AMOS 7 - KITABI HABARI MOPIOHE

BIBILOHE PASALI LO HUKUUMANI LONTO Eeya Bulita

¹ Watia loo̒toduo mai bibilohe tuwau lonto Eeya Taa Laba-labaalo molanggato. Iloontanga lowatia Eeya lopowali mai ngopolemboa̒ daa̒ bulita tou̒ tau yilapato lomopoto huo̒yoto odeli olongia, wau huo̒yota bohu maluli lobutu mai poli.

² Bubuu-litaalo boito ngopee̒ lopoo̒pulita ngoa̒amila pipii-lomuwalo tohuta. Lapatao̒ watia loloi̒ya, “Eeya Taa Laba-labaalo molanggato, ambungualo mai umati lo Eeya! Timongolio odito kikiio̒ wau molulupuhu, diila pongalo aakali timongolio moo̒ taahangi?”

³ Eeya lolomelao̒ patujuu-Lio wau lotahuda mai, “U iloontongamu boito diila tamotoduo mai.”

Tulu

⁴ Wau̒ luli loo̒onto bibilohe tuwau lonto Eeya Taa Laba-labaalo molanggato. Watia loo̒onto to Eeya donggo hemopo dapato u mohukuumani mai umati-Lio wolo tulu. Tulu boito lodelita tunggula lopulito auhe daa̒ to walungo lohuta wau maloo̒pobu halabolu.

⁵ Watia loloi̒ya, “Yaa Eeya Taa Laba-labaalo molanggato, ambunguolo pohuhelia mao̒ tulu boito! Umati lo Eeya odito kikiii̒o wau molulupuhu, diila pongalo aakali timongolio moo̒ taahangi?”

⁶ Eeya luli lolomelao̒ patujuu-Lio wau lotahuda, “Utie olo diila tamotoduo mai.”

Tali poluu̒du tihutihula motulidu

⁷ Watia loo̒toduo mai bibilohe tuwau uwewo lonto Eeya. Iloontonga lowatia Eeya tihutihula totili lo dingingo meeseli tuwau u bilongu wolo lopohuna tali poluu̒du tihutihula motulidu. To uluu̒-Lio Tio dihudihu tali poluu̒du boito u momilohe wolo dingingo meeseli boito tihutihula motulidu meaalo diila.

⁸ Tio lohintu olaatia, “Yio̒ loo̒onto wolo, Amos?” Watotia lolametao̒, “Tali poluu̒du u tihutihula motulidu, yaa Eeya.” Lapatao̒ Eeya lotahuda, “Wau̒ momake tali poluu̒de botie u mopobilohei deu̒ umati-U̒ debo odelo dingingo meeseli udiila motulidu. Wau̒ diila tamolomela patujuu-U̒ poli, Wau̒ tantu mamo hukuumani mai olimongolio.

⁹ Tataa-mbatiyalo u pilomake lo wali mai lei Isihaka u potabiaalo maa̒ntuluolo. Tataa-mbatiyalo mantali taulo Isirai̒lu maloohubuolo. Wau̒ mamo poo̒pulito wali mai li Olongia Yerobeam.”

Tei Amos wolei Amajia

¹⁰ Tei Amajia, iimamu to Betel, lolao podulohu botie odelei Yerobeam olongia lo Isirai̒lu, “Tei Amos donggo hemo woombowa wolo ulipu moluwali li Olongia. Loloo-iyaalio u mopopatu ulipu mamoo̒ sababu lipu botie moa̒ntulu.

¹¹ Tio hemoloi̒ya deu̒ ti Olongia maamate todelomo popaatea, wau taulo Isirai̒lu tantu mabintao̒lio ode polayahu, molaminga monto lipulio lohihilao.”

¹² Lapatao̒ tei Amajia loloi̒ya mao̒ odelei Amos, “Wuu nabi, pohualingolo ode Yehuda! Pohutubaalo mola teto. Huliaalo mao̒ timongolio tamongohi mai balanja u potumulo olemu!

¹³ Diilalo mao̒ pohutuba to Betel. Kota botie tolomodu duo̒lo li olongia, wau tambati pototabiaalo osiipati obobangusa.”

¹⁴ Tei Amos lolametao̒, “Wau̒ diila nabi sababu tuugasi todelomo pomalenta. Tutuulio tuu wau̒ botie tamoo-miyahea bibiahu wau tamoolipua hungo lo ara.

¹⁵ Bo Eeya malohama olau̒ lonto tuugasiu̒, wau lopoa̒hu olau̒ mopo tunggula tahulii-Lio ode taulo Isirai̒lu.

¹⁶ Sababu uito dungohiilo wolo upilo tahuda mai lo Eeya ode olemu. Sababu yio̒ modini olau̒ mohutuba motehengi bangusa lo Isirai̒lu.

¹⁷ Eeya lotahuda mai deu̒ dilemu mamowali suuntali to dadaa-lalaalo kota, wau mongo walau̒mu pateelio mate-mateelo mao̒ todelomo popaatea. Hutamu mataya-tayadulio ode taa wewo, wau yio̒ lohihilao maamate tolipu lotaa udiila motota to Eeya. Ulipu lo Isirai̒lu tantu mabintao̒lio mota ode polayahu, molaminga monto lipulio lohihilao.”