AYUBA 16 - KITABI HABARI MOPIOHE

Tei Ayuba

^1-2 Bo tei Ayuba lolametao̒, “Tingga maito he odungoheu̒ huhama odie; liyangomu bo moposikisa wambai̒o.

³ Omolua latabu boito pohuheli mao̒ limongoli? Wolo umoo̒ aanga olimongoli u mongohi totameto?

⁴ Humayaalio timongoli botie wau̒, wau wau̒ timongoli, wau̒ olo moo̒ bisala mai tutuuwauwa debo odelo uito. Poo̒daatau̒ maidaa̒ timongoli wolo polobisala; lunggonguu̒ mapo tataa-haliliyou̒ tuotio diila akolo.

⁵ Hilaamu mapoo̒ lotoluu̒ mai wolo potua hidala-dalaala; tataaheemu mamongohi liyango.

⁶ Wonu wau̒ mobisala, sikisaau̒ diila moole; wonu wau̒ motipoo̒oyo, wolo olo hunalio?

⁷ Allahu Taa̒ala, helohutu mai olau̒ loongolo daa; ngoa̒amila ngaalaa̒au̒ malobinasa.

⁸ Eeya lotehengi wau loheu̒upa olau̒. Botia malo hata-hataalo mao̒ batangau̒, wau totaa dadaata boitolo bukutiilio deu̒ wau̒ mailodusa.

⁹ Wolo laba-labaalo muluka Allahu Taa̒ala helo nganta-ngantanga batangau̒; wolo laba-labaalo lonuo̒ Eeya lomilohei olau̒.

¹⁰ Tau-tauwalo hipohentea̒ olau̒ wolo ngango daa̒; wau̒ hepilo paatealio wau tilambalilio putongiu̒.

¹¹ Allahu Taa̒ala lohudu olau̒ ode taa juluhaka; wau̒ pilopodehu lo Eeya ode uluu̒ lotaa moleeto.

¹² Engontielio tutumuluu̒ aamani wau sontosa, bo Allahu Taa̒ala debolo loluhu mai olau̒. Dangunguu̒ dilihuma lo Eeya lototoheta daa̒ wau wau̒ pilomahulo Eeya loo̒huu̒ulo mao̒; pilopowali mai lo Eeya wau̒ lowali patuju duo̒lo latihani.

¹³ Lou̒ diila odehu hilao Eeya lomana mai olau̒, tilinggula lohue̒ee̒lo mola tuango ombonguu̒.

¹⁴ Eeya loluhu mai debo odelo ngotaalio lo tamoo-hipatea, wau helomali olau̒ wolo wuwuulia.

¹⁵ Wau̒ lomake kado tuotio siluukali lohilao, wau lotihuloa̒ to peaahuo̒ sababu ilolaahelio.

¹⁶ Bayau̒ yileela sababu hiyonguu̒; buntungo matou̒ lomunggulo wau loidu.

¹⁷ Bo wau̒ diila helohutu udiila omanusia; loi̒laalo tuulusilo mola dua̒au̒ ode Eeya.

¹⁸ Wuu dunia, u moleeto to olau̒ diila mao̒ tuua̒; diila mao̒ poo̒oyongi wuwaatiu̒ mohile u aadili.

¹⁹ Otaawau̒ deu̒ tamoo-poduulua olau̒ maito tosologa; Eeya helongohi mai sakusi deu̒ wau̒ diila odusa.

²⁰ Wau̒ hilenteo̒ lomongo sahabatiu̒ wau hepilo iii̒yalio; sambela hiyo-hiyongo wau̒ lotaalua wolo Allahu Taa̒ala lei̒ tulungi mai.

²¹ Aa, potala Allahu Taa̒ala lohihilao mopoduulua mai olau̒ totalu-Lio, debo odelo ngotaalio tailoheela lohilao mopoduulua sahabatilio.

²² Tataa-wunuu̒ u ilolabita diialo dadaata; bolo ngopee̒ mola wau̒ monao̒ wau diilalo mohualingai.