AYUBA 13 - KITABI HABARI MOPIOHE

¹ Ngoa̒amilalo boito pee̒enta iloontongau̒ wau ilodungoheu̒ lohihilao, wau otu-otutuulo mao̒ ilopahamuau̒.

² Wolo u otaawa limongoli, otaawau̒ olo; diila mao̒ polantobu wau̒ olaahe limongoli.

³ Bo wau̒ ohilaa mobisala wolo Taa Laba-labaalo kawasa; wau̒ ohilaa mopoduulua palakalau̒ totalu lo Allahu Taa̒ala.

⁴ Sababu timongoli helo depuhe ohulodumu wolo wimbulo, diila talaalio debo odelo mongo hulango paluti.

⁵ Humayaalio timongoli diila lobisala, tanu timongoli anggapuolo molinepo.

⁶ Yi dungohilo tehengiu̒; poo̒tuotilo polo duluwau̒.

⁷ Tingga mowali domi Allahu Taa̒ala, timongoli mohimbulo? Tingga mowali timongoli mohimbulo duo̒lo polohuna daa̒ lo Eeya?

⁸ Tingga mowali timongoli motiwambao̒ ode Allahu Taa̒ala, wau mopoduulua to Eeya odelo tapolo koloolo?

⁹ Wonu Allahu Taa̒ala momalakisa olemu, mamo piohulo tilapulio? Wolo timongoli mowali mohimbulo to Eeya debo odelo mohimbulo tomanusia?

¹⁰ Wonu timongoli motiwambao̒, eleponu wolo poo̒poo̒oyo, timongoli mahukuu-manio mai lo Allahu Taa̒ala wolo parangi.

¹¹ Wolo odudaa̒ lo Allahu Taa̒ala diila oohea jiwamu? Wolo otihela hapato monto diila moo̒ kikiio̒ hilaamu?

¹² Totoonulalo potuamu debo odelo peaahuo̒ diila ohuna; polo duluwamu debo odelo huta moluluhio̒ u gambangi mopoo̒.

¹³ Sababu uito poti poo̒oyolo, huliilo mao̒ wau̒ mobisala! Wau̒ diila paduli penu boli woloolo mola akiibatilio!

¹⁴ Wau̒ dapadapato mohudu nyawa!

¹⁵ Wau̒ neekati sababu mailooli halaapani! Wonu Allahu Taa̒ala mamomate mai olau̒ mate-mateelo mao̒, wau̒ motiwunela lomola wambao̒, bo mapoduluwau̒ pii̒liu̒ totalu lo Eeya.

¹⁶ Tanu sababu obuheliu̒ boito wau̒ mamoa̒ahu, sababu taa moleeto diila tabuheli motaalua wolo Allahu Taa̒ala!

¹⁷ Botia dungohilo tio̒otutua loi̒yau̒; poo̒tuotilo katalaanganiu̒.

¹⁸ Palakalaau̒ malei dapato posambeu̒ mai; wau̒ yakini, diila mowali wau̒ potalaalo!

¹⁹ Yaa Eeya, wonu Eeya meidungga mai wau mopotulude to watotia, watotia mamoti poo̒oyo wau mohima u mate.

²⁰ Bo ambunguolo, pomataalo mai dulo polohone lowatotia botie, alihu watotia buheli muli motaalua wolo Eeya:

²¹ ambunguolo pohuhelilo moposikisa mai to watotia, wau diila mao̒ tembaa mai lo Eeya watotia wolo moo̒tihela hapato monto Eeya!

²² Ambunguolo potahudalo mai, yi watotia mamolameto. Meaambo huliilo mai watotia mobisala, lapatao̒ ambunguolo tametilo mai watotia!

²³ Ngoolo mao̒ daatalio totala wau dusa u hepilohutu lo watotia? Totoonulalo totala lowatotia patutilio polelea mai lo Eeya!

²⁴ Ambunguolo yilongola Eeya lohei wau lohalahe monto watotia? Wolo sababuulio Eeya monganggapu olo watotia odelo musu lo Eeya?

²⁵ Watotia bo duungo u lodehu ilotuhata lodupoto yilumaode, diila pongalo aakali pilopo hulu-huluhelo Eeya watotia! Watotia bo laato u lohengu wau lololante, toonu mowali watotia heila-yilapita lo Eeya.

²⁶ Tilantu mai lo Eeya paladu u mopaa̒to ode watotia; Tilontuli lo Eeya totala lowatotia tomaasa humula lowatotia.

²⁷ Oa̒ato lo watotia ilawadu Eeya wolo rante wate; totoonulalo oo̒oliyoo̒ lowatotia he ilomatoa mai lo Eeya. Tumbao̒ paladu oa̒ato lowatotia, diila lolopato lonto bibilohu lo Eeya.

²⁸ Yi watotia malowali loruusa debo odelo ayu u lohutodu; debo odelo kaingi u ililaa lotitio̒ watotia lowali loruusa.