalabatiu̒ ngoa̒amila helo pohalahe batanga; mongo sahabatiu̒ diilalo moe̒ela olau̒.

¹⁵ Watou̒ taabua lolipata deu̒ tatoonu wau̒, tituani limongolio; ilaanggapulio wau̒ taa udiipo otaawalio.

¹⁶ Ilibodeu̒ watou̒, bo tio diila lotuwahei, eleponu hepiliyou̒ tio wolo molumboyoto.

¹⁷ Dileu̒ molonuo̒ moo̒obo napasiu̒, wutatuu̒ pulua diila motuhatawa mohimbidei olau̒.

¹⁸ Wau̒ hilina lo tau̒kekeei̒ to dalalo; wonu wau̒ timihula mola, wau̒ hepo iii̒yalio.

¹⁹ Moo̒onto olau̒, tamaniu̒ modudula daa̒ wolau̒ molaasa tumihela hapato; wau̒ tilolaa limongolio lotao̒ tolia̒nguu̒.

²⁰ Batangau̒ bolo alipo pomolu tulalo; ngopee̒ wau̒ yilateelo mola wambai̒o wau nyawau̒ yilumayango.

²¹ Wuu mongo sahabatiu̒, tolia̒ngilo mai wau̒, sababu uluu̒ lo Allahu Taa̒ala helomate olau̒.

²² Allahu Taa̒ala tulusi lodeehe loo̒huu̒-huu̒ulo mao̒ olau̒; yilongola timongolio heloo̒baaya to Eeya? Tingga diipo ilolulia lohilao timongoli helo posikisaa?

²³ Aa, bolo potala tataaheeu̒ tuladulo, tilinggula malaito eelaalo mola;

²⁴ bolo potala wolo wate pilaahati tobotu, alihu moo̒taahangi ngotupa lowakutu.

²⁵ Otaawau̒ deu̒ tosologa woluo Tamooduulua olau̒; pulitio mao̒ Eeya mamei dungga motulungi olau̒.

²⁶ Eleponu alipuu̒ hipali-palia wau lopota, bo ngotilonggadu wau̒ obatanga, wau̒ mamo milohe Allahu Taa̒ala.

²⁷ Wolo matou̒ lohihilao Eeya mabiloheu̒, wau to olau̒ Eeya mowali sahabati. Hilaau̒ loa̒antulu sababu timongoli loloi̒ya,

²⁸ ‘Woloolo mola dudelolio ito modau̒wa olio?’ Timongoli hemo lolohe alaasani u mohutu palakala.

²⁹ Bo, botia poohelo to wamilo! Sababu Allahu Taa̒ala muluka wau mohukuumani mai taa odusa; yi otaawalo mao̒ limongoli, deu̒ woluo Allahu Taa̒ala tamo mutoa̒i munusia.”