AMOS 6 - KITABI HABARI MOPIOHE

Isirai̒lu loa̒ntulu

¹ Matilopotala timongoli tatumu-tumula hisanangia to Sion, wau timongoli tamolaasa aamani to Samaria – timongoli wuu tahi otanggulawa todelomo ulipu bangusa lo Isirai̒lu tapolu-polutuo̒ botie, timongoli tabiasaalio henao̒o mai lo lipu u mei̒tulungi!

² Ponao̒lo mota bilohi mao̒ to Kalne, lapatao̒ ponao̒lo tulusi ode kota lo Hamat uleidaa̒ boito, lapatao̒ ode kota Gat to Pilistin. Tingga to lantobumu kokoo-tawaalo boito lebe mopiohe wolo yilaidia lo Yehuda wau Isirai̒lu? Wolo madala limongolio lebe udaa̒ wolo lipumu?

³ Timongoli hemo taahangia deu̒ dulahu lobaala donggo molamingo, bo huhuu-huhutuumu bo mopo linggahei dudunggaalio mai lodulahee diila omanusia boito.

⁴ Matilopotala timongoli tahi balata toitaato heheetule u ngoa̒amilalo dadaata wau helo potihunggu wolo tapu losapi wau himba u buboto!

⁵ Timongoli sanangi hemo ngalangani lahu, debo odelo u pilohutu lei Dauda, wau timongoli mopoitohe lalaa-huwaalo boito wolo kocapi.

⁶ Timongoli mongilu angguru monto halati u hituanga polupolu, wau timongoli helomake winulo moonu u mopiohe daa̒, bo timongoli diila lotisuukali lohilao to obobinasa lo Isirai̒lu.

⁷ Sababu uito timongolilo tabohu-bohulio mabintao̒lio mota ode polayahu. Popoo-tihungguwalo wau totaa-totamelumu mamopaluto.

⁸ Wolo pintalo Eeya Taa Laba-labaalo kawasa wau Laba-labaalo molanggato malo poe̒ela mai utie, “Wau̒ molonua̒ to osombongi umati lo Isirai̒lu; Wau̒ diila sanangi wolo bebee-leyaalo biluloa̒ saaha li olongia limongolio u ngoa̒amilalo dadaata. Tiilo lokota limongolio wolo ngoa̒amila uwoluo todelomio mawuduwo-U̒ ode musu.”

⁹ Wonu bolo donggo woluo mopulu lota tahituua̒ todelomo bele ngowale, timongolio maamate olo.

¹⁰ Ngotaalio lo pongawaa̒ ngaalaa̒ tao̒ tuugasi monguulusi polobungala olio, mamonao̒ mai wau modelo lumualao̒ milate lo tamaniilio. Tio mamo ngiibodeo̒ totaa uwoluo towimbihu dibalaka lobele boito, “Wolo donggo woluo tatumu-tumulo ngopohia yio̒?” Yi mao̒dungohe mai totameta, “Diila!” Pongawaa̒ longaalaa̒ tao̒ tuugasi molobunga milate boito mamoloi̒ya, “Diilalo pobisala! Ito diila mowali mongunte tanggulo Eeya.”

¹¹ Wonu bolo Eeya mongohi palenta, bebee-leyaalo leidaa̒ kikiio̒ maa̒ntuluwolo.

¹² Tingga mowali wadala tumetea̒ tohui̒dee botu? Wolo mawoluo tahelo madeo̒ deheto wolo sapi? Bo timongoli malopo loloombulia u aadili lowali peedi u moo̒pate, wau u otutu lowali tilaala.

¹³ Timongoli hemolatabu deu̒ timongoli malopo olaaheo̒ Lodebar. Timongoli olo loloi̒ya, “Ami motuuheta lotolo u moheehu Karnaim.”

¹⁴ Eeya Taa Laba-labaalo molanggato wau Laba-labaalo kawasa lohihilao lotahuda mai, “Umati lo Isirai̒lu, Wau̒ mamolao suludadu monto bangusa tuwau udeli u moluhu lipumu. Timongolio mamodeehe olimongoli monto dalalo ode Hamat totilayo demola Lumbaya Araba to huliaalio.”