AMOS 5 - KITABI HABARI MOPIOHE

Titiango u molilihu

¹ Dungohiilo wuu umati lo Isirai̒lu! Wau̒ mamopolahu mai olemu lahu tuwau ilopatea:

² Malodehu Isirai̒lu u donggo tadulahu, tio diilalo mobongu mai! Toitaato hutalio lohihilao tio pilopoluli, diaaluo talomantu olio timihulo.

³ Eeya Taa Laba-labaalo molanggato lotahuda, “Kota tuwau to Isirai̒lu longambu mai ngolihu lota pajule, bo taluli lohualingai bo wambao̒ ngohetuto lota; kota uwewo longambu mai ngohetuto lota, taluli lohualingai bo mopulu lota.”

⁴ Eeya lotahuda ode umati lo Isirai̒lu, “Pohualingolo mai ode Olau̒, yi timongoli matumumulo.

⁵ Diila mao̒ ponao̒ ode Bersyeba mola motabia. Diila mao̒ pololohe ola-U̒ to Betel, sababu Betel mamooli. Diila mao̒ ponao̒ olo ode Gilgal, sababu ulipu lokota boito mabintao̒lio ode polayahu.”

⁶ Muli pohualingolo ode Eeya, yi timongoli matumumulo. Wonu timongoli diila mohualingao̒ ode Olio, Tio mamei dungga debo odelo tulu u umalapo wau momobu tunggula maahu taulo Isirai̒lu. To Betel diaaluo penu boli ngotaa mao̒ tamoo̒pate tulu boito.

⁷ Matopotala timongoli, timongoli tahemo pololoo-mbulia u aadili wau hemomakusa wolo diila omanusia haku lotau!

⁸ Eeyaalo talohutu popoo-liyamaalo towoludu dulente u mohenggube dunia – poliyama Balantik wau poliyama Kartika. Tio lolomela modio̒lomo lowali lobaango wau dulahu lowali hui; taluhe lonto auhu bilungguwa-Tio ode tudulio. Talohutu ngoa̒amila boito tanggu-Lio yito Eeya.

⁹ Tio mopobinasa taa okawasa pee̒-pee̒enta wolo polo biintengi limongolio.

¹⁰ Timongoli molonua̒ taa u motehengi odiila aadili wau tahemo bisala u otutu todelomo polobutoo̒.

¹¹ Timongoli hemodeehe taa mosikini wau palelio yilambati mongoli. Sababu uito timongoli diila tamo tibiluloa̒ todelomo bebeeleemu u ngoa̒amilalo dadaata, u mabilongu limongoli boito. Timongoli diila tamongilu angguru monto ii̒-lengiyalo angguru u pilomulo limongoli.

¹² Otaawa-U̒ malo odito udaa̒alio ololeetumu wau malo odito daatalio lo dusaamu. Timongoli helodeehe taa mopiohe; timongoli helo lolimo solooi wau lopoluli taa mosikini pilohutulio diila aadili to polobutoo̒.

¹³ Sababu huhutuumu boito, yi tau-tauwalo tahi tinepawa molaasa lebe mopiohe motipoo̒yo wambao̒ tomaasa u moleeto debo odelo uito.

¹⁴ Potolopanilo mohutu u mopiohe wau diila mao̒ pohutu u moleeto, alihu timongoli tumumulo. Yi Eeya Taa Laba-labaalo kawasa mao̒tu-otutuulo mao̒ motibiluloa̒ towolota limongoli debo odelo uiloi̒ya limongoli.

¹⁵ Lonui̒ilo u moleeto wau tolia̒ngiilo u mopiohe, wau potihulaalo u aadili. Otanu Eeya modehu hilao totau-totauwalo tahe ilolabita monto bangusa lo Isirai̒lu.

¹⁶ Eeya Taa Laba-labaalo kawasa lotahuda, “To dadaa-lalaalo kota, tau mamo hilimuta wau mohiito napasi sababu suukali hilao. Tumbao̒ tahi pomeengia matiangolio u modudua̒ humoyonga pee̒-pee̒enta wolo tau-tauwalo tahe bayaliyalo u humoyongao̒ taa mate.

¹⁷ To ngoa̒amila ilengi lo angguru, tau mamo hilimuta sababu Wau̒ meidungga wau mohukuumani olimongoli. Wau̒, Eeya, malo tahuda.”

¹⁸ Otutu topotala lomola timongoli tahi wooloola dulahu Eeya! Wolo hunalio dulahee boito olemu? Dulahee boito bo debo odelo dulahee u modio̒lomo, diila dulahe u mobaango olemu.

¹⁹ Owowoluwoalio debo odelo taa u mopolahi batanga monto singa, bo lodunggaya wolo boruangi. Meaalo debo odelo taa u lohualingao̒ ode bele wau lotitumudu wolo uluu̒lio ode dingingo meeseli, lapatao̒ tilopango lotulidu!

²⁰ Dulahu Eeya memangi mopodungga mai u modio̒lomo, diila u mobaango – dulahu loheengo uwanto-wantohe didi udiila boti motilango.

²¹ Eeya lotahuda, “Wau̒ molonuo̒ malotolu moo̒onto mao̒ raraa-meyaalo agamaamu!

²² Wonu timongoli modelo bake yilalango wau bake lopale, Wau̒ diila tamololimo mao̒. Wau̒ diila mohuto mololimo bibii-natangimu u hiliingohe boito u podewo limongoli ola-U̒ debo odelo bake lo polodame.

²³ Pohuhelia mao̒ totoonulalo lahumu umoo̒ toliyonga bulonga boito; Wau̒ diila mohuto modungohe poloitohu lokacapimu.

²⁴ Lebe mopioheo̒, potolopanilo alihu u aadili tumolohe debo odelo taluhu, wau otulidu hale debo odelo dutulaa udiila pee̒enta mao̒ mohengu.

²⁵ Wuu umati lo Isirai̒lu, tou̒ Wau̒ lodelo olimongoli loli huta datahu wau luasi udelita wopato pulu lotaunu mola hiheolio, Wau̒ diila lohile wolo moo̒ohuu̒ dewo wau bake lonto olimongoli.

²⁶ Bo botia timongoli helolubo Sakut u hea̒nggapuo limongoli olongiaamu boito, wau Kewan, binatangi u hetuboo limongoli boito. Sababu uito bubuu-iyaalo debo odelo manusia u mapilohutu limongoli boito musi bintaa̒ mao̒ limongoli lohihilao,

²⁷ wonu bolo Wau̒ molapi olimongoli ode lipu tuwau ulebe molaminga wolo Damusiki. Wau̒ Eeya tai̒lunte Allahu Taa̒ala Taa Laba-labaalo kawasa malo tahuda.”