AMOS 9 - KITABI HABARI MOPIOHE

Bibilohe pasali lo hukuumani lonto Eeya

¹ Watia loo̒onto Eeya tihutihula totili lomesba. Tio longohi mai palenta botie, “Totaa̒alo daa̒-daa̒alo mao̒ tataa-uwaalo wolihi to Belee-U̒ alihu ngoa̒amila sulambe molotau̒lo. Loloohubelo wowoo-lihiyaalo boito ode yitaato lunggongo lotau-tauwalo. Timongolio tadiila yilate mapatee-U̒ mate-mateelo mao̒ todelomo popaatea. Diaaluo penu boli ngotaa mao̒ tamoo̒ teteeo̒, diaaluo penu boli ngotaa mao̒ tamoo̒ lopato.

² Eleponu timongoli tumuwota ode dunia lotaa mate, Wau̒ mamongaatao̒ olimongolio. Eleponu timongolio mobotula mola ode hulungo, Wau̒ mamopo tuhutai olimongolio mola monteeto mai.

³ Wonu timongolio motituuo̒ to bolitutuo̒ lo Hui̒dee Karmel, Wau̒ mamo lolohe wau moheu̒upa olimongolio. Wonu timongolio motituuo̒ towamoo̒ deheto, Wau̒ mamo malentaao̒ naha lodeheto u molopanga olimongolio.

⁴ Wonu timongolio tawalo lomusu, Wau̒ mamo malentaao̒ alihu timongolio pateelo mate-mateelo mao̒. Wau̒ oteekati u mopobinasa olimongolio, wau diila tamomantu olimongolio.”

⁵ Dunia molotau̒lo wau ulipulio motilimi, sababu tilenggulo Eeya Taa Laba-labaalo molanggato wau Laba-labaalo kawasa. Debo odelo Dutulaa Nili mobotulo wau molaahu odi-odieelo mola timongolio mobotula mola tulusi modehu.

⁶ Eeya lomongu belee-Lio molaminga mola to dulente, toitaato dunia pilopohuli-Lio hulungo odelo kuba, wau taluhu lonto deheto tiluwa-Tio ode tudulio, talohutu ngoa̒amila boito tanggu-Lio yito Eeya!

⁷ Eeya lotahuda mai, “Wuu umati lo Isirai̒lu, Wau̒ mopoo̒tuoto taulo Sudan tutuuwauwa Wau̒ mopoo̒tuotai olimongoli. Wau̒ malodelo taulo Pilistin lonto Kereta wau taulo Siria lonto Kir tutuuwauwa debo odelo Wau̒ lodelo olimongoli lonto Masiri.

⁸ Wau̒, Eeya Taa Laba-labaalo molanggato, donggo hemo ngima-ngimaato yilaidia lo Isirai̒lu u odusa botie, wau Wau̒ mamo poo̒pulitao̒ monto talu lodunia. Bo wali mai lei Yako diila ngoa̒amilalo pobinasaa-U̒. Wau̒, Eeya, malo tahuda mai.

⁹ Wau̒ mamongohi palenta wau molaapo bangusa lo Isirai̒lu debo odelo tau molaapo pale todelomo tiitihe. U mohinggi ngoa̒amila tadiila ohuna towolota limongolio, Wau̒ mamopo ulambohe olimongolio towolota lo babaa-ngusawalo.

¹⁰ Tau-tauwalo tahi oduusawa towolota lo umati-U̒ loloi̒ya, ‘Allahu Taa̒ala diila tamopoluli olanto odungga lobaala.’ Bo, tutuulio tutu timongolio mapateelio mate-mateelo mao̒ todelomo popaatea.”

Isirai̒lu mapo nguliyolo to owowoluwoalio

¹¹ Eeya lotahuda, “Mamei dungga wakutuulio Wau̒ moponguli yilaidia lei Dauda. Botia yilaidia boito malowali debo odelo bele u loloohubu. Bo didii-ngingaalo meeseliilio mapoo̒ piohu-U̒ wau muli bongulo-U̒ tilinggula mowali debo odelo u muloololio mai daa̒.

¹² Taulo Isirai̒lu mamo ngaawasa lipu lo Edom udonggo ilolabita wau ngoa̒amila bangusa tamuloololio mai milikii-U̒. Wau̒, Eeya, malo tahuda wau Wau̒ mamoponao̒ sua̒li boito.”

¹³ Eeya lotahuda, “Mamei dungga wakutuulio pale mobutu mai odito linggahio tilinggula sembo pongotolalo diila mopobunto-bunto. Bungo lo angguru matumumula mola molinggahe daa̒ tilinggula tau mamo lolaalaaita mohutu taluhu lo angguru. Taluhu lo angguru mahumeheto monto huhuu-ideyaalo wau tumolohe monto huhuu-luduwaalo.

¹⁴ Wau̒ mamopowali mai umati-U̒ Isirai̒lu muli maa̒amulu. Timongolio mamuli momongu kokoo-tawaalo limongolio u mabilinasa, lapatao̒ timongolio mamo tibiluloa̒ mola teto. Timongolio mamo pomulo ii̒i-lengiyalo angguru wau mongilu anggurulio. Timongolio mamo tolopani pangimba halabolu, wau molamela tilapulio.

¹⁵ Wau̒ mamopo tambati umati-U̒ tolipu u mailohi-U̒ ode limongolio. Timongolio madiilalo pahutolo mola monteeto. Wau̒ Eeya Allahu Taa̒ala limongolio malo tahuda.”