AMOS 4 - KITABI HABARI MOPIOHE

¹ Dungohiilo, wuu mongobua lo Samaria tahe oduhenga mola molingohu debo odelo sasaa-piyaalo molingohu to Basan! Timongoli hemodeehe taa molulupuhu, hemohama pae̒eda dadaata daa̒ totaa mosikini, wau hemohile wolo moo̒ohuu̒ to dilemu alihu laito mopodapato minumani u motoheeto olemu!

² Wau̒ Eeya Taa Laba-labaalo molanggato yito Eeya tamantali, wau Wau̒ malodanti mai deu̒ timongoli dedeo̒lio wolo kokaito; timongoli ngoa̒amila madebo odelo tola tomato lo oa̒ailo.

³ Timongoli madedeo̒lio ode mantahu Hermon wau pomahulolo ode bulemengio, ngota-ngota moli hiyango dingingo meeseli u meembide daa̒. Wau̒ Eeya malo tahuda mai.”

Isirai̒lu diila mohuto modungohe

⁴ Eeya Taa Laba-labaalo molanggato lotahuda, “Wuu umati lo Isirai̒lu! Ponao̒lo wambai̒o ode tambati potabiyalo to Betel, wau pohutuulo dusa mota teto! Ponao̒lo ode Gilgal, pohutuulo dusa wolo totoonulalo hilaamu! Toduwolo mopodewo bake timii̒du dumodupo, wau modelo ngotayade mopulu monto totoonulalo tilapulamu timii̒du tolo hui mola!

⁵ Toduwolo mopodewo roti debo odelo lapali oduo̒lomu ode Olau̒, wau toduwolo molatabu deu̒ timongoli malodelo dewo poduhengo! Tantu ui-uitolo u sanangi pohutuo limongoli!

⁶ Wau̒lo tamopo dungga mai baala lo polobiti ode yitaato ngoa̒amila kotamu, bo timongoli diila mohualingai ode Olau̒.

⁷ Wau̒ tamolanggu laahio lodidi tou̒ pilomulomu momalalu daa̒ taluhu. Wau̒ mopotuhutai didi ode kota u tuwau wau diila ode kota uwewo. Halabolu u tuwau moo̒toduo didi polodu, hiambola halabolu uwewo owowoluwoa mohengu.

⁸ To dengolo kota, ulipulio tamalo lulupuhu lou̒ mototoa̒ngo, mololohe taluhee tokota uwewo, bo taluhee teto diila moo̒tuheto. Eleponu odito, timongoli debo diila olo muli mohualingai ode Olau̒.

⁹ Wau̒ lopohiipai dupoto mopatu wau lolao hama u mongantulu totoonulalo pilomulo wau ii̒i-lengiyalo anggurumu. Bubuu-ngowaalo ara, wau bubuu-ngowaalo jaitunimu malo pulito iliila lobulita. Bo penu boli odito timongoli debo diila mohuto olo muli mohualingai ode Olau̒.

¹⁰ Wau̒ lolao mai wembelo lo ngongoto ode olemu debo odelo uilawo-U̒ ode Masiri. Tau-tauwalo tahi muudawa pilate-U̒ yila-yilateelo mao̒ todelomo polotuhua, wau wawaa-dalaamu yilambato. Wau̒ loluangao̒ kemaamu wolo mimii-lateyaalo u boolio malo moo̒ngingi to wulingo. Eleponu odito, timongoli debo diila mohuto muli mohualingai ode Olau̒.

¹¹ Ngotayadu limongoli pilobinasaa-U̒ debo odelo Wau̒ helo pobinasa Sodom wau Gomora. Tadonggo tumutumula towolota limongoli yito debo odelo punggulo ayu u hilama mai lonto tulu. Eleponu odito, timongoli debo diila olo mohuto muli mohualingai ode Olau̒.

¹² Sababu uito, wuu umati lo Isirai̒lu, Wau̒ mamo hukuumani mai olimongoli. Oditolio, potidapa-dapatolo timongoli mololimo hukuumani umapo dunggaa-U̒ mai olemu!”

¹³ Hui̒dee wau dupoto, Eeyaalo talo powali mai; lanjanaa-Lio piloilaalo-Lio mai ode manusia. Tio lohutu mai dulahu wau hui; toitaato lo boboo-litutuo̒walo dunia Tio lolontale. Eeya Allahu Taa̒ala Taa Laba-labaalo kawasa, boitolo tanggu-Lio.