AYUBA 14 - KITABI HABARI MOPIOHE

¹ Tumulalo mao̒ manusia boito pilotutu mai molulupuhu, diila olootolo; tutumulio limbulimbu wau polupolu lodutolo.

² Tio motumbingai wau mololante debo odelo bunga; mooli debo odelo wolilu, tulusi diduu̒.

³ Yaa Allahu Taa̒ala, diila pongalo aakali Eeya ohilaa momilohei olo watotia, wau mopotaalua watotia ode bubutoo̒ lo Eeya!

⁴ Tingga mowali manusia tao̒ dusa mopodungga mai sua̒li u wimu-wimumuto ngoa̒amilalo?

⁵ Jumulaa umulu lomanusia matilantu mai lo Eeya; jumulaa lo hulalio matilantu lo Eeya. Pilopo tatapu mai lo Eeya olo enggade lo tutumulio; diila pongalo aakali lamabangalio.

⁶ Poluliyalo mao̒ tio mohuheli, diila mao̒ puyua tio; alihu tio mowali moo̒laasa mao̒ tutumulio tunggula mopulito tuugasilio.

⁷ Donggo woluo halaapani ode bungo lo ayu u yiluwode; tio mamuli motumbingai, lapatao̒ otango mai.

⁸ Eleponu todelomo huta waa̒tio mowali moruusa, wau waa̒tio daa̒ mate sababu mohutodu,

⁹ bo wonu odedeta lo taluhu, tio muli mobutu; debo odelo pilomulo muda, tutuu-mbingio muli lumenetai

¹⁰ Bo wonu manusia mate, mopulitolo mola riwaayatilio; tio mololaa mao̒ dunia, tulusi ode utoonu nao̒olio?

¹¹ Debo odelo taluhu mohumbuo̒ monto delomo bulalo, debo odelo dutulaa yilooti ilopulita lo taluhio,

¹² odito olo manusia tamailate: tio diilalo moo̒ bongu mai. Tio diila tamoo̒ bongu monto otuluhe ngotilonggadu hulungo donggo woluo, diilalo pee̒enta mao̒ mobongu mai monto otuluhelio.

¹³ Ambunguolo tuua̒lo mai watotia todelomo dunia lotaa mate; duo̒laalo mai watotia tunggula Eeya diilalo momuluka. Bo ambunguolo tantuwalo mai wakutu u moe̒ela mola batanga lowatotia.

¹⁴ Sababu, wonu bolo manusia mate mao̒, tingga mowali tio muli tumumulai? Dulahu odungga dulahu watotia hemohima tunggula maasa mopaa̒to lowatotia botie mopaluto.

¹⁵ Yi Eeya mamotianga olo watotia, wau watotia mamongohi totameto; Eeya mamuli momonu olo watotia, mahaluku tapilowali mai lo Eeya.

¹⁶ Lapatao̒ mai̒matoa lo Eeya timii̒du didiambango lowatotia, bo diilalo piloo̒tuoto lo Eeya dusa lowatotia.

¹⁷ Dusa lowatotia maa̒ambunguo mai lo Eeya wau yinggilo lo Eeya; totala lowatotia tou̒ omoo̒omolu mai maluluto lo Eeya.

¹⁸ De huhuu-ideyaalo mamoohu wau mopupuu-lepeelo mao̒ diila otantulio, wau hui̒dee botu u motoheto mohei monto tambatilio.

¹⁹ Boboo-tuwaalo mai̒ii̒to lotaluhu u tolotolohe moo̒ohuu̒; huta mapeelihu lodidi u polodu. Odi-odieelo mola Eeya mongantulu mai halaapani lomanusia.

²⁰ Ilolaahe lo Eeya tio u ohiheo-hiheolo mao̒; Ilahula lo Eeya tio monao̒ wau bilolio̒ Eeya bayalio.

²¹ Mongo walai̒o mowali taa molamahu, bo diila otaawalio. Wonu bolo timongolio mowali hina, diaaluo tamo poo̒taa to olio.

²² Bo molilintolo wawaai̒o u olasaalio; bo susa daa̒ hilaalio u dilutolalio.”