AYUBA 1 - KITABI HABARI MOPIOHE

Ibilisi helo himontala olei Ayuba

¹ To huta lo Us bilu-biluloa̒ talolai̒ ngota tai̒lunte Ayuba. Tio hemolubo Allahu Taa̒ala wau tatapu molotolo hilao to Allahu Taa̒ala. Tio taa u mopiohe hale wau diila helohutu u moleeto penu boli ngoi̒di mao̒.

² Tio owalao̒ talolai̒ pitulota wau walao̒ taabua toulota.

³ Wewolio mao̒ leeto tio owato dadaata, pitu lolihu himba, tolo lihu unta, ngolihu sapi, wau limo lohetuto kolodai. Limbui̒o mao̒, tio yito taa ulaba-labaalo kaya to wolota lo ulipu tomadala wimbihu Tiimuru.

⁴ Opitu lota walao̒ talolai̒ lei Ayuba obobiasaalio laito hemohutu potihunggu tobele limongolio ngota-ngota lou̒ bubuulota. To potihunggu boito otolu walae̒e Ayuba tiloduo olo, lapatao̒ timongolio helo lamelo wau longilu pee̒-pee̒enta.

⁵ Timii̒du mopalutao̒ potihunggu, tei Ayuba laito hemobongu didimodupo wau hemo podewo bake ode timii̒du walai̒o alihu timongolio ambunguo mai lo Eeya. Sababu to pikiilangi mola lei Ayuba, mowaliilio mongo walai̒o boito mai̒lodusa wau helohina Allahu Taa̒ala lou̒ diila sangaja.

⁶ Tou̒ dulahee tuwau mamaaha-lukuwalo sologawi helo taalua wolo Eeya, wau Tamoomuyuwa woluo olo to wolota limongolio.

⁷ Eeya lohintu mao̒ olio, “Lonto utoonu mai yio̒?” Tametao̒ lo Tamoomuyuwa, “Watotia boheli lonao̒ ode utoonulalo mao̒ odito mota odia mai wau helo lontale ngoilanggubu dunia.”

⁸ Tulusi Eeya helohintu mao̒, “Wolo mapiloo̒ tuotumu wato-U̒ tei Ayuba? To ngoilanggubu dunia diaaluo taa u odito tatapu wau molotolo hilao boli mopiohe hale debo odelo tio. Tio hemolubo ola-U̒ wau diila pee̒enta mao̒ helohutu u moleeto.”

⁹ Bo Tamoomuyuwa lolametao̒, “Tantulo mao̒ tei Ayuba hemolubo to Eeya sababu tio mamololimo wuupa.

¹⁰ Tio, ngaalaa̒lio wau totoonulalo okokayalio laito heduo̒la lo Eeya. Kalajaalio he bilarakatia lo Eeya wau heilohia lo Eeya dadaata bibiahu to olio, tutuuheta u lopoo̒polu ngoilanggubu lipu.

¹¹ Bo humayaalio ngoa̒amila okokayalio boito hamaa lo Eeya tantu tio maalato molaa̒anati to Eeya!”

¹² Yi tahuda mao̒ lo Eeya ode Tamoomuyuwa, “Ooo̒, pohutuwalo boli wolo wambai̒o to ngoilanggubu okokaya lei Ayuba, asali diila mao̒ poo̒ngongota tio!” Lapatao̒ malonao̒ Tamoomuyuwa lonto talu lo Eeya.

Mongo walao̒ wau okokaya lei Ayuba pilopo binasa

¹³ Dengolo wakutu mola lapatio mao̒ mongo walae̒e Ayuba donggo hemohutu potihunggu tobele lowutato talolai̒ tamohuhula limongolio daa̒.

^14-15 Debolo ngotaalio lo tahe ahulaalo tilumetea̒i ode bele lei Ayuba wau lopoduloheo̒, “Tuani, taulo Syeba malonao̒ mai loluhu olamiaatia tou̒ sasaa-piyaalo donggo hemomadeo̒ halabolu wau kokoo-lodaiyalo donggo hemonga huo̒yoto to tiliilio. Timongolio malo lambata bibii-natangiyalo boito wau helomate yila-yilateelo mao̒ mongo wato li Tuani tawoluo mota teto. Bo watotia wambao̒ talo aahu mai tilinggula loo̒ podulohei odeli Tuani.”

¹⁶ Tou̒ tio donggo hemobisala, malonao̒ mai wato oluolio wau loloi̒ya mao̒, “Hihii-mbawalo li Tuani wau mongo diti madilehito lo ilato tunggula yilate ngoa̒amila. Bolo watotia wambao̒ talo aahu mai tilinggula loo̒ podulohei odeli Tuani.”

¹⁷ Tou̒ tio diipo yilapato lobisala, malonao̒ mai wato otolulio wau lopoo̒taa mao̒, “Tolo pasuukani tamoo lambata lo Kasdim malo lambata uu̒u-ntawaalo li Tuani wau helomate yila-yilateelo mao̒ mongo wato li Tuani. Bo watotia wambao̒ talo aahu tilinggula loo̒ podulohei odeli Tuani.”

¹⁸ Tou̒ tio donggo hemobisala, malonao̒ mai wato wewo talodelo habari, “Mongo walai̒ Tuani donggo hemohutu potihunggu tobele lowalai̒ Tuani tamohuhula daa̒.

¹⁹ Debolo dutaala daa̒ lohiipai lonto mantahu huta ohungaya u luasi daa̒ wau helolemba bele boito tilinggula lolohubu wau loo̒pate yila-yilateelo mao̒ ngoa̒amila walai̒ uani. Bo watotiaalo talo aahu tilinggula loo̒ podulohei odeli Tuani.”

²⁰ Lapatao̒ tilimihula mola tei Ayuba wau helo ngaidinga pakeyangilio tuotio limilimi. Tio longuluheo̒ lunggongio, tulusi losujudu

²¹ wau loloi̒ya, “Wau̒ tilantu mai lo Eeya lou̒ diila owolo-wolo, wau wau̒ maamate mola olo lou̒ diila owolo-wolo. Eeya malongohi wau Eeya olo malohama. Ilopujialo mola tanggu-Lio!”

²² Oditolio, eleponu tei Ayuba heloo̒ laasa totoonulalo baala boito, tio diila helohutu dusa wau diila helo potala to Allahu Taa̒ala.