AYUBA 11 - KITABI HABARI MOPIOHE

Tei Jopar

^1-2 Lapatao̒ tei Jopar loloi̒ya mao̒, “Wolo diila wohiyalo totameto latabu boito? Tingga patuti taa u dadaata moloi̒ya boito poo̒otutuwolo?

³ Ayuba, to anggapumu ami botie diila mambo molametai olemu? To lantobumu ami botie motipoo̒yo sababu henteu̒mu?

⁴ Modudua̒ lontobumu loloo-iyaamu boito diila tilaala; modudua̒ huhamaamu deu̒ yio̒ belesi totalu lo Allahu Taa̒ala.

⁵ Bo, pohileaala dua̒ Allahu Taa̒ala lohihilao motahuda mai!

⁶ Wau pohileaala dua̒ yio̒ poo̒taa mai lo Eeya, deu̒ hikimati boito dadaata pitualio, diila opaahamua lomanusia. Yi pongalatilo yio̒ deu̒ dutolumu diila botie woloolo, wonu pandingio mola wolo hukuumani u patuti tolimoomu.

⁷ Diila pongalo aakali hakeekati lo Allahu Taa̒ala mowali toneo̒mu? Diila pongalo aakali kawasa lo Eeya mambo opahaamuamu?

⁸ Kawasa lo Eeya lebe molanggato wolo dulenta daa̒; diila o aatamu wau motapumu. Kawasa lo Eeya lebe modelomo monto dunia lotaa mate, diila opahaamua sama-samaata.

⁹ Kawasa lo Allahu Taa̒ala lebe luasi wolo dunia, wau lebe luasi wolo dunia.

¹⁰ Wonu Eeya moheu̒pa wau modelo olemu ode mahakama-Lio, yi tatoonu tabuheli mongabuto huhutu lo Eeya?

¹¹ Otaawa lo Allahu Taa̒ala taa u ohilaa mohimbulo; ololeeti mongolio diila moo̒hei monto mato lo Eeya.

¹² Wonu tiilo kolodai molinggelo mopotutu mai kolodai moluwamo, deu̒ito taa mohulodu mowali molinepo.

¹³ Ayuba, pobelesiyalo hilaamu, wau polee̒elo! Podua̒alo mola to Allahu Taa̒ala!

¹⁴ Yinggila mao̒ dusa monto hilaamu wau polaminga mao̒ u moleeto monto belemu!

¹⁵ Yi yio̒ motaalua wolo mowali tumumula wolo tatapu molotolo hilao wau molotolo boli buheli daa̒; yio̒ matimihula motoheto wau diila palalu laito molaasa molawalo,

¹⁶ tumbao̒ dutolumu diilalo toloe̒elamu mola; debo odelo taluhee daa̒ uilooti, yilipato tau.

¹⁷ Tutumulumu mamowali lebe mobaango tou̒ dulahu, wau sasaa-atiyaalo modio̒lomo todelomo tutumulumu debo odelo tinelo mato lodulahu dimodupo.

¹⁸ Yio̒ mamolotolo wau polupolu lo halaapani; Allahu Taa̒ala mamo lilungai olemu tilinggula yio̒ aamani.

¹⁹ Yio̒ diila tamoohe tomusu; dadaata taa mamei̒ tulungi olemu.

²⁰ Bo taa moleeto mamoo̒onto wolo hilingua, sababu olimongolio diaaa̒ polotulungi. Tuwa-tuwaulo halaapani limongolio yito alihu mautu hua̒a meidungga.”