AMOS 3 - KITABI HABARI MOPIOHE

¹ Dungohiilo tahuli lo Eeya botie, wuu bangusa lo Isirai̒lu tamaa dilelo yilumualai lo Eeya lonto Masiri! Eeya lotahuda,

² “Monto ngoa̒amila bangusa todunia timongolilo tatuwa-tuwaulo bangusa tao̒onuhe-U̒ wau piloo̒tuotu-U̒. Uitolo sababuulio dusamu udaa̒, wau Wau̒ tantu mohukuumani mai olimongoli.”

Tuugasi li nabi

³ Tingga mowali taduulota monao̒ pee̒-pee̒enta lou̒ diila moheelumapo meimulo?

⁴ Wolo singa to oa̒ayua moheuwanga, wonu tio diipo loo̒dungga mangusaalio? Wolo walao̒ singa moheuwanga todelomo huangia wonu tio diipo loheu̒upa wolo-wolo?

⁵ Wolo bulungi meitaalo todelomo popotilo, wonu taalo diila pilopopasi? Wolo popotilo meiheu̒uto wonu diaaluo u ilou̒upa?

⁶ Wolo taa tokota diila hulu-huluhelio moo̒dungohe tingohu torompeti tuoto lo popaatea? Tingga mowali kota tuwau otuhata lobaala, wonu Eeya diila molao mai?

⁷ Eeya Taa Laba-labaalo molanggato diila pee̒enta mao̒ mohutu mai u hi tua-tuawua olo lou̒ diila mopoi̒laalo mai patujuu-Lio ode mongonabi, mongo wato-Lio.

⁸ Wonu bolo singa moheuwanga, tatoonu tadiila moohe? Wonu bolo Eeya Allahu Taa̒ala motahuda, tatoonu tamowali motipoo̒yo batanga wau diila mopo malalumu mola tahulii-Lio?

Oa̒antulu sama-samaata lo Samaria

⁹ Pomala lumualo mola utie ode tau-tauwalo tahi biluloa̒wa tobele biluloa̒ saaha li olongia lo Masiri wau Asdod, “Potia̒mbulo mola to huhuu-ideyaalo totili lo Samaria, wau poo̒tuota mao̒ puuyota udaa̒ boli tahi pohamawa untungi daa̒ u pilohutulio mola teto.”

¹⁰ Eeya lotahuda mai, “Tau-tauwala boito hipoluanga bebee-leyaalo biluloa̒ saaha li olongia limongolio wolo babaa-langiyalo ulotapu mai limongolio lou̒ helohama untungi daa̒ wau wolo diila omanusia. Tumbao̒ timongolio sama-samaata diila motota motihutu motulidu hale.

¹¹ Sababu uito lipu limongolio mabalaa lomusu, biintengi limongolio antuluolio, wau bebee-leyaalo biluloa̒ saaha li olongia limongolio lambatolio.

¹² Debo odelo ngotaalio lodiiti taluli loo̒tapu mai bo oa̒ata ngopanggalo meaalo bulonga ngopita lo himbalio umaa dilangapo losinga, odito olo bo ngoi̒di wambao̒ tamaa meitolaa monto ulipu lo Samaria tabotia hibalata sanangi to tambati potuluhelo u mopiohu.”

¹³ Allahu Taa̒ala Taa Laba-labaalo kawasa wau Laba-labaalo molanggato lotahuda, “Poo̒tuotilo botia, wau poe̒ela mao̒ wali mai lei Yako.

¹⁴ To dulahee Wau̒ mohukuumani taulo Isirai̒lu sababu dusaalio, Wau̒ mamopo binasa memees-bawaalo to Betel. Timii̒du mesba maboliyolo huhuudio tunggula modehu mola ode huta.

¹⁵ Bebee-leyaalo duo̒lo sembo lohuhulo wau bebee-leyaalo u pohuheliyalo tosembo lopatu maa̒ntuluwo-U̒. Bebee-leyaalo u diladai wolo tua̒alanga mamolohubu; ngoa̒amila bele ulei̒daa̒ mamoa̒ntulu.